Qat'at

1.
Mujhko jab se hai unse muhabbat hui,
Zindagi ki hi jaise inayat hui,
Usne jo-jo kaha, maine wo-wo kiya,
Unko phir bhi mujhi se shikayat hui.

2.
Kis se ja ke kahein apni rudad ko,
Kaun hai jo sune meri fariyad ko,
Tumko ma'alum thi baat saari magar,
Tum bhi aaye nahi meri imdad ko.

3.
Sochta hun bahut kahin aisa na ho,
Phir muhabbat se badhkar ke paisa na ho,
Ab ke dhokha mila to mein mar jaunga,
Ye naya shakhs bhi tere jaisa na ho.

4.
Aapki chaah dil mein sajate rahe,
Ham diye ki tarah jagmagate rahe,
Door rehna pada bhi hamein gar, to ham,
Yad karte rahe, yad aate rahe.

5.
[Janab Akabr Ilahabdi se ma'azarat ke sath]:

Tab-e shanidan gum hai teri ek bat se,
Bayein taraf ke kan mein hai dard raat se,
Jabda-o-daant-o-aankh bhi hain dard mein shariq,
Ya Rab! Mujhe nikal in azaabaat se.

Nos. 6-7 Dostam Rajmani ki nazr:

6.
Kam ho to nahi dekha aaram tak,
Na nazar hi kabhi pahunchi inaam tak,
Aapki khatir bas ham to le kar gaye,
Har nakaara ke kam ko anjam tak.

7.
Kam jo bhi mila ba-adab kar diya,
Ba-sabab kar diya, be-sabab kar diya,
Bad is sab ke hain unke tewar chade,
Mano hamne kya jane ghazab kar diya.

8.
Kam karne pe ma'il tabi'at rahi,
Kam hi meri sachchi ibadat rahi,
Jitna dabta gaya wo dabate gaye,
Sabr kar lena meri bhi aadat rahi.

Nos. 9-11 NAI ki nazr:

9.
Daur-e Mazi ki inmein nishani mili,
Apne apnon ki inmein kahani mili,
Kaghazon ki na kyun ham hifazat karein,
Inmein ehsas ki tarjumani mili.

10.
Apna rishta kya se kya tu dekh ho gaya,
Aik anmit si mathe ki rekh ho gaya,
Hamne likha jo kuchh bhi wo lekh hi raha,
Tumne rakha, sanwara abhilek ho gaya.

11.
Chhune bhar se hi rishta sa qayam hua,
Sakht tha pehle tu, ab mulayam hua,
Teri khushbu ki aisi hai jadugari,
Mehka-mehka sa sara hi 'alam hua.

12.
Aane wala harek iska ahbab hai,
Ilm-o-danish ka ye aik mehtab hai,
Isko hikmat, sa'adat se wa kijiye,
Daur-e mazi pe khulta hua bab hai

13.
Ye socha tha juda reh kar mein tumko bhool jaunga,
Qalam aur kaghazon mein hi main apna dil lagaunga,
Abhi tak to kabhi mumkin nahin ho paya hai mujh se,
Musalsal yad karta hun, musalsal yad aaunga.

14.
Main tujhe bhoolne wala hi tha, lekin dil mein,
Ik naya dard liye phir teri yad aayi hai,
Aik tu hai ki kabhi tune na hanskar dekha,
Aik dil hai ki abhi tak tera shaidai hai.

15.
Ab tu mila to kya mila, na wo main hun na wo tu,
Kitni shadid thi meri milne ki aarzu,
Jab door the to raat-din rehta tha intezar,
Ab aql gum hai dekh ke tumko yun ru-ba-ru.

16.
Agar mumkin hai banna tera hissa, aansu ban jaun,
Uthhun dil se, palun aankhon mein, palkon pe jhalak aaun,
Bichhadte waqt bhi ye fakhr hoga khud-nawazi ka,
Tere galon se dhal ke phir tere hothon pe mar jaun.
For Translation, click here

17.
Tha mujhko jiska andesha, wahi phir ho gaya aakhir,
Jo kal tak bhai kehta tha, mujhe kehne laga kafir,
Siyasat ne zehan mein nafratein bo dein hain har ik ke,
Bisatein bichh gayien, chaalein bhi chalne lag gaya sha'ir.

18.
Rehte ho agar zad mein, nishana bhi banoge,
Karte ho diwana to, diwana bhi banoge.
Chunte rahe yun hi agar ilm ke dane,
Mujhko hai yaqin ek din dana bhi banoge.


Back

Unless otherwise stated, the content of this page is licensed under Creative Commons Attribution-ShareAlike 3.0 License