Tazmin

Tazmin: Mukhammas [pentameter] band mein:

Chaha tha ek shakhs ko, par wo mila nahin,
Ghuncha hamare pyar ka mutlaq khila nahin,
Ab aur jam-e talkh tu mujhko pila nahin,
Ya rab meri wafaon ka ye to sila nahin,
Kya mere nale sun ke tera dil hila nahin.

Tere baghair har ghadi rehta hun beqarar,
Teri hi justaju hai mujhe laila-o-nihar,
Dil hai tere wisal ka ab bhi ummidwar,
Ab bhi hai tere wa'de pe mujhko to aitbar,
Ab aa ke mil, zabani bharosa dila nahin.

Tere bina hai koi bhi mera nahin yahan,
Teri hai ye zamin, ye hai tera aasman,
Manzil meri wahin hai tera naqsh-e pa jahan,
Qurban tujh pe ho ke mili marg-e jawidan,
Ai hazrat-e Masih tu phir se jila nahin.

Ek saniha-e zeest hai, adna si teri bhool,
Apni rifaqaton ka sila karta mein wasool,
Mein bhi hun admi, na farishta hun na rasool,
"Mere sukut-e yas pe itna na ho malul,
Mujhko Khuda na-khwasta, tujhse gila nahin."


Back

Unless otherwise stated, the content of this page is licensed under Creative Commons Attribution-ShareAlike 3.0 License