Nazm

Nazm: Kash-ma-kash

Dekha hai maine ik hasin,
Barqi nazar, raushan jabin,
Jo ho gaya dil mein makin.

Tumko na ho mujh par yaqin,
To le chalun tumko wahin,
Tum khud bhi dekho hamnashin.

Kamsin hai wo aur naznin,
Andaz uske dilnashin,
Wo mah-ru hai ik nagin.

Kya aasman, kya ye zamin,
Dekha kisi ne hai nahin,
Aisa hai wo mah-e jabin.

Reh kar uske itna qarin,
Ik nam tak poocha nahin,
Phir bhi raha wo dil-nashin.

Sab rahein us tak hi gayin,
Ham reh gaye phir bhi yahin,
Aur duriyan ha'il rahin.

Jazbat hain jyun aabgin,
Aansun hain zer-e aastin,
Tanha rahein kyunkar hamin?

Us pe hai jan sad aafrin,
Kaise rahein uske qarin,
Ab faisla kar do tumhin.


Nazm: Intezar

Dekho mein aaj bhi zinda hun.

Sadiyan guzrin tufan gaye,
Ye lehrein phir ab sahil par,
Kyun aa aa ke takrati hain,
Khamosh fazaon mein aksar,
Mazi ka geet sunati hain,
Phir dard angdai leta hai,
Aur yad ki tees jagati hai,
Msut pyar se lori ga ga kar,
Jivan ko sulana chahti hai,

Lekin mein aaj bhi zinda hun.

Jo dekhe khwab wo sab toote,
Wade jo kiye nikle jhoote,
Ab main aur mera aa'ina-e dil,
Paththar ke shehr mein rehte hain,
Rote hain aur dukh sehte hain,
Din mein ik naqli chehra hai,
Ratein aur shamien tanha hain,
Tu aa to shai, aik bar to mil,
Kitna viraan ye lamha hai,

Aur mein aaj bhi zinda hun.


Nazm: Yaum-e Yadgar

Yadon ke aa'ne ko phir saf aaj kar lun,
Agache toota sahi, ye ab bhi kam deta hai,
Aaj ke daur mein bhi, khushnuma manzar dikhata hai,
Ye alag bat hai ab shaklein dhundhlane lagi hain,
Magar mein aaj tak is aa'ine ko,
Aik pal ke vaste bhi,
Khud se juda na kar paya hun,
Har yaum-e yadgar ko main,
Khud apne na-kaif hathoin se,
Ise khud hi saf karta hun.


Nazm: Maut 1

Meri kitni mautein hui hain,
Yad nahin!

Shayad pehli bar jab usne kiya tha,
Kampte hoton se mere pyar ka iqrar,
Aur kaha tha bahut hi sharma kar,
"Han! karti hun main bhi tumse pyar."

Shab-e hijran ki manind, tanha shamon ki tarah,
Maut shaklein badal ke aati thi,
Uske aane se badal jati thi fiza,
Pyar ke naghme hayat gaati thi.

Phir aik din apni saheli ke ghar,
Darte-darte mujhe chupke se bulaya tha,
Usne ro-ro ke shikasta lafzon mein,
Mujhe meri maut ka parwana sunaya tha.

Shehnai bajte shehr se bahut door,
Chhote se aik veeran kamre mein,
Aaj hi ke din,
Meri maut,
Ehsas-e nakami-e ishq
Ka talkh zehr peene se hui thi.

Us din se har tanha sham ko,
Meri aik maut hua karti hai,
Subah mein phir se zinda ho jata hun,
Sham ko dobara marne ke liye.

Silsila jari hai,
Meri maut ki pehli barsi mein,
Shirkat karne ke liye,
Aapka
Shukriya!


Nazm: Maut 2

Apni maut ke poore aik sal bad,
Main dekhta hun…

Meri raghon mein harkat hai baqi,
Mere lahu mein abhi rawani hai,
Seene mein hai dhadkan ki khamosh sada,
Are! ye to imkan-e zindagani hai.

Judai ki baton pe mujhe yaqin na tha,
Na thi tumhein kisi aur ki tamanna ya khayal,
magar aik duje se alehda rehte hue,
Zinda rehkar guzaara hai aik poora sal.

Zinda rehne ke liye ik pyar hi nahin kafi,
Is bat ka shayad tumko ehsas hua hoga,
Lekin tere tamam hasil-e daulat se bhi,
Mera khalipan to nahin bhara hoga.

Tumhein kya jo zindagi ke satrangi dhanak ka,
Aik rang chhup bhi jaye jo kahin,
Aik rang ke kahin chhup jane se,
Wo satrangi dhanak toot-ta to nahin.

Lekin kya kabhi us rang ka ehsas tere dil mein…
(Kash! wo rang hota)

Magar afsos, wo rang to chhup gaya hai,
Kho gaya hai wo dhundhalon mein,
Aur aaj mein,
Apni maut ki pehli barsi mana raha hun.


Nazm: La-unwan

Hai jo ye nazm ki duniya, teri ulfat ne dikhlai,
Tere hi zikr se aayi, meri ghazlon mein ra'nai.

Na dekha tha tumhein jab tak, mein ulfat se tha begana,
Tumhari ik jhalak ne phir banaya mujh ko diwana.

Phir us ke ba'd to har su, tera chehra nazar aaye,
Akelepan mein dil mera, bina hi bat ghabraye.

Mein tumko sochta rehta tha aur jagta tha raton mein,
Karun mein bat koi bhi, tum aa jate the baton mein.

Meri halat pe mere dost bhi khase pareshan the,
Bahut bechainiyan thien, ishq ke sare ye imkan the.

Magar mein sochta tha, hai tamanna meri la-hasil,
Kahan tum ho, kahan mein hun, tumhare pyar ke qabil.

Udhar tum the muhabbat se meri na-aashna qat'an,
Idhar tum ko hi hardam sochta rehta tha mera man.

Hua phir yun, ke gardun ne faza ka rang hi badla,
Muhabbat ki kaman se teer ik, phir yak-ba-yak nikla.

Ta'ammul aur jhijhak pe aakhir maine fauqiyat payi,
Meri rudad phir dil ki qalam se warq par aayi.

Bahut hi shauq se likh kar wo khat arsal kar dala,
Dadakte dil se khud apna sukun pamal kar dala.

Mila pehla tumhara khat yaqin mujh ko nahin aaya,
Khili qaus-e qujah khat mein, tera chehra nazar aaya.

Zahe qismat, ke phir to ho gaya ik silsila jari,
Masarrat to hui hasil, miti phir bhi na bezari.

Tumhare aik-ik khat ko, mein sau-sau bar padhta tha,
Na aata khat to mein ja-ja ke phir qasid se ladta tha.

Kitabat se nikal kar phir hue ham aik, jane kab,
Jo the mehboob aur aashiq, bandhe bandhan mein jane kab.

Ho tum ab samne mere, au' mein tumse mukhatib hun,
Karun ab shukr kya 'Sagar', mein kuchh kehne mein qasir hun.


Nazm: Bazghasht

Use jo dekha to beete dino ki yad aayi.

Ki jaise dhoop mein jalte badan ko chhaon mile,
Ki jaise bhatke musafir ko koi gaon mile,
Ki jaise paon se kanta koi nikal jaye,
Ki jaise barson se bichhada habib mil jaye,
Ki jaise raat ki tariki mein tajjali si,
Ki jaise marz-e kuhan mein dawa tasalli si,
Ki jaise zakhm pe marham koi laga jaye,
Ki jaise marne se pehle masiha aa jaye,
Ki jaise pyas mein aab-e hayat mil jaye,
Ki jaise mange bina kainat mil jaye,

Use jo dekha to beete dino ki yad aayi.

Kabhi to adna si baton pe rooth jati thi,
Kabhi akele mein pehron mujhe manati thi,
Kabhi savere achanak wo uska ghar aana,
Kabhi barasti ghataon mein bheegta pana,
Kabhi wo hansti, kabhi zar-zar roti thi,
Kabhi bhi 'bat' hamari na khatm hoti thi,
Kabhi na wajah koi, phir bhi badgumani-si,
Kabhi wo lagti haqiqat, kabhi kahani si,
Kabhi wo mere bure waqt kam aati thi,
Kabhi na toot-ti, har hal mein nibhati thi,

Use jo dekha to beete dino ki yad aayi.

Mujhe to aisa laga usko kuchh malal sa hai,
Mujhe to aisa laga ankhon mein ik sawal sa hai,
Mujhe to aisa laga pas wo bulayegi,
Mujhe to aisa laga aap man jayegi,
Mujhe to aisa laga dard ka sahara hai,
Mujhe to aisa laga behr ka kinara hai,
Mujhe to aisa laga zindagi bhi zalim hai,
Mujhe to aisa laga toot kar bhi saalim hai,
Mujhe to aisa laga ab ana ka but todhein,
Mujhe to aisa laga mil ke dono dil jodein,

Use jo dekha to beete dino ki yad aayi.

Mein janta hun ki khud aashiyan jalata hun,
Mein janta hun samajhkar fareb khata hun,
Mein janta hun inhin dooriyon mein jeena hai,
Mein janta hun zehrab hans ke peena hai,
Mein janta hun wo mere liye parayi hai,
Mein janta hun harek beeta pal judai hai,
Mein janta hun khud apna dil jalaunga,
Mein janta hun use bhool bhi na paaunga,
Mein janta hun ki ye fasle na kam honge,
Mein janta hun ki ab ham kabhi na ham honge.

Use jo dekha to beete dino ki yad aayi.


Nazm: Yad

Maine us rat tujhe der talak yad kiya.

Regh-e sehra pe faqat main tha teri yad liye,
Chandni phaili thi ik naghma-e dilshad liye,
Jism jalta tha ki aag ke dariya ki tarah,
Main tha leta hua apna dil-e nashad liye.

Maine us rat tujhe der talak yad kiya.

Us biyaban mein jab bhi koi jhonka guzra,
Tere anfas ki khusbu se mu'attar guzra,
Mujhko balon mein teri ungliyan mehsus huin,
Aur wo lamha mujhe aakhiri lamha guzra.

Maine us rat tujhe der talak yad kiya.

Door sehra mein kahin geet koi gata tha,
Uski aawaz mein gham mera dhala jata tha,
Mera gham chand-sitare bhi ruk ke sunte the,
Aasman toot kedharti pe bichha jata tha.

Maine us rat tujhe der talak yad kiya.


Nazm: Umeed

Gham-e aalam kaha us se, suna sab ghaur se usne,
Magar usko jo kehna tha, kaha wo aur se usne.

Wo apne sare khawab aksar, mujhe aa kar batata tha,
Tarannum mein meri ghazlein, mujhe ga kar sunata tha.

Wo kehta tha mere she'ron mein uska dil dhadakta hai,
Mere lafzon ke aa'ine mein wo shab bhar sanwarta hai.

Wo kehta tha ke mera sath bahut hi usko bhata hai,
Kare wo zikr koi bhi, mera hi nam aata hai.

Wo ye bola ke mein uska ik achha dost hi bas tha,
Raha chahe jahan bhi wo, taraqqi se meri khush tha.

Wo kehta tha, mein sunta tha, fusun tha uski baton mein,
Wahi sab yad karke ab, jaga rehta hun raaton mein.

Wo ye bole, mein ye bolun, yehi socha mein karta hun,
Mein apne hal ki farda se ye umeed karta hun.


Raat aur Khwab (azad nazm):

Aankh khul gayi meri,
Dekhta hun khidki se,
Sab taraf andhera hai,
Raat ab bhi baqi hai.

Kya ye raat lambi hai,
Un tamam raaton se,
Jo kabhi kabhi tere,
Qurb mein guzari thien.

Tab to mujhko lagta tha,
Raat kat gayi pal mein,
Apni baton-baton mein,
Baat phir bhi baqi hai.

Ab, ke jab mein tanha hun,
Raat jab bhi aati hai,
Der tak akele mein,
Khud se baat karta hun.

Baat hai, to bas teri,
Khwab bhar takallum hai,
Raat bhar shaghal ye hi,
Roz ka ye aalam hai.

Ain ho gaya wo hi,
Jiska mujhko khatra tha,
Hun akela bistar par,
Khwab tha, so bikhra tha.

Reza-reza khwabon ko,
Lafz ki shakal doonga,
Ik nayi ghazal likh kar,
Phir se mein so jaunga.

Khwab kya haqiqat kya,
Kaun ye batayega,
Hogi jab talak ta'beer,
Khwab toot jayega.

Lafz khwab bante hain,
Aarzu simat-ti hai,
Khwab reza hote hain,
Tab ghazal ubharti hai.


Nazm: Firaq (in Chaupai format)

Aksar door chale jate ho,
Mujhko kitna tadpate ho.

Kis se tera zikr karun mein,
Kaise itna sabr karun mein.

Har pal teri yad aati hai,
Mujhko kitna tadpati hai.

Rahti hai aankhon mein moorat,
Sapnon mein teri hi soorat.

Mana kam tha bahut zaroori,
Jana tha teri majboori.

Main to shayad samajh bhi jaun,
Pagal dil ko kya samjhaun.

Meri aik nahin sunta hai,
Milne ke sapne bunta hai.

Ye shayad mera dil hi nahin hai,
Bilkul mere bas mein nahin hai.

Bat nahin chahe kar paun,
Par mein tumko dekh to paun.

Doha:
Chahe ye dil shad ho, chahe rahe udas,
Kuchh bhi ho ye zindagi, rahe tumhare pas.


Nazm: Judai (in Chaupai format)

Tumse juda ho kar ke jina,
Seekh liya jine ka kareena.

Khud apne pe jabr kiya hai,
Kitna hamne sabr kiya hai.

Aansu jab aankhon mein aaye,
Naqli hansi mein hamne chhupaye.

Ashkon ko behne na diya hai,
Logon ko kehne na diya hai.

Ab mujhko teri aadat hai,
Diwano ki si halat hai?

Aalam neend mein dooba hua hai,
Meri aankhon mein neend kahan hai.

Veeran pehlu dekh raha hun,
Tumse kitni door yahan hun.

Sha'yer dil aur us pe aamad,
Halat-e man tu khoobi danad.

Arz mein apna hal karun kya,
Lafzon ko pamal karun kya.

Doha:
Ab to bas ye khwab hai, pahunchun tere pas,
Lamha-lamha chah hai, meelon-meelon aas.

एक नज़्म, (चौपाई-नुमा):

तुमसे जुदा हो कर के जीना।
सीख लिया जीने का करीना॥

ख़ुद अपने पर जब्र किया है।
कितना हमने सब्र किया है॥

आंसू जब आँखों में आये।
नक़ली हंसी में हमने छुपाये॥

अशकों को बहने न दिया है।
लोगों को कहने न दिया है॥

अब मु्झको तेरी आदत है।
दीवानों की सी हालत है॥

आलम नींद में डूबा हुआ है।
मेरी आँखों में नींद कहां है॥

वीरां पहलू देख रहा हूँ।
तुमसे इतनी दूर यहां हूँ॥

शायर दिल और उस पर आमद।
हालत-ए मन तू ख़ूबी दानद॥

अर्ज़ मैं अपना हाल करूं क्या।
लफ्ज़ों को पामाल करूं क्या॥

दोहा:
अब तो बस ये ख़्वाब है, पहुँचूं तेरे पास।
लम्हा-लम्हा चाह है, मीलों मीलों आस॥


Nazm: Bedkhudi

Mashoor Sufi Hazrat Shah Niyaz Ahmad Qadiri Chishti Barelawi (1742-1834) ki Farsi ghazal ki zamin pe (unhin ke ek misre - Man na manam, na man manam - I am not what I am/ What I am, I am not - ko matle' mein ba-taur-e tukda-e girah istema'al karte hue):

Jab se mile ho tum sanam,
Man na manam, na man manam;
Tere khulus ki qasam,
Man na manam, na man manam.

Jab bhi wo yaad aa gaye,
Dil mera dukha gaye,
Aankho mein ashk aa gaye,
Phir bhi aziz unka gham,

Man na manam, na man manam.

Gham se jawan hai zindagi,
Ab bhi rawan hai zindagi,
Uski aman hai zindagi,
Aage badhao phir qadam,

Man na manam, na man manam.

Tere bina na koi hai,
Zindagi khoi-khoi hai,
Yaad teri sanjoi hai,
Uthta nahin baar-e alam,

Man na manam, na man manam.

Haathon mein tera haath hai,
Taaron bhari ye raat hai,
Ik pal mein kainaat hai,
Rehne do ab yehi bharam,

Man na manam, na man manam.

Tujh pe hain jan-o-dil nisar,
Tu hi hai zeest ki bahar,
Aa ke tu dekh ek baar,
Hai tere dam se dam mein dam,

Man na manam, na man manam.

Ik dusare se door hain?
Ahl-e jahan koor hain,
Milte to ham zaroor hain,
Mujh mein hain wo, o unmein ham,

Man na manam, na man manam.

Gulhae-o-gulchin manam,
Kafir-o-ahl-e din manam,
Shayar-o-nuqtachin manam
Che guft ba'd az in, sanam

Man na manam, na man manam.

Farman-guzaar-e man tu-i,
Dar-o-madar-e man tu-i,
Parwar-digar-e man tu-i,
Aasi-o-gunahgar am,

Man na manam, na man manam.

Ab hai ye raz aashkar,
Teri ghazal mein ye nikhar,
Bakhsha hai Usne pehli bar,
'Sagar' utha tu phir qalam,

Man na manam, na man manam.


Back

Unless otherwise stated, the content of this page is licensed under Creative Commons Attribution-ShareAlike 3.0 License