Mutfarriqat

Musallas (Haiku)

Dil ki baat batata hun,
Khud ko jab khush pata hun,
Andar se dar jata hun.

Ishq-o-wafa sab dhokha hai,
Duniya ko samjhata hun,
Par khud samajh na pata hun.

Jazbaton ke sheeshe ko,
Patthar se takrata hun,
Tukde gale lagata hun.

Baith ke tanha ghurbat mein,
Ashk bahata jata hun,
Sabr ko main aazmata hun.

Dil ki sooni nagri mein,
Aas ka deep jalata hun,
Raah mein aankh bichata hun.

Tere bin sari khushiyan,
Gham ki soorat pata hun,
Hansne se katrata hun.

'Sagar' tujh ko bhool gaya,
Usko ye batlata hun,
Apna dil behlata hun.


Ash'ar:

Talab hamko to thi bas dastakon ki,
Mukaffal usne darwaza diya hai.


Har she'r me main la'l-o-guhar dekh raha hun,
Hota hai kya chahat ka asar dekh raha hun.


Jalwagar thi ek-roya sha'yaron ki ye qatar,
Mohtaram sab Aala hazrat, sath mein ye khaksar.


Maine pooch aa'ine se doori ka hasil kya hai?
"Aks tumhara aur bhi gehra mere ander utra hai."


Mana' karta hun main tasweer dekhne se unhein,
Khud wo ho jayenge tasweer jo hairan honge.


Chash bar rah, goosh ba-qadam, dil bar-e tu,
Tere aane ki ik muddat se hai hamko aarzu.


Kisi aashiq ka jigar chak hua hai shayad,
Is sabab aasman bhi lal hua hai shayad.


Faqat ik saz tha ab tak, na cheda tha mujhe jab tak,
Tei aawaz hun mein ab, meri aawaz tu janan.


Har roz ghazal kehta hai tu ek ek se badhkar,
Phir kaise na koi tujhe palkon pe bitha le.


Kya jane kya kaha tha kal 'Sagar' ne chand se,
Aaj aa kar usne mathe pe bosa saja diya.


Hai dad meri da'im, tehsin mustaqil hai,
Ye bhi sahi hai teri, achhi bahut ghazal hai.


Back

Unless otherwise stated, the content of this page is licensed under Creative Commons Attribution-ShareAlike 3.0 License