Ghazals

231. Ghazal:

Tumhare hi liye banda, meri sarkar aaya hai,
Tum aaye ghar mein to jaise, koi tyohar aaya hai.

Tasalli hai ke dono mein se ek to shad-o-khurram hai,
Yahan pa hai khizan to kya, wahan gulzar aaya hai.

Subah se sham tak ham in dino masruf hain aise,
Na din mein aafiyat, na hafte mein itwar aaya hai.

Majal-e tark-e ta'alluq na ho payi kabhi mujh se,
Khayal-e tark-e ta'alluq mujhe sau bar aaya hai.

Chukani thi use qimat usoolon ki to wo apni,
Hatheli par liye sar ko, sar-e darbar aaya hai.

Sanad hai ye hamare daur ke insan ki pasti ki,
Bhare hain hadise ismein, naya akhbar aaya hai.

Tazad-e zindagi hai, kya kahun isko mein ab 'Sagar',
Diye hain gham usi ne, ban ki jo ghamkhwar aaya hai.


230. Ghazal:

Kaun qismat kisi ki leta hai,
Apni auqaat bata deta hai.

Ibn-e Adam se kya ummid karein,
Jo bhi milta hai Khuda deta hai.

Lakh tufan uthayein wo lekin,
Nakhuda naav meri kheta hai.

Hai khud ke zat hi maslak unka,
Doosra kab dikhayi deta hai.

Bahut meherban hai aaj peer-e mughan,
Zehr ka jam bhar ke deta hai.

Baat aa jaye kabhi khud pe to,
Aasman sar pe utha leta

Jan lo ho jo safed-posh koi,
Rahzan hai ya koi neta hai.

Achhe-achhe hasin chehron ko,
Waqt aa'ina dikha deta hai.

Kyun wo sahil ki ret par 'Sagar',
Nam likhta hai mita deta hai.


229. Ghazal:

Mujh par teer chalane wale,
Ham hain zakhm dikhane wale.

Khoon sane hathon se hain wo,
Apna rang jamane wale.

Gharq tu ismein ho jayega,
Zalim, khoon bahane wale.

Kal tu bhi royega tanha,
Mujhko aaj rulane wale.

Andhon ki ye basti hai, ham,
Aa'ina dikhlane wale.

Pani ke hain karobari,
Ghar-ghar aag lagane wale,

Rok na paye parwazon ko,
Zanjeerein pehnane wale.

'Sagar' tu bhi seekh le aakhir,
Kuch to dhang zamane wale.


228. Ghazal:

(Ghalib se ma'zarat ke sath)

Dard badh kar dawa nahi hota,
Zakhm rahat-faza nahin hota.

Do qadam badhte tum meri janib,
To kabhi fasla nahin hota.

Pesh aati hai koi majboori,
Aadmi khud bura nahi hota.

Zindagi khud sanwaar deti hai,
Jin ke ghar aa'ina nahi hota.

Aaj logon se mooh churata hun,
Raz tumse kaha nahin hota.

Dost gar mujhse na dagha karte,
Zeest se saamna nahin hota.

Tumse milne mein tab hi aata hun,
Jab koi doosara nahin hota.

Sach bataun ya phir rahun sakit,
Mujhse ye faisala nahi hota.

Tum bhi 'Sagar' se pyar karte ho,
Mujhse ye kyun bhala nahi hota.


227. Ghazal:

Chaha tha jaisa dilbar, waisa mila nahin hai,
Ik bat keh raha hun, shikwa-gila nahin hai.

Tumne kabhi junun mein jo chak kar diya tha,
Waisa hi hai gireban, maine sila nahi hai.

Jab ji kiya sanwara, jab ji kiya to dhaya,
Ye dil hai mera saheb, qasr-o-qila nahin hai.

Achhe se soch lo tum, ye umra ka safar hai,
Do char din ka hamdam, ye silsila nahin hai.

Ik umra apni beeti, khun-aab seenchte hain,
Ghuncha ye pyar ka par, ab tak khila nahin hai.

Zer-o-zabar tumhari, hone lagi kyun duniya,
Mera dil dhadak raha hai, koi zalzala nahi hai.

Sach bat bolta hai, 'Sagar' ko sun ke dekho,
Hai Haq-numa wo shayar, koi diljala nahin hai.


226. Ghazal:

Safar ho jaisa bhi, aakhir tamam hota hai,
Naye safar ka magar intezam hota hai.

Madaar tum ho meri zeest ki musafat ka,
Milun mein jis se bhi, ik tumse kam hota hai.

Mein thak ke aata hun ghar jab kadi mashaqqat se,
Tumhare lab ka tabassum inam hota hai.

Nahin hai pehle si raghbat jo darmiyan phir bhi,
Wo ab bhi milte hain, baham salam hota hai.

Tumhare bare mein ash'ar jab mein kehta hun,
Tab kahin ja ke mukammal kalaam hota hai.

Agar wo kuchh nahin lagta to itni kurbat kyun?
Sawal aik hi mujhse mudam hota hai.

Suna hai ghair ki mehfil mein apne charche hain,
Hamara zikr wahan subh-o-sham hota hai.

Hayat uski hai is darja mutahhid tumse,
Tumhare nam se 'Sagar' ka nam hota hai.


225. Ghazal:

Raz tumse ayan ho gaya,
Ghair tak razdan ho gaya.

Naz se usne dekha mujhe,
Aur dushman jahan ho gaya.

Jan-supari ki parwah nahin,
Aaj ji ka ziyan ho gaya.

Shayari ka shaghal dekhiye,
Mere gham ki zuban ho gaya.

Khaksari mili ishq mein,
Mein kahan tha kahan ho gaya.

Tune jo kuchh bhi mujh se kaha,
Mere dil mein nihan ho gaya.

Teri nisbat se shayar bana,
Aur fakhr uz-zaman ho gaya

Kal talak tha wo naseh mera,
Aaj pir-e mughan ho gaya.

Tere she'ron se 'Sagar' miyan,
Sabt dil pe nishan ho gaya.


224. Ghazal:

Jab mujhe kash-ma-kash mein pata hai,
Dil hi khud raasta dikhata hai.

Dekh kar tumko ye laga mujh ko,
Janmon-janmon ka jaise nata hai.

Hoga behtar samajh lein aap khud hi,
Waqt sabko sabaq sikhata hai.

Aapka mein lihaz karta hun,
Dhang mujhe doosra bhi aata hai.

Jab khafa hota hai wo sheerin-zaban,
Be-tarah meri ghazlein gata hai.

Badguman ho ke bhi wo jan-e ada,
Jab bhi milta hai, muskurata hai.

Jane kya keh diya use maine,
Dekh kar muhn ajab banata hai.

Yad uski satati hijr mein hai,
Aur wo wasl mein satata hai.

Khairiyat pooch le tu rasman hi,
Kya bhala ismein tera jata hai.

Har ghadi zindagi ki shamma ka,
Qatra-qatra pighalta jata hai.

Us se rishta hi kya hai ab 'Sagar',
Lab pe kyun nam uska aata hai.


223. Ghazal:

Phir se aaya khayal hijrat ka,
Tum na karna malal hijrat ka.

Sath jab tak raha, wo door rahe,
Ab karenge sawal hijrat ka.

Muddaton ba’d aaj eid hui,
Aaj nikla hilal hijrat ka.

Sun ke rukhsar pe raqibon ke,
Jaisa bikhra gulal hijrat ka.

Qurb ka hijr tumne dekha hai,
Ab ke dekho wisal hijrat ka.

Meri baton pe na yaqin karo,
Khud hi dekho kamal hijrat ka.

Aur ulfat nikharti jati hai,
Ye hai turfa jamal hijrat ka.

Har ghadi kyun dikhate rehte ho,
Mujhko ‘Sagar’ jalal hijrat ka.


222. Ghazal:

Tumhara kya hun samjhao,
Wagarna apne ghar jao.

Agar is bazm mein apna,
Samajhte ho to samjhao.

Nazar hai muntazir kab se,
Kabhi chehra dikha jao.

Bada manoos chehra tha,
Use phir se bula lao.

Hai jo sach wo hi kehta hun,
Mujhe aankhein na dikhlao.

Bahana kar ke koi bhi,
Zara ghar se nikal aao.

Khatam hone ko hai ye shab,
Chalo ab man bhi jao.

Lo ab hai aapki bari,
Jo socha tha wo kar jao.

Hai uska dil bahut nazuk,
Na apne zakhm dikhlao.

Wo phir se rooth baitha hai,
Use phir se mana lao.

Miyan ye bhi ghanimat hai,
Abhi zinda ho, muskao.

Ana hai aapki kamsin,
Use mat beech mein lao.

Kaha tha tumse ai 'Sagar',
Mahaz soorat pe mat jao.


221. Ghazal:

Kafi hai ye karam, koi ho ho, na ho na ho,
Main aur mera sanam, koi ho ho, na ho na ho.

Ta-umr sath kisne diya hai jahan mein,
Khao na tum qasam, koi ho ho, na ho na ho.

Chehre se dost ke na uthao naqab tum,
Rehne do ye bharam, koi ho ho, na ho na ho.

Mafiha ka khayal satata nahi mujhe,
Thokar mein hai iram, koi ho ho, na ho na ho.

Duniya se door tanha, sanwara karenge ham,
Zulfon ke tere kham, koi ho ho, na ho na ho.

Pehlu mein hain raqib ke, phir bhi janab ki,
Aankhon mein hai sharam, koi ho ho, na ho na ho.

'Sagar' sambhalo khud ko, kyun tum bat-bat pe,
Karte ho aankhein nam, koi ho ho, na ho na ho.


220. Ghazal:

Kya socha tha aur kya ho raha hai,
Shehr insaniyat kyun kho raha hai.

Bahut khush-posh hun bahar se yun to,
Mere ander bhi koi ro raha hai.

Raha khamosh kyun sach jan kar bhi,
Malal iska bahut mujh ko raha hai.

Abhi kaati hai fasl ik nafraton ki,
Zehar ke beej phir se bo raha hai.

Mein soya tha magar aankhon mein meri,
Tamam raat phirta wo raha hai.

Ubalta hai lahu akhbar padh kar,
Mera blood-pressure lekin low raha hai.

Kaho manzil se ab khud aaye chal kar,
Yahan thak kar musafir so raha hai.

Wo jisne peeth mein ghonpa tha khanjar,
Wohi zakhmon ko 'Sagar' dho raha hai.


219. Ghazal:

Hamko saza mili hai kisi ke gunah ki,
Ab bas hua rahi nahi himmat nibah ki.

Mujrim mujhe karar diya, na-karda jurm ka,
Tumne liye bina hi shahadat gawah ki.

Yak-tarfa kar ke faisla, us par amal kiya,
Na jane kis raqib se tumne salah ki.

Bandanawaz aap hi barham agar hue,
Phir to koi jagah hi nahi hai panah ki.

Har bat pe janab hain khane ko daudte,
Surat nahin nikalti koi rasm-o-rah ki.

Kab jane khatm hoga ye, barson ka intezar,
Main hun koi imarat gumgashta rah ki.

Saghar ke, mey ki, jam ki, darkar hai unhein,
Hamko talab hai saqi teri ik nigah ki.

Muflis-o-be-nawa sa nazar aaun mein, wale,
Tabi'at hai maine pai kisi badshah ki.

'Sagar' ko ham hain jante, wada-shikan hai wo,
Hamse karo na bat bhi us ru-siyah ki.


218. Ghazal:

Ik sada goonji thi uske bad khamoshi rahi,
Hosh mein dekha tumnein, ta-umr be-hoshi rahi,

She'r ke surat musalsal tujhko hi socha kiye,
Rat bhar tere khyalon se ham-aaghoshi rahi.

Be-irada mein to guzra tha wahan se daf'atan,
Jane kya uski gali mien aaj sar-goshi rahi.

Kar gaya sarmast mujhko zindagani ka nasha,
Rooh se khinchiti rahi aur khoob mey-noshi rahi.

Ekhlaqan ab bhi milte rehte hain ahbab se,
Na hi hai pehle se qurbat, na garm-joshi rahi.

Aaya hun darbar mein Uske liye dil ki murad,
Shahon ki dastar ki jis dar pe pa-poshi rahi.

Zikr us gul-ru ka 'Sagar' bas kiya tha aik bar,
Meri ghazlon mein phir uske bad gul-poshi rahi.


217. Ghazal:

Samjhe hi nahin tum bhi kharaabat hamari,
Ashkon se bayan hoti hai har bat hamari.

Rehte rahe khud apne hi ghar ban ke muhajir,
Mumkin na hui khud se mulaqat hamari.

Kehte rahe she'ron mein khud apni kahani,
Tumne na suni aa ke hikayaat hamari.

Na aah, na giriya, na hi na'ale, na sadayein,
Pahunchegi na tum tak koi saugat hamari.

Har gam pe mushkil hai to har aan musibat,
Ma'amul hui jati hai aafaat hamari.

Ho tum jo mere sath to mein shah-e jahan hun,
Mumtaz hai tumse hi amaraat hamari.

Hamne ye suna jab se ke ghar aaoge milne,
aankhon mein kata karti hai har rat hamari.

Sene se na 'Sagar' ke utha koi bhi badal,
Bin barse guzar jayegi barsat hamari.


216. Ghazal:

Jab apne darmiyan kisi ka dakhal hua,
Phir uske bad koi bhi masl'a na hal hua.

Bil-aakhir tum bhi duniya ki baton mein aa gaye,
Kuchh bhi rifaqaton pe na apni amal hua.

Ik bar tum jo mere tasawwur pe chh gaye,
Har she'r uske bad phir jan-e ghazal hua.

Tapka kabhi jo aankh se maa ki to al-gharaz,
Har qatra mere waste Ganga ka jal hua.

Kar leta hun tumhari jafaon ko zabt mein,
Tum kya karoge gar kabhi radd-e amal hua.

Karta raha ummid mein khilaf-e imkanat,
Tha jiska andesha mujhe wahi dar-asal hua.

Ik bar phir na-ahlon ko ohde diye gaye,
Ik bar phir nizam mein radd-o-badal hua.

Hai Id meri munhasir ik deed par teri,
Mere liye hilal teri abru ka bal hua.

Hai tund bahut aaj teri lehron ka mizaj,
'Sagar' tere sukut mein kiska khalal hua.


215. Ghazal:

Tum ho jafa-parast yahan jante hain sab,
Hamko pata hai mehr mein sabse bada hai Rab.

Jo hai shikayat tumse, tumhin se kahenge ham,
Hamne kisi ke samne khole nahi hain lab.

Pehle thi be-takallufi, behad khulus tha,
Abke mile to aapka kuchh aur hi hai dhab.

Karta hun apne shauq se har kam ustwar,
Khwahish hai nam ki na hi inam ki talab.

Jane se pehle tumko mein ik bar dekh lun,
Itna hi bas hai mere yahan aane ka sabab.

Arzi laga ke baithe hain ham bhi huzur mein,
Ummid to hai par wo milenge na jane kab.

Tum aa gaye ho jab se tasawwur mein, al-gharaz,
Har nazm bemisal hai, har she'r hai ghazab.

Mohtat itna rehta tha 'Sagar' tu har ghadi,
Phir bhi lagi hai kaise tere dil mein ye naqab.


214. Ghazal:

Karun ab main hal-e pareshan mein kya,
Koi mashwara hai aapke dhyan mein kya.

Chhat pe dana rakha hai jyun ka tyun,
Wo parinda hai ab tak udaan mein kya.

Umr ka bhi nahin lihaz tumhein,
Seekha yehi hai khandan mein kya.

Apne aqide ki bat hai, warna,
Din mein kya hai, iman mein kya.

Adna si mangi hai nishani gulshan ki,
Khar bhi ab nahin baghan mein kya.

Aajkal hamse wo hai barham se,
Koi khata ho gayi hai shan mein kya.

Dil pe kyun kufl jade baithe ho,
Koi sauda nahin dukan mein kya.

Mustahaq jiske ho, wo mila hai tumko,
Jodiyan banti nahin aasman mein kya.

Harek bat pe sau-sau jawab hain uske,
Aaj 'Sagar' hai kuchh ufaan mein kya.


213. Ghazal:

Faaslon se bhi tumhi ko umr bhar dekha kiye,
Khar ban kar bhi chaman mein dam-ba-dam mehka kiye.

Ho gayi taskin tumko shad aakhir dekh kar,
Khwah-ma-khwah ham aaj tak aghiyar ko kosa kiye.

Meri na-karda gunahi ki mujhe de kar saza,
Kyun khade ho sar nidamat mein tum ab neecha kiye.

Aap aaye milne to hamko nahin aaya yaqin,
Aap hi ke ru-ba-ru ham aapko socha kiye.

Meri khamoshi ko kamzori samajhte ho magar,
Bat nikli to na phir jayegi bin ruswa kiye.

Rah-e gumkarda hi jaise phir muqaddar ho gayi,
Ik dafa bhatke the ham, phir umr bhar bhatka kiye.

Aapki yadein sanjo kar ham bhi shayar ho gaye,
Dard boya tha zehen mein, ashk se seencha kiye.

Har kahani mein meri hai zikr tera lazmi,
Dastan hai na-mukammal bin tera charcha kiye.

Kya yehi hai aatishi naghmat kehne ki wajah,
Dil mein jo shole hain 'Sagar', she'r mein dehka kiye.


212. Ghazal:

Kar lijiyega hamse, hisab jitne hain,
Sawal utne na honge, jawab jitne hain.

Ye sab jaagti aankhon ke manazir hain,
Utni neendein kahan hain, khwab jitne hain.

Yahi hai ishq, yahi husn, yahi ham hain,
Hamari dastan se pur hain, nisab jitne hain.

Ye duniya mehez ik kulzum-e tamasha hai,
Hamari hasti hi kya hai, hubab jitne hain.

Dilon mein bughz, aur hai ba-zahir hamdardi,
Ji to karta hai utha dun, naqab jitne hain.

Hamara shehr hai hubb-e watan ka matwala,
Hamare ghar se uthe, inqilab jitne hain.

Kisi se kuchh nahin matlab mujhe, magar phir bhi,
Dhoondh lete hain mera ghar, azaab jitne hain.

Hamein bhi tere bina kuchh na chahiye 'Sagar',
Tum bhi chahoge hamin ko, kharab jitne hain.


211. Ghazal:

Duniya ne mujhko jitna bhi samjha, samajh liya.
Maine bhi zindagi ka hai maqsad samajh liya.

Ehsan tang-hali bhi mujh par ye kar gayi,
Mukhlis hai kaun mera ye behtar, samajh liya.

Na tum rahe wo tum, au' na main hi wo main raha,
Dono ne aik-duje ko baham, samajh liya.

Koi bura raha hi nahin phir jahan mein,
Pehchana apne aap ko, khud ko samajh liya.

Aghiyar ko nazar se hi pehchanta hun mein,
Tumne mujhe kya itna hi nadan samajh liya.

Rishta baraye nam hai, ab qurbatein kahan?
Kitna bhi nasamajh hun mein itna samajh liya.

Taqat ho tum hi meri par kamzori bhi to ho,
Hun natawan tumhare bina mein, samajh liya.

'Sagar' to keh raha tha faqat apna hal-e dil,
Ahl-e adab ne kyun use shayar samajh liya.


210. Ghazal:

Mukammal mein nahin harghiz agar tu hi na hasil ho,
Tujhe mein dhoondhta hun, tu mere andar na shamil ho.

Mukhota sa koi chipka liya hai maine chehre par,
Ki bahar ki koi bhi zalimana sheh na dakhil ho.

Mein aksar khamoshi apna ke khud se bat karta hun,
Kisi se bat karne pe mera jab dil na ma'ail ho.

Kisi apne se ulfat ke do lafzon ka mein talib hun,
Khudaya teri duniya mein koi mujh sa na sa'ail ho.

Zehr ke teer jaise lafz hon, lehje mein talkhi ho,
Zuban bhi tursh ho to dil bhala kyunkar na ghayal ho.

Tumhin ko dekh ke jeeta hun, tum pe jan nichhawar hai,
Karun mein jan kyun sadqe agar tum sa na qatil ho.

Tajurbon ka sabaq ye hai, karein ye ahd mil kar ham,
Ana ka darmiyan apne koi parda na ha'ail ho.

Nikalna khud se mumkin hi nahin is behr-e hasti se,
Chalo lekar jahan koi na 'Sagar' ho, na sahil ho.


209. Ghazal:

Mustaqil khamoshi hai par sath hai,
Andar-ander ho rahi barsat hai.

Ranj-o-gham, andoh, aur yas-o-alam,
Aajkal mazmoon ki ifrat hai.

Tum nahi to koi bhi apna nahin,
Kehne ko to poori kainat hai.

Din to guzra hai azaabon mein mera,
Katne ko ab ye poori rat hai.

Mere hothon ko ana ne sil diya,
Tum hi keh do dil mein jo bhi bat hai.

Meri duniya mukhtasar si hai jahan,
Aik tum ho, aik meri zat hai.

Kar rahe hain lamha-lamha zaya ham,
Waqt bhi baitha laga ke ghat hai.

Hai agar tum se muqabila mera,
Jeet se behtar meri phir maat hai.

Karta ja unse karam ki iltija,
Teri 'Sagar' bas yehi auqat hai.


208. Ghazal:

Mein tujhko kahan rashq-e qamar dekh raha hun,
Hota hai kya chahat ka asar dekh raha hun.

Mumkin hi nahin mein tujhe jate hue dekhun,
Mushkil hai bahut phir bhi magar dekh raha hun.

Jis rah pe tum sath hua karte the mere,
Mein ab bhi wahi raahguzar dekh raha hun.

Baitha hua hun mein bhi to mehfil mein tumhari,
Rukti hai kahan ja ke nazar dekh raha hun.

Jo bat kehne pe meri kaati gayi zaban,
Dohrata wahi harek bashar dekh raha hun.

Kya teri berukhi ne mere yar kar diya,
Sad chak hue qalb-o-jigar dekh raha hun.

Kya ho gaya hai ghar ko tumhare bina janan,
Deewar-o-daricha-o-dar dekh raha hun.

'Sagar' ne apna pesha kya bilkul badal liya,
Har she'r mein ab la'l-o-guhar dekh raha hun.


207. Ghazal:

Wus'at-e dil ko jahan, aur kul jahan ko dil kaha,
Mushkilon ko bhi kahan hamne kabhi mushkil kaha.

Sabr, ta'at, aur kana'at, pak dil, raushan zamir,
Duniya ne aisi hi khubi walon ko kamil kaha.

Jism hi kya rooh bhi zakhmi thi phir bhi dekhiye,
Zabt ki ye intiha khud ko nahin bismil kaha.

Dekh kar mujhko tumhare ishq mein yun dam-ba-khud,
Doston ne duniya-o-mafiha se ghafil kaha.

Zulf nagin, teer mizgan, aur tani abru kaman,
Kya ghalat tha maine gar us shokh ko qatil kaha.

Aa gaya jab bhi tasawwur mein tera chehra nazar,
Khilwaton ko teri yadon ki hasin mehfil kaha.

Bazm ke aadaab ki mujhko khabar hi na rahi,
Tumko apna keh diya, sabne mujhe jahil kaha.

Mang kar tumko mili hai hai ye hukumat khalq se,
Aur tumne khalq ko hi be-nawa sa'il kaha.

Zindagi mein jisko jaisa samjha waisa keh diya,
Na kaha batil ko Haq, Haq ko nahin batil kaha.

Thi tamanna bas yahi ho sath apna mustaqil,
Nam apna rakh liya 'Sagar' tumhein sahil kaha.


206. Ghazal:

Khwahishein surkhab ki soorat milin to par chuna,
Rah takti aankh ne umeed ka manzar chuna.

Is tarah rakkha tumhari khud-aarai ka bharam,
Maine khud hi tumko apne aap se behtar chuna.

Manzilon tak le ke ja sakti thi ik aasan rah,
Rasta jo pur-khatar tha maine wo badh kar chuna.

Pa liya raz-e Ana al-Haq, jab kisi Mansur ne,
Tuhfa-e dar-o-rasan bhi usne phir hans kar chuna.

Na koi ahbab, munis, na koi ahl-o-ayal,
Tumko maine sirf aur sirf apne hi dam par chuna.

Khud ko kab rakkha hai tanha, zindagi ki rah mein,
Is safar mein hamne teri yad ka lashkar chuna.

Khojta tha jisko bahar muddaton se rat-din,
Kya khabar thi mere hi dil mein hai usne ghar chuna.

Chun liye mazmun sabne, barg-o-gul-o-rang-o-bu,
Maine 'Sagar' shayari mein zeest ko aksar chuna.


205. Ghazal:

Aap hi chahiye, aap sa bhi nahin,
Hai kisi aur se wasta bhi nahin.

Aapne bazm mein kyun nazar pher li,
Aapka nam maine liya bhi nahin.

Waqt-e rukhsat to sau-sau dilase diye,
Jab mile to koi tazkira bhi nahin.

Dil hi toota hai mera, to gham na karo,
Hai ye itna bada saniha bhi nahin.

Aage badhna bhi dushwar hai hamsafar,
Laut kar jane ka raasta bhi nahin.

Dil kisi taur mera behalta nahin,
Aur agar poochiye kuchh hua bhi nahin.

Meri ghazlon ko sun ke wo kehne laga,
"Kuchh mujhe chhod kar sochta bhi nahi."

Jiski chahat mein sari umar kat di,
Ik nazar wo mujhe dekhta bhi nahin.

She'r padh kar hi 'Sagar' ko pehchan lo,
Apne bare mein wo bolta bhi nahin.


204. Ghazal:

Ho gaya hun is qadar manoos mein amraz se,
Lutf sa aane laga hai tabiyat-e nasaz se.

Khud ko mein tanha bahut pata hun sabke darmiyan,
Shayad tu ai hamnashin waqif nahi is raz se.

Kar diya hai rat-din ke zabt ne goonga mujhe,
Chaunk sa padta hun ab khud apni hi aawaz se.

Hai ajab si mausiqi mere dard-e dil mein, mutriba,
Ik sada dilkash si aati hai shikasta saz se.

Sharm, dehshat, ya jhijhak, hain sab baja, lekin huzur,
Kaise bhi dije raza, ghamzon se ya alfaz se.

Neki-o-bad, 'Nur'-o-tariki, hain dono lazmi,
Dono mein tafriq bhi hai deher ke aaghaz se.

Dosti mein jan ki bhi tune na parwah ki,
Tu hai 'Sagar' mo'atbar, apne isi andaz se.


203. Ghazal:

Ishq aur dil ki meri bimariyan apni jagah.
Lekin hain kuchh aur zimmedariyan apni jagah.

Ghair-hazir hi sahi par rooh-o-tan shamil hun mein,
Fasle aur waqt ki dushwariyan apni jagah.

Haif, mein bechun shikam ke vaste apna zamir,
Hain abhi qayam meri khuddariyan apni jagah.

Bedakhal kar ke hamare wajib haq se har taraf,
Shan se baithi hain tarafdariyan apni jagah.

Meri majboori hai mein chahunga phir tera bhala,
Ai adu hain teri sab badkariyan apni jagah.

Aao pehle kuchh sulah ki bat to chhedein baham,
Ghazwa-o-hamle ki sab taiyaariyan apni jagah.

Gar ho munis waqa'i, tumko samajhna chahiye,
Ghaflatein apni jagah, bedariyan apni jagah.

Kuchh faraiz chara-o-nachar lazim hain tujhe,
Berukhi teri baja, bezariyan apni jagah.

Aap se milne ko mein aaya hun sabko chhod ke,
Dosti pehle hai, rishtedariyan apni jagah.

Tera mera ai adu koi tawazun hi nahi,
Apni jagah aatish-fishan, chingariyan apni jagah.

Ik taraf 'Sagar' hai tere, ik taraf sansar hai,
Sadgi apni jagah, hoshiyariyan apni jagah.


202. Ghazal:

Hawa-e shokh ne shamma bujha di,
Teri tasveer tab hamne saja di.

Jahan par rehti thin yadein sukun se,
Ye ik basti thi jo tumne jala di.

Tumhara ho ke kehlaun kisi ka,
Ye kiske jurm ki mujhko saza di.

Uthai aahni deewar jo bhi,
Hamre aansuon ne sab gala di.

Hamara maazi tha us se wabasta,
Ye kisne aa ke imarat gira di.

Kiya hai zikr kuchh qasid ne aisa,
Ki phir se bujhte sholon ko hawa di.

Wo hi ghazlon mein hai 'Sagar' numayan,
Tamanna deed ki tune badha di.


201. Ghazal:

Jab zindagi ne gham ka mujhe silsila diya,
Ik tum hi the wo jisne mujhe hausla diya.

Tanha badal sakoge na duniya ka tum riwaj,
Aksar mujhe hai logon ne ye mashwira diya.

Apnai rah-e Haq to phir, ye maujiza hua,
Badh kar samandaron ne bhi khud raasta diya.

Harf-e khata the jiase ke ham zeest mein teri,
Likh kar hamara nam jo tune mita diya.

Tang aa gaye the gham ke andheron se is qadar,
Hamne bara-ye raushni ghar hi jala diya.

Deewar si khadi thi ana darmayan mein,
Jisko nafees lams se tumne gira diya.

'Sagar' hai sirf talkhi hi tere kalaam mein,
Tune ghazal suna ke mera sar phira diya.


200. Ghazal:

Aansu chhupana aa gaya,
Ab muskurana aa gaya.

Tum aaye meri bahon mein,
Sara zamana aa gaya.

Ghunche khile hain, kya unhein,
Wa'da nibhana aa gaya.

Nazrein chura ke bazm mein,
Nazrein milana aa gaya.

Ab aap se milna jo tha,
Kar ke bahana aa gaya.

Khud apne zabt ki sarhadein,
Hamein aazman aa gaya.

Ab hai mera tanha safar,
Tera thikana aa gaya.

Mera nam likh ke ret pe,
Unko mitana aa gaya.

Mere she'ron mein tere zikr se,
'Sagar' khazana aa gaya.


199. Ghazal:

Itna bhi mere vaste ehsan bahut hai,
Milne ka tere dil mein bhi arman bahut hai.

Dil ne tamam umr ki milne ki aarzu,
Ab tu mili to dekh ke hairan bahut hai.

Qabiz hai poore taur se mere dil pe teri yad,
Ik chhote se ghar mein yehi mehman bahut hai.

Har bar yaqin karta hai wa'ade pe tumhare,
Ab kya karun ke dil mera nadan bahut hai.

Insaniyat ab sirf haivanon mein bachegi,
Haivaniyat karne ko to insan bahut hai.

Padhiye kitab ishq ki, duniya-o-jahan ki,
Ghalib ka mere vaste diwan bahut hai.

Sach bolne wala wo ik banda hai Khuda ka,
'Sagar' ke vaste yehi pehchan bahut hai.


198. Ghazal:

Chahta mein to yun hi mein bhi guzara karta,
Door se baith ke bas tumko nihara karta.

Hota mumkin to mere dil ki badi khwahish thi,
Chand ko la ke tere mathe ka tara karta.

She'r ke parde mein yun hota tasawwur mein tere,
Baitha har roz khadd-o-khal sanwara karta.

Dal di hain mere paaon mein hasin zanjeerein,
Kya rihai ka giriftar tumhara karta.

Zabt kar lena harek zulm muqaddar hai mera,
Aur kya iske siwa ishq ka mara karta.

Jo pata hota mujhe pehle se to main khud hi,
Ishq ke khel mein hardam mein hi hara karta.

Roz-ba-roz ghazal kehna hai ik majboori,
Dil ka 'Sagar' mein kahan bojh utara karta.


197. Ghazal:

Zara si der ruk jao, mujhe kuchh aur kehna hai,
Abhi ghar se na tum jao, mujhe kuchh aur kehna hai.

Tumhare aane se pehle sabhi kuchh soch rakkha tha,
Magar tum pehle batlao, mujhe kuchh aur kehna hai.

Rahengi dooriyan jab tak, ghalat-fehmi bhi mumkin hai,
Mere pehlu mein aa jao, mujhe kuchh aur kehna hai.

Mere bare mein tumne jo suna logon se, jane do,
Tum apni rai batlao, mujhe kuchh aur kehna hai.

Zaruri kya hai jo kehna hai usko khud kahun tumse,
Kabhi khud bhi samajh jao, mujhe kuchh aur kehna hai.

Harek jabir, harek zalim, harek sarkash ke aage tum,
Kaho, harghiz na ghabrao, "mujhe kuchh aur kehna hai."

Jo kehna chahta hun mein, ye uska ek hissa hai,
Jo thoda aur thahar jao, mujhe kuchh aur kehna hai.

Rahe jab tak yahan par tum, rahi dil ki mere dil mein,
Ai 'Sagar' laut ke aao, mujhe kuchh aur kehna hai.


196. Ghazal:

Sharik-e tohmat-e mehfil nahin hun,
Mein hazir hun magar shamil nahin hun.

Agarche hath mein khanjar hai mere,
Mein khud maqtul hun, qatil nahin hun.

Hun sab ke dard ki shiddat se waqif,
Baraye nam dard-e dil nahin hun.

Nahin karti wafa duniya kisi se,
Samajhta khoob hun, ghafil nahin hun.

Mein kaise dard ko she'ron mein dhalun,
Abhi puri tarah bismil nahin hun.

Jawab unko mein dunga hashr mein ab,
Zuban rakhta hun mein, bujhdil nahin hun.

Muhabbat se mujhe apna bana lo,
Mein aakhir itna la-hasil nahin hun.

Nazar mujh se churatein hain wo 'Sagar',
Mein jaise deed ke qabil nahin hun.


195. Ghazal:

Use sara zamana chahiye tha,
Mujhe bas aashiyana chahiye tha.

Tumhein mujh se thi gar koi shikayat,
Tumhein mujhko batana chahiye tha.

Jo karte the muhabbat is qadar tum,
Kabhi us pe jatana chahiye tha.

Mujhi pe aati thi hir-phir ke tohmat,
Unhein zad mein nishana chahiye tha.

Bhale phir umra kaate wo qafas mein,
Parinde ko to dana chahiye tha.

Agar naadim tha wo apne kahe pe,
Tumhein bhi man jana chahiye tha.

Jazak Allahu khairyun, mutma'in hun,
Mujhe ye hi khazana chahiye tha.

Badi dilchasp thein 'Sagar' ki ghazlein,
Use phir se bulana chahiye tha.


194. Ghazal:

Aamad ko us rafiq ki hardam hai intezar,
Ji chahta yahi hai ke aaye wo bar-bar.

Dil chahiye to dijiye qimat ba-dam-e dil,
Sauda naqad ka hai yahan chalta nahi udhaar.

Dast-e shifa se kijiye mera bhi kuchh ilaj,
Ham bhi to hain mariz, zara dekhiye bukhar.

Pita nahi hun jam se, maykash nahin hun mein,
Aankhon se kabhi pi thi jo uska hai ye khumar.

Aana bahut hai aapka mere waste janab,
Chalta nahi hai panch-sau, bekar hai hazar.

Hasrat hai chand ru-ba-ru dekhun mein chand ke,
O din ko milne wale kabhi raat bhi guzar.

Kehta nahin zaban se magar sach maniye huzur,
Hai teri ik nigah ka 'Sagar' ummidwar.


193. Ghazal:

Hua hai jab se ayan mujh pe lutf-e tanhai,
Phir uske bad teri yad bhi nahin aayi.

Harek gul ke labon pe hain, aah ke shole,
Chaman meri kahani ye kis ne dohrai.

Fusun hai koi takallum mein, ya ke jadu hai,
Samajh mein aa gai jo bat tumne samjhai.

Qata' hi kar do ta'alluq، aur apne ghar baitho,
Agar hai itna hi tumko, jo khauf-e ruswai.

Uda ke neend meri shab ko be-khabar sona,
Wo jaagna mere pehlu mein le ke angdai.

Karo na sarf madah mein inhein razilon ki,
Harek harf giran hai, hai daur-e mehngai.

Zara si der mein kya ho gaya zamane ko,
Jo the nigahon ke markaz, bane tamashai.

Nazara dekhte rehte hain, log sahil se,
Samajhta kaun hai 'Sagar' tumhari gehrai.


192. Ghazal:

Bahut dekhi tumhari khush-numai,
Magar chhup na saki teri sachhai.

Musalsal main raha hun justju mein,
Kahin par din kahin par shab bitai.

Raha mukhlis zamane ke liye tu,
Rahi dar-parda teri be-wafai.

Mujhe ab ho gai mehfil se wehshat,
Mujhe raas aa gayi hai ab tanhai.

Jama hain log sab hadd-e nazar tak,
Koi insan nahin deta dikhai.

Qubul hain mujhko meri sab khataein,
Karo ab tum bhi to sulah-safai.

Ghazal mein dard bharta hun mein 'Sagar',
Tumhari dad hai meri kamai.


191. Ghazal:

Hanste-hanste udas ho baitha,
Tha haqiqat, qayas ho baitha.

Usko andaza tashnagi ka nahin,
Poore dariya ki pyas ho baitha.

Jam bhar-bhar ke de ke auron ko,
Khud wo khali gilas ho baitha.

Badan uska tha aatishi pehle,
Aatishi ab libas ho baitha.

Khaye logon se is qadar dhoke,
Ab mein mardum-shanas ho baitha.

Aap ko dekh kar gharib-nawaz,
Khud-ba-khud iltimas ho baitha.

Wo jo muddat se tera banda tha,
Kyun bhala na-sipas ho baitha.

Aaj dekha jo rang 'Sagar' ka,
Ai'timad be-asas ho baitha.


190. Ghazal:

Aaj un se mil ke ye ghazab hua,
Jo nahin socha tha maine, sab hua.

Khwab mein bhi aap aayenge nahin?
Ye bhala kya aap ka matlab hua.

Kal kiya usne ik adna-sa sawal,
Aaj bazm-e shah mein talab hua.

Aaye ho mayyat pe meri sogwar,
Chhod di thi aas maine, tab hua.

Bech di jisne khudi baazar mein,
Sabse ooncha uska hi mansab hua.

Mujhse tum poocho na gham ki dastan,
Kya hua, kyunkar hua aur kab hua.

Ishq ki batein hain kul ash'aar mein,
Shayari ka ishq hi mazhab hua.

Mujhse wo 'Sagar' mile ma'mul mein,
Kuchh na mere waste ajab hua.


189. Ghazal:

Ma'ani-i maqsood, kahan sab nikal leta hai,
Apne mafad ka matlab nikal leta hai.

Mein sirf Us se musibat bayan karta hun,
Har musibat se mujhe Rab nikal leta hai.

Rahun mein jitna bhi mohtat us se bil-aakhir,
Ulajhne ka wo naya dhab nikal leta hai.

Agarche ladta wo rehta hai mujh se roz magar,
Bahana milne ka har shab nikal leta hai.

Pyar gar aata hai usko kabhi jo hadd se siwa,
Wo karke band aankhein lab nikal leta hai.

Ho dil mein keena to din-o-dharam mein jhagde hain,
Sulah ka rasta bhi mazhab nikal leta hai.

Subh se sham talak rehta hai wo sar-gardan,
Ghazal ka waqt jane kab nikal leta hai.

Ye shayari to bahana hai tera ai 'Sagar',
Ghubar dil ka tu jab-tab nikal leta hai.


188. Ghazal:

Mashoor Sufi Hazrat Shah Niyaz Ahmad Qadiri Chishti Barelawi (1742-1834) ki ghazal (Ishq mein tere koh-e gham, sar pe pilya jo ho so ho) ki zamin pe:

Dil tumko hamne de diya, socha nahi jo ho so ho,
Dushman jahan bana liya, parwah nahi jo ho so ho.

Yun to hasin pehle bhi, guzre nazar ke samne,
Dil mein tum hi sama gaye, jana nahi jo ho so ho.

Mehshar mein jab khade the sab, adl ke intezar mein,
Hamne wahan bhi aur ko, dekha nahi jo ho so ho.

Tujhse bichhadne ka mujhe, sadma to tha bahut magar,
Ashkon ko maine pi liya, roya nahi jo ho so ho.

Meri tabahi ka sabab, sab ko pata tha shehr mein,
Us se ye jab poocha gaya, bola nahi jo ho so ho.

Izzat se kat gayi hayat, Alhamdulliah dosto,
Apne zamir ka kiya, sauda nahi jo ho so ho.

Rehta hun uske sath mein, na-aashna hun ab talak,
Thoda to us ko jan lun, zyada nahi jo ho so ho.

Hai aarzu wisal ki, 'Sagar' unhi pe munhasir,
Ham chahte hain 'han' faqat, wada nahi jo ho so ho.


187. Ghazal:

Dikhaya haal-o-mazi waqt ne, ab farda dekho tum,
Jo zahir tha wo zahir hai, magar dar-parda dekho tum.

Hukumat se mili tumko bahut shabashiyan lekin,
Karaye tumse kam aise, jo the na-karda dekho tum.

Malamat ka nishan koi nahin milta takallum mein,
Pasheman khak hain, surat magar afsurda dekho tum.

Dukha kar dil kisi bebas ka tumko kya mila aakhir,
Wahi hai hal ab tera rafiq, ai darda dekho tum.

Sharafat mein yaqin kar lena achchhi bat hai lekin,
Haqiqat ki haqikat bhi, utha ke parda dekho tum.

Khabar sun ke tere aane ki baithe hain yahan kab se,
Bichhaye gul jo rahon mein, hue pazhmurda dekho tum.

Kabhi 'Sagar' masarrat ki likha karta tha nazmein, ab,
Likha karta hai jane kyun, ghazal aazurda dekho tum.


186. Ghazal:

Ghar lauta to sannata tha,
Hamne yahan dukh-sukh banta tha.

Majboori takti thi muhn ko,
Ghurbat mein geela aata tha.

Wahid mein hi sach kehta tha,
Mein uske dil mein kanta tha.

Dheron shikwe, bas ek bosa?
Sach poocho, ab bhi ghata tha.

Insanon ka dushman insan,
Waqt ke gal pe ik chanta tha.

Jivan ko bas jiya tumhi ne,
Hamne bas jivan kata tha.

'Sagar' tha me'mar ghazab ka,
Lafz se doori ko pata tha.


185. Ghazal:

Kuchh to sahi nahi hai, kahin kuchh kami si hai,
Hothon pe hai hansi to aankhon mein nami si hai.

Pala hai rog-e ishq gar tumne to ai miyan,
Timardari mariz ki phir lazmi si hai.

Mil kar fareb deti rahi umra bhar mujhe,
Fitrat teri ai zindagi, kuchh aadmi si hai.

Naraz mein hua to wo mujhse khafa hue,
Aadat mein tunak-mijazi bhi kya bahami si hai.

Rukhsat hue the chhod ke jis mod par mujhe,
Raftar waqt ki bhi wahin par thami si hai.

Phir hoga char-su yahan bhi sukut-e marg,
Kul char roz ki hi yahan hama-hami si hai.

'Sagar' karega hashr mein tu kaise saamna,
Ab tak zehen pe gard-e malamat jami si hai.


184. Ghazal:

Musht mein aasman na ho kyunkar,
Roz ik imtihan na ho kyunkar.

Inke seene mein bhi dhadakta hai,
Sang, dil ki zuban na ho kyunkar.

Jan-o-dil aap pe lutate hain,
Ishq rashq-e jahan na ho kyunkar.

Aapke zikr se sanwarte hain,
Lafz jadu-bayan na ho kyunkar.

Phir se wo dekhte hain sharma kar,
Phir tamanna jawan na ho kyunkar.

Mujhko sach bolne ki aadat hai,
Jan ka phir ziyan na ho kyunkar.

Jism mera agar muqayyad hai,
Rooh phir la-makan na ho kyunkar.

Dil mein jazbat ke sharare hain,
Badh ke aatish-fishan na ho kyunkar.

Aap 'Sagar' se milte rehte hain,
Phir ye dushman jahan na ho kyunkar.


183. Ghazal:

(Ustad Ghalib se ma'zarat ke sath)

Dard badh kar dawa na ho jaye,
Phir se jeena saza na ho jaye.

Aapse door hi se milta hun,
Shan mein kuchh khata na ho jaye.

Bol ke usne ki hai gustakhi,
Wo kahin gumshuda na ho jaye.

Kuchh bhi chaahun, rahega la-hasil,
Jab tak Uski raza na ho jaye.

Chhu ke tum ko na sona kar baithun,
Mojiza bad-dua na ho jaye.

Aaj dil zor se dhadakta hai,
Unka wada wafa na ho jaye.

Kijiye zulm bas wahin tak hi,
Zabt be-intiha na ho jaye.

Aapko bhoolne ki koshish mein,
Zindagi bemaza na ho jaye.

Padhiye hargiz na meri ghzalon ko,
Zeest se saamna na ho jaye.

Itni na kar muhabbat ai 'Sagar',
Wo kahin be-wafa na ho jaye.


182. Ghazal:

Jo dekha hai wo sab dekha hua hai,
Harek sh'e mein tu hi jalwanuma hai.

Tumhare sath hai har pal masarrat,
Tumhare bin musalsal hadisa hai.

Nahi karta yaqin wade pe tere,
Ye banda ab haqiqat janta hai.

Bhulana chahta hun ab mein tumko,
Nahin ma'lum kyun aisa hua hai.

Subah se aapke tewar chadhe hain,
Hamein batlao kisne kya kaha hai.

Jis parwah nahi hargiz hamari,
Ye dil phir bhi usi ko chahta hai.

Agar keh do to apni jan de de,
Jise kehte ho tum, ki bewafa hai.

Nahin kehta hai kuch bhi ab kisi se,
Sawali aankh se bas dekhta hai.

Kati hai umra teri simt chalte,
Hamare beech ab bhi fasla hai.

Akele mein kabhi 'Sagar' se poocho,
Wo mehfil mein zara kam bolta hai.


181. Ghazal:

Khata jo mujh se hui wo to be-irada thi,
Saza jo tumne mujhe di wo kuchh ziyada thi.

Shahadat ka mere dil mein koi khayal na tha,
Shaheed karne pe makhlooq hi aamada thi.

Wo sadgi ka mujassam hasin paikar tha,
Bhale hi jan li usne, ada to sada thi.

Bisat chhod chale jab wazir-o-asp-o-feel,
Akela sath raha, himmat-e piyada thi.

Wo jiske samne mein rooh tak hua uriyan,
Hamesha oodhe hue qimti labada thi.

Jo teri rah ko roke tha band darwaza,
Wo ja ke khol diya, zidd-e shahzada thi.

Sharab ki mujhe darkar ab nahin 'Sagar',
Jo kar gayi mujhe masroor, rooh-e bada thi.


180. Ghazal:

Iltimas aapse,
Har murad, aapse.

Meri kul zindagi,
Kainat aapse.

Muddaton mein hua,
Ru-shanas aapse.

Sha’iri mein hai ab
Inqilab aapse.

Ab karun kya talab,
Mein jawab aapse.

Karni hai mujhko bhi,
Ek bat aapse.

Aap hi ke liye,
Ikhtilaf aapse.

Nam mera hua,
Faizyab aapse.

Kyun hue sab bhala,
Badguman aapse.

Aaj ‘Sagar’ hua
Hamkinar aapse.


179. Ghazal:

Kuchh to tha tujh mein jo mein teri taraf maa'il hua,
Par natija kya raha, mein rooh tak ghayal hua.

Apni duniya chhod ke aaya mein jiske waste,
Mujh ko tanha chhod ke wo bheed mein shamil hua.

Bakhshta tha sab ko jo unki muradein kal talak,
Dekh le wo aaj tere samne saa'il hua.

Jism-o-rooh ki sari qaidon se nikal aaye to phir,
Khamushi ka aik parda darmiyan haa'il hua.

Zindagi bhar raaste par aadmi ka tha qayam,
Marg aayi to rawana janib-e manzil hua.

Ijtirab-o-ishtiyaq-o-kash-ma-kash, bechainiyan,
Jab hue yak-ja, to 'Sagar' ka kahin phir dil hua.


178. Ghazal:

Yad tumko kiya, kiya na kiya,
Zehr ham ne piya, piya na piya.

Be-yaqini jo teri aadat hai,
Qaul sadiq diya, diya na diya.

Mein hun apne junun ka diwana,
Chak daman siya, siya na siya.

Zikr-e aghiyar pe wo ye bole,
"Nam unka liya, liya na liya."

Farq kisko padega 'Sagar' tu,
Gar jahan mein jiya, jiya na jiya.


177. Ghazal:

Maine suna jo aaj tak tune mujhe kaha,
Par main jo kehna chahta hun wo hai unkaha.

Jitne the ashk wo mere she'ron mein dhal gaye,
Aankhon mein aik qatra bhi baqi nahin raha.

Izhar-e aarzu ki na jurrat muhe hui,
Khamoshiyon se di hai sada, dard-e dil saha.

Mumkin hai teri shakl bhi na dekhun main kabhi,
Lekin rahunga karta muhabbat mein be-baha.

Yadon ki eentein din-ba-din girti chali gayin,
'Sagar' jo dil mein qasr-e tamanna tha, sab dhaha.


176. Ghazal:

Usko to bat-bat pe, maine diya jawab,
Apni ana ke waste, khana kiya kharab.

Tanha tha aasman ki bulandi pe wo bahut,
Ghar mein mere thahar gaya kal shab se aaftab.

Saman sau baras ka liye phir raha hai tu,
Is kulzum-e jahan mein, hasti teri hubab.

Hairat se tak rahi hai zamin, aur ye aasman,
Aahista uth rahi hai tere rukh se ye naqab.

Kitne kahe hain she’r maine teri shan mein,
Jab bhi hon fursatein zara, le jaiye hisab.

Achchha-bura jo kuchh bhi hai dil mein, nikaliye,
Chuppi ko todiye aji, kuchh boliye janab.

‘Sagar’ se jo hain aashna, taslim kareinge,
Kehta nahi bahut magar, kehta hai la-jawab.


175. Ghazal:

Ik sarab ke jaisa, mustaqil chalaye hai,
Kya wo dega aakhir-ash, ye bhi na bataye hai.

Hai badalte mausam sa, us hasin ka bartav,
Be-wajah wo roothe hai, be-wajah sataye hai.

Dil hai sach mein diwana, zakhm kha ke lauta hai,
Us gali mein jane ka, phir se man banaye hai.

Kul jahan ki khushiyan, bakhshta hai ik pal mein,
Jab kabhi bhi wo meri, bat man jaye hai.

Poochte hain wo mujh se, 'Kam kya hai batlao',
Kya haqir lafzon mein, aarzu samaye hai.

Ye bhi usne poocha hai, 'Chahte ho kya mujh se?'
Hai zuban meri qasir, kuchh na bol paye hai.

Hai jahan mein charcha, uski tursh baton ka,
Tere samne par wo, lab bhi na hilaye hai.

Ye suna ke hans-hans kar, Eid mil rahe hain wo,
Aisi bat sun ke mera, dil sa tut jaye hai.

Ja rahe hain ab wo bhi, chhod kar tujhe tanha,
Tera sath ai 'Sagar', koi na nibhaye hai.


174. Ghazal:

Go ke tufan mein safina hai,
Mujhko marna nahin hai, jeena hai.

Sozish-e ishq hi hai aalam mein,
Aur phir June ka mahina hai.

Jauhari ki nigah se dekho,
She'r kya hai, khara nagina hai.

Dilshikan bat, makhmali alfaaz,
Sirf ye aapka karina hai.

Gar irada ho mujhse milne ka,
Ghar ke peeche bhi ek zeena hai.

Aapse ishq, aur ghazal-goi,
Zeest ka bas yehi zamima hai.

Unki zulfon ko chhu gai shayad,
Aaj andaz-e saba bheena hai.

Hai labon par masnu'i si hansi,
Ranj se pur-figar seena hai.

Rakhni padti hai dekh-bhal bahut,
Dil hai mera ya aab-gina hai.

Phir hui subh, phir wahi duniya,
Phir se zehrab hans ke peena hai.

Mujhko 'Sagar' se hi tawaqqo thi,
Paya uske bhi dil mein keena hai.


173. Ghazal:

Muhabbat ki panahon mein, wafa ke deep jalte hain,
Meri ghazlon ke she'ron mein, mere arman machalte hain.

Ada ki hai maine qimat, kisi se dil lagane ki,
Meri har sans girvi hai, shamma-se ham pighalte hain.

Muhabbat ho agar sadiq, to manzil mil hi jati hai,
Musalsal ismein girte hain, magar uthte hain, chalte hain.

Sar-e mehfil karo na zikr hamse be-wafai ka,
Tumhara nam aayega, chalo mudda badalte hain.

Tere maikhane ka saqi, ajab dastur dekha hai,
Yahan wa'iz behakte hain, jo peete hain, sambhalte hain.

Mere mua'fiq nahi hai ye, Khuda hafiz, jahan walo,
Mubarak ho tumhein duniya, yahan se ham to chalte hain.

Piya karta hun main 'Sagar', jahan mein hans ke ashk-e gham,
Magar phir bhi kuchh aansu hain, jo in she'ron mein dhalte hain.


172. Ghazal:

Uski talash mein tu badi dur tak gaya,
Maujud tha tujhi mein wo, kyun dur tak gaya.

Bardhasht ki kamaan jo khinchti chali gayi,
Nikla zaban se tir, to phir dur tak gaya.

Thak-har kar rahi sabhi raste mein ruk gaye,
Yadon ka kafila jo chala, dur tak gaya.

Ummid ka tha panchhi wo, manzil thi aasman,
Boodhe darakht se jo uda, dur tak gaya.

Tapka jo uski aankh se aansu, to al-gharaz,
Dil mein shighaf karta hua, dur tak gaya.

Tha munjamid main koh-e ana ke hisar mein,
Jab misl-e dariya beh chala, dur tak gaya.

Gata tha ik faqir koi dard-bhara geet,
'Sagar' main uske peechhe-peechhe, dur tak gaya.


171. Ghazal:

Zehar kisi ke liye bhi na man se niklega,
Hamare pyar ka sandal badan se niklega.

Nahin hai zakhm jise mein dikha sakun tujhko,
Hamare dard ka darman jatan se niklega.

Ravish na chhodega apni, zamana kuchh bhi kahe,
Kulah gire, wo magar bankpan se niklega.

Hai imtiham zaroori, parakh tabhi hogi,
Tumhara pyar jab tap kar agan se niklega.

Hai khar-khar badan, par hai uski majboori,
Gulon ko chhod kar kaise chaman se niklega.

Hai jan-nasari ka jazba, to aao sath chalo,
Naye zamane ka parcham kafan se niklega.

Kisi ka dil na dukhe, aur bat ban jaye,
Ye rasta bhi tumhare hi man se niklega.

Badan ki khusbu se pahunchunga us talak 'Sagar',
Suragh uska isi pairahan se niklega.


170. Ghazal:

Rat aayi hai to neend aayegi, khwab aayega,
Khud-ba-khud sare sawalon ka jawab aayega.

Agar mein tod lun rishta jo us se phir ik bar,
Mujhe wo karne ko khana-kharab aayega.

Karenge aap agar be-wajah mujhe bechain,
Chain phir aapko kaise janab aayega.

Hamari hijr ki ratein, tumhare wasl ke din,
Jod ke dekhiye poora hisab aayega.

Aaj ki rat tamam shehr mein sannata hai,
Aaj sunte hain ke wo behijab aayega.

Jo kar raha hai nafrat abhi bahut mujhse,
Pyar jaldi hi use be-hisab aayega.

Bajaye shor ke qurbaniyan zaroori hain,
Faqat naron se kahan inqilab aayega.

Sanwarta hun harek lafz ke mein khal-o-khad,
Shayad is se meri ghazlon pe shabab aayega.

Dhali hai sham-e gham 'Sagar' hamari muddat mein,
Mujhe ummid hai ke ab mahtab aayega.


169. Ghazal:

Sochta hun kahan kya kami reh gayi,
Aik hasrat bhari zindagi reh gayi.

Waqt ki dhoop ne khwab jhulsa diye,
Meri aankhon mein phir bhi nami reh gayi.

Aap jab bhi mile, mehfilon mein mile,
Bat dil mein hi dil ki dabi reh gayi.

Badgumani se badhti rahin dooriyan,
Aik phir bhi kashish bahami reh gayi.

Aap to jante hain kahani meri,
Aap se bat ab kya chhupi reh gayi.

Dushmanon se bhi badh kar dagha kijiye,
Ab dikhave ki hi dosti reh gayi.

Tere dar se ai 'Sagar' na jaun kahin,
Ye tammana meri aakhiri reh gayi.


168. Ghazal:

Bala kaisi bhi ho samjha nahin usko bala maine,
Tere reham-o-karam se rakhha hardam hausla maine.

Nahin mumkin kisi ka bhi dakhal ho meri duniya mein,
Teri yadon se bhar rakhi hai apni har khala maine.

Ye tum hi ho ke jis se apne dil ki bat karta hun,
Kisi bhi ghair se bolo kiya hai kab gila maine.

Bahut mushkil hai dil ki bat sun ke unsuni karna,
Yehi ik bat thi chhoda jo tera kafila maine.

Maze ki bat bhi kehte ho aksar bemaza hokar,
Nahin dekha koi tumsa jahan mein diljala maine.

Na ab mein pas jata hun, na hi unko bulata hun,
Kiya hai tark ik arse se ye bhi silsila maine.

Shahadat teri rah-e Haq mein misl-e shamma raushan hai,
Hamesha zinda rakha hai jigar mein Karbala maine.

Gaya jab milne to bole ke 'Achha phir kabhi aana',
Zara thi bat thi lekin kiya hai fasla maine.

Hamari zeest ho tum hi, tumhi se door jata hun,
Havas-o-hosh mein apne kiya hai faisla maine.

Kisi din chain se ghazlein likhunga main, abhi lekin,
Kitabon mein hi kar rakha hai khud ko mubtila maine.

Raho tum shad aur khurram, raho chahe jahan 'Sagar',
Tumhari bewafai ka diya ye hi sila maine.


167. Ghazal:

Jo nahin mujhe mayassar, uska malal kyun hai,
Wo hai zindagi kisi ki, us se sawal kyun hai.

Ghairon se kabhi pursish, gumnam kabhi kaalein,
Us bewafa ko ab tak mera khayal kyun hai.

Kuchh khas to nahin hai, andaz bhi hai sada,
Yun to hai aam sa wo, par be-misal kyun hai.

Kisne kaha kare wo, tedha sawal mujh se,
Sun kar jawab ab wo, ghusse se lal kyun hai.

Gar sath reh rahe ho, rahe ehatram baham,
Jo hai haram mujh ko, tujhko halal kyun hai.

Kya kuchh hua hai aisa, jo mein janta nahin hun,
Kuchh zyada hi hamari, ab dekh-bhal kyun hai.

Rudad teri sabko, apni si hi lage hai,
'Sagar' teri ghazal mein, aisa kamaal kyun hai.


166. Ghazal:

Kabhi chehra, kabhi naazir, kabhi mein aaina hota,
Kabhi khud ba'is-e hairat, kabhi hairat-zada hota.

Malaal aksar raha karta hai tere jane par mujhko,
Ki jab tu sath tha mere to maine ye kaha hota.

Safar bairuni tha shayad wajah ye thi na milne ki,
Main khud mein dhoondhta Usko, to wo bhi mil gaya hota.

Talab men Khizr ki baitha raha main dasht-e wehshat mein,
Nikal padta jidhar bhi main, wahin se raasta hota.

Musalsal haadison ke bad bhi mein muskurata hun,
Koi kamzor-dil hota, to ab tak mar gaya hota.

Shehr tera, gawah tere, tu hi munsif, main faryadi,
Haqiqat jo bhi hoti, tere haq mein faisla hota.

Gila teri zaban se be-wafai ka nahin achha,
Teri jo khoo hai ai 'Sagar', koi bhi be-wafa hota.


165. Ghazal:

Bas itna hai nuqta-e nazar,
Adna hai bashar, aala hai bashar.

Ik husn-e bala, ik shayar dil,
Andaz udhar, alfaz idhar.

Ab ruswa kar ke chhodegi,
Bebak nazar, ghustakh nazar.

Begane ban ke baithe hain,
Hai chak jigar, sad chak jigar.

Itni hai kahani ulfat ki,
Aaghaz kehar, anjam kehar.

Barbad kiya hai ulfat ne,
Na mujhko khabar, na unko khabar.

Ai 'Sagar' teri ghazlon ka,
Hota hai asar, hota hai asar.


164. Ghazal:

Dil pe jo nahin guzre, dar-asal nahin kehta,
Hal-e dil sunata hun, mein ghazal nahin kehta.

Mujhko tujh se ai janan, az-abad muhabbat hai,
Tu bhi pyar kar mujh se, ta-azal, nahin kehta.

Wo bhi ik zamana tha, fi al-badi hi kehta tha,
Sochta bahut hun mein, aajkal nahin kehta.

Iste'are qasir hain, tamsilat kyunkar ho,
Badalon ko zulfon ka mein badal nahin kehta.

Khud ko ab mein rakhunga ba'z kadwi baton se,
Aap bhi karein is par, jo amal, nahi kehta.

Kab talak sukunat hai, is jahan-e fani mein,
Kab karega Wo kisko, be-dakhal, nahi kehta.

Shayari meri 'Sagar', zeest ka sarapa hai,
Masnavi nahin padhta, mein hazal nahin kehta.


163. Ghazal:

Jigar ke zakhm gar tumse, chhupata mein to behtar tha,
Jo khud hi khar-zaron ko, ugata mein to behtar tha.

Kana'at, sabr, khamoshi, nahin milti dukanon mein,
Inhein apne tajurbon se, kamata mein to behtar tha.

Zamane ne jo di hain un, kharasho se nawaqif hun,
Kisi din khud ko aa'ina, dikhata mein to behtar tha.

Rifaqat ka sila mujhko, jo dete hain raqabat se,
Adawat aise logon se, nibhata mein to behtar tha.

Hamare darmiyan jo kanch ki diwar thi hai'l,
Use sangin haqaiq se, girata mein to behtar tha.

Nahin samjhe kabhi bhi wo hamare pyar ki shiddat,
Bajaye sha'yeri un se, jatata mein to behtar tha.

Koi kya khak samjhega ai 'Sagar' teri qimat ko,
Khud apni hi agar boli, lagata mein to behtar tha.


162. Ghazal:

Qissa bahut purana hai,
Diwana, Diwana hai.

Zakhm dikhayein kisko ham,
Ghut ke bas reh jana hai.

Shamma per jo jan na de,
Kahe ka parwana hai.

Tum mere pehlu mein ho,
Khwab hai ya afsana hai.

Jab tak aap rahe mera,
Ghar tha, ab virana hai.

Dil ka apne zikr hi kya,
Aalam se begana hai.

Kaun yahan par aisa hai,
Gham se jo anjana hai.

Tere 'Sagar' ki janan,
Fitrat aazadana hai.


161. Ghazal:

Meri ummid jo us se thi, ik dilasa thi,
Ab uske ba'd to charon taraf nirasha thi.

Na samjha khud ko, na samjhaa saka kabhi khud ko,
Ke meri 'rooh' tak khud mujh se na-shanasha thi.

Kabhi na samne uske jataya ulfat ko,
Agarche us se muhabbat to betahasha thi.

Bulandiyon pe khada dekhta raha duniya,
Jahan se sirf wo bachchon ka ik tamasha thi.

Gham-e hayat ne paiham diye mujhe sadmat,
Khushi mili to tabarruk ka jyun batasha thi.

Hon pesh kaise bhi halaat, wo sach hi bolega,
Na jane kisliye us se ye mujh ko aasha thi.

Mila jo kuchh bhi, sab ko duayein deein 'Sagar',
Meri hayat bhi muflis ka jaise kasa thi.


160. Ghazal:

De do koi farman aur,
Ik din ho sultan aur.

Soch rahe ho lehad pe kya,
Ab bhi hai arman aur?

Sulah-safai kar lo ab,
Kuchh din hun mehman aur.

Rokun ashk to uthta hai,
She'ron ka toofan aur.

Saf kaho jo kehna hai,
Likho mat diwan aur.

Jo hai sach wo batla do,
Uthne do bohran aur.

Shayar ka mazhab kaisa?
Din hai aur, iman aur.

'Sagar' ishq ki had se guzar,
Payega irfan aur.


159. Ghazal:

Milna jo ho to fasla do gam hi to hai,
Aa sakte ho tum ab bhi, abhi sham hi to hai.

Dil de ke unko poori tasalli-si ho gayi,
Karne ko mujhe bhi ab aaram hi to hai.

Karti hai khirad to faqat khawaas se kalaam,
Karni ho dil ki bat to, awaam hi to hai.

Ab to zamana de chuka mulzim tumhe karar,
Dil todne ka mujhpe bas ilzam hi to hai.

Dil ka bura nahin hai wo, waqif hun us se mein,
Aashiq tera bas thoda sa badnam hi to hai.

Fehrist mein hai awwal, shahidon mein mera nam,
Meri wafa ka ye bhi ik i'nam hi to hai.

'Sagar' se kya murad wo, marta hai to mare,
Adna sa aapke liye ik nam hi to hai.


158. Ghazal:

Abru ko de ke kham tune nashtar bana diya,
Mizhghan ko qatilon ka hai lashkar bana diya.

Wa'da wafa kiya na kabhi tumne wasl ka,
Jab bhi mile bahana hi aksar bana diya.

Suni si zindagi thi meri tumne ek raat,
Aakar mere makan ko ik ghar bana diya.

Qatil ka nam hi to poocha tha, ai Khuda,
Itni zara se bat pe mehshar bana diya.

Sayyah ko jo mil na saka mir-e karavan,
Tang aa ke rehzanon ko hi rehbar bana diya.

Aakar takhayyulon mein namudar ho gaye,
Tanhaiyon ko khwab-sa manzar bana diya.

Jab apna hal keh na sake to ai hamnashin,
Ashkon ko tere samne mehzar bana diya.

Tehsin-e ghazal ho gayi 'Sagar' ne jab kabhi,
She'ron ko tere zikr se behtar bana diya.


157. Ghazal:

Aankhon mein sirf pyar ki rangat dikhai de,
Dushman ke vaste bhi na nafrat dikhai de.

Tumko na mein kabhi bhi apna bana saka,
Tujhse mein jab milun yehi hasrat dikhai de.

Umeed phir bandhi hai tere wa'de se magar,
Phir teri bhool jane ki aadat dikhai de.

Tark-e ta'alluqat ke bad ab mile hein ham,
Ab bhi tumhare lehje mein chahat dikhai de.

Barson ki hijraton se jab lauta watan ko mein,
Har gam pe au har taraf hairat dikhai de.

Dast-e shifa mein koi masihai hai tere,
Har su tere kamaal ki shohrat dikhai de.

Guzra hai samne se jo, hamraz tha kabhi,
Tasleem karne mein bhi ab zillat dikhai de.

Zariya ghalat bhi ho magar, maqsud to mile,
Is daur mein kahin bhi na ghairat dikhai de.

Mein hun akela sath mein parwardigar hai,
Mujhko adu ki rooh tak haibat dikhai de.

Jitne bhi hein raqib, kisi mein bhi mujhko ab,
Nazrein milane ki bhi na himmat dikhai de.

Itni si iltija hai ye Ya Rab, qubool ho,
Jab tak jiyun mein teri hi rehmat dikhai de.

Jabir ke samne bhi kahi tune Haq ki bat,
'Sagar' tere kalaam mein jurrat dikhai de.


156. Ghazal:

Tera sath tha, dil shad tha, meri zindagi mein bahar thi,
Jab ho gaye tujhse juda, to har ghadi dushwar thi.

Ham sochte the kahenge sab, wo jo ham pe guzri hai hijr mein,
Tere samne kho si gayi, jo taqat-e guftar thi.

Na sipah koi, na aslaha, the faateh ham har jang mein,
Par jang-e ishq thi wo jahan, meri jeet bhi meri har thi.

Chhalni hai dil-o-jigar mera, mere jakhm-jakhm hain khwab bhi,
Guzri jahan kal shab meri, wo wadi-e pur-khar thi.

Pakar tumhein khoya hai kya, kho kar tumein kya paunga,
Kati kash-ma-kash mein hi zindagi, go behas ye bekar thi.

Wo the bade munsif-mijaz, chara tha kya mazlum ko,
Ik hath mein meezan tha, ik hath mein talwar thi.

Yun to bat kuchh bhi na thi magar, rahe ham ana ki qaid mein,
Guzre na teri gali se phir, ik ghairat-e pindar thi.

Chaha magar keh na saka, 'Sagar' zuban sakit rahi,
Tum bhi kabhi na sun sake, wo jo dil se dil ki pukar thi.


155. Ghazal:

Jo tum jan jao, hamein bhi batana,
Ye kisne banaya hai hamko diwana.

Mulaqat tumse hui na hamari,
Go aa kar ke milta hai hamse zamana.

Hai kuchh to jo mujhko pata hi nahin hai,
Zaroori na samjha jo tumne batana.

Tumhein dekha hai jab se jan-e janan,
Hun shaida tabiyat meri aashiqana.

Hamein bas ye gham hai, wafa kar ke bhi ham,
Teri berukhi ka bane hain nishana.

Ye lagta hai tumko mein ab wo nahin hun,
Suna tumne aa ke kabhi khud na jana.

Hain 'Sagar' ke atwar ab mukhtalif se,
Na milna, na julna, na aana, na jana.


154. Ghazal:

[Mohtaram-e man Janab Surendra Kumar ki nazar]

Ye raton ko jagna, ye akhtar-shumari,
Kahan se lagi hai tumhein ye bimari.

Dhake sar ko kale dupatte se apne,
Ayadat ko aaye hain, kar ke taiyari.

Tere gham ne bakhsha hai kya-kya na mujhko,
Ye nale, ye aahein, ye seena-fighari.

Mere gham ki lazzat se mehjuz ho kar,
Kahan dost karte hain ab gham-gusari.

Kaha jisne jo bhi, yaqin kar liya hai,
Nahin seekh paye hain ham duniya-dari.

Hun bekhud tumhare tasawwur mein itna,
Karein hosh wale hi ab hoshiyari.

Teri mast aankhon se ik bar pi thi,
Hai chhai abhi tak wo mujhpe khumari.

Nadarad the bazm-e sukhan mein, to poochha,
'Kahan aapne shab ai 'Sagar' guzari.'


153. Ghazal:

Ye tumko achanak hua kya hai janan,
Bhala tumse kisne kaha kya hai janan.

Na roko ise band kar apni aankhein,
Ye ashkon ka tufan ruka kya hai janan.

Tere ashk paunchhun, tabassum sajaun,
Maine chaha iske siva kya hai janan.

Teri zulf-e mushqin ki khushbu liye hain,
Wagarna nasim-o-saba kya hai janan.

Na tumne hi poochha, na maine bataya,
Hai tumse bichhad kar saha kya hai janan.

Agar aakhiri ye tera faisla hai,
To kehne ko baqi raha kya hai janan.

Tumhein rat hi ik agar kaatni hai,
To 'Sagar' ka ghar hi bura kya hai janan.


152. Ghazal:

Apni khudi ke sath hain, kis se nibah ho,
Duniya mein ye gunah hai, to phir gunah ho.

Jab tu nahin to kisko sarahe meri nazar,
Hasrat yehi hai phir se tu pesh-e nigah ho.

Din to guzar gaya hai tere sath khush-gawar,
Parwah nahin ki rat meri ab siyah ho.

Hai kaun? sochta hai jo bas mere haq ki bat,
Jab aap hi nahin hain to kis se salah ho.

Ma'il nahin hun aapki da'wat karun qubul,
Jab dil mein nafratein hain to kyun rasm-o-rah ho.

Kehte hain haq ki baat ko hakim ke samne,
Darte nahi hain sath gar uske sipah ho.

Hai sha'iri baja magar 'Sagar' tu sath-sath,
Kuchh aisa kar ki qaum ki jis se falah ho.


151. Ghazal:

Wo khamoshi se koi bat kehna chahta tha,
Achanak uske hothon pe na jane kya ruka tha.

Chala ik umr lekin mein, tumhare pas na pahuncha.
Hamare darmiyan koi musalsal fasla tha.

Tabahi ka nishan koi, nahin tha jism par mere,
Utha jo ander hi ander, ye kaisa zalzala tha.

Wo aansu ponch kar apne, mere pehlu mein aa baithe,
Hui barish magar mausam zara ab khul raha tha.

Nidamat aur bezari, mili mujhse use phir bhi,
Wo mujhko chahta tha, ye usi ka hausla tha.

Sunaye unko hamne har kas-o-nakas ke afsane,
Magar maqsud tha jo kuchh, wo ab tak un-kaha tha.

Meri hasti mahaz ik aks tha meri haqiqat ka,
Mein apni bat ko khud apne aage keh raha tha.

Mera aur uska ruhani koi mukaalma tha,
Suna wo bhi tha maine jo nahin usne kaha tha.

Bulandi par raha jab tak, raha wo munjamid 'Sagar',
Ana ki barf jab pighli to dariya beh raha tha.


150. Ghazal:

Aap jaise duniya mein, chand log hote hain.
Itni iztarabi mein, chain se jo sote hain.

Ba-usool dushman bhi, doston ke jaise hain,
Aapki taraqqi se, asar-angez hote hain.

Hamko ye shaghal tune, kya sikha diya janan,
Mehfilon mein hanste hain, aur akele rote hain.

Rang-o-bu ki khwahish mein, ye bhi ab kiya jaye,
Aapke tasawwur ko zehn-o-dil mein bote hain.

Kal wo jab akele the, shayari karte rahe,
Nadani mein mauqe ham, kaise-kaise khote hain.

Neend jab nahin aati, hamko tanha raton mein,
Teri yad ko apne, dil mein ham sanjote hain.

Shayari hai kya 'Sagar', itni si haqiqat hai,
Aapki hasin yadein, lafz mein pirote hain.


149. Ghazal:

Aik mubham jhalak aur tum bha gaye,
Hamne todi ana, tere ghar aa gaye.

Aa'ine ke muqabil sanwarte the kal,
Hamne poocha sabab to wo sharma gaye.

Gham ka gehwara meri khushi ban gai,
Ye karam aap kaisa hain farma gaye.

Har jagah bheed hai phir bhi tanhaiyan,
Hai ye kaisa shehr, ham kahan aa gaye.

Hadison se mile jab bhi hans kar mile,
Aaj khud se mile hain to ghabra gaye.

Doobte shams si uski tasir hai,
Aasman pe wo jate hue chha gaye.

Dost kuchh aise jivan mein hamko mile,
Dushmani ki misalein jo dikhla gaye.

The tajurbat 'Sagar' bade kargar,
Jate-jate sabaq hamko sikhla gaye.


148. Ghazal:

Jiske huzur mein har shah-o-gada khada hai,
Tu us se ab bhi ghafil, soya hua pada hai.

Shayad use abhi bhi ummid hai tu aaye,
kyun warna ye musafir teri rah mein khada hai.

Phir kya ummid rakhe is daur ka Mahiwal,
Duniya wahi hai ab bhi, kachcha wahi ghada hai.

Bas aur ab kisi ke, basne ki ja nahi hai,
Tera khayal dil mein, misl-e nagin jada hai.

Nahi hai qarar ik pal, chahe jahan rahun mein,
teri kami ka dil mein, kanta sa ik gada hai.

Ham laye the mana kar, tere shahr se dil ko,
Phir le chalun mein wapas, is bat pe ada hai.

Dil mein hamare 'Sagar', basti si bas gayi hai,
Kahin hain makin aur kahin khali makan pada hai.


147. Ghazal:

Apna dhang badalna seekh,
Mat suraj se dhalna seekh.

Ab mere kaandhon se utar,
Khud pairon pe chalna seekh.

Aaqaon ki ungli chhod,
Girna aur sambhalna seekh.

Paththar ban ke kya paya?
Mom sa ab pighalna seekh.

Logon se tu hans kar mil,
Mat tu aag ugalna seekh.

Kundan ban ke nikhrega,
Hijr ki aag mein jalna seekh.

Jang mein jane se pehle,
Chakravyuh se nikalna seekh.

Aur bhi kam hai mujhko yahan,
'Sagar' tu zara talna seekh.


146. Ghazal:

Aalam aara kya karta,
Sog hamara kya karta.

Sari khata aankhon ki thi,
Dil bechara kya karta.

Tum bhi to mohtat na the,
Mein bhi Khudara kya karta.

Ghussa aaya, par wo tha,
Khud se pyara, kya karta.

Umra ke khali khanon mein,
Waqt guzara kya karta.

Tumne khud hi roka tha,
Dost tumhara kya karta.

Adamabad sidhara wo,
Zeest ka mara kya karta.

'Sagar' khud ka ho na saka,
Tera sahara kya Karta.


145. Ghazal:

Hoga hasil kabhi visal mujhe,
Apne dil se na tu nikal mujhe.

Mein jo toota to tu bhi tootega,
Aa'ine ki tarha sambhal mujhe.

Jaise kal tujhse pesh aaya tha,
Uska hai ab talak malal mujhe.

Mein to khud apne aap mein gum hun,
Hai kisi ka nahin khayal mujhe.

Wo bhi aakhir ko bewafa nikla.
Kiski dega tu ab misal mujhe.

Tujhko mil jayega jawab tera,
Ban ke milna na tu sawal mujhe.

Tere hathon mein aik 'Sagar' hai,
Jam ki tarha na uchhal mujhe.


144. Ghazal:

Ana ka aaina toda, yahan tak to ghanimat thi,
Magar batlao mujh jaisi yahan kis mein basirat thi.

Usoolon ke jo the paband to phir hausla rakhte,
Yehi haq tum pe wajib tha ada karte jo qimat thi.

Zamana ho na ho tera, magar wo Rab tumahara hai,
Mere gaon ke ik boodhe ki ye adna nasihat thi.

Raho bhi sath mein uske, zaban se kuchh nahi bolo,
Ye tha fatwa manahi ka, ya ye koi shari'at thi.

Sar-e mehshar tumhara nam le sakta tha mein, lekin,
Zarar mein tumko pahuchaun, nahin meri ye niyat thi.

Kiya mujh ko jo tumne qatl to uska shukriya tum ko,
Mera jo hal tha ab tak bala ki wo aziyat thi.

Meri ghazlon mein dard-o-gham to dekha hai bahut tumne,
Jise tum sun nahi paye wo hi meri haqiqat thi.

Zaban-bandi ka ye farman, nalon par ye pabandi,
Sarihan berukhi uski bhala kya kam musibat thi.

Kahan tak rokta koi, tujhe 'Sagar' shahadat se,
Ke apni jan dene par teri ma'il tabi'at thi.


143. Ghazal:

Dil ko kitni bar yehi samjhaya hai,
Kal tak jo tera tha aaj paraya hai.

Dost to apne aate-jaate rahe magar,
Hamsaya hamsaya tha, hamsaya hai.

Kabhi-kabhi maine bhi yun hi chup reh kar,
Apne hone ka ehsas dilaya hai.

Pala hai nafrat ko apne dushman ki,
Jaise ik nagin ko doodh pilaya hai.

Dhoom machi hai shehr mein tere aane ki,
Qasr-e dil hame bhi khoob sajaya hai.

Kahan gai wo hijr ki lazzat, hazrat-e man,
Mera dil tujhko pa ke pachhtaya hai.

Qalam ghisi hai barson she'ri khidmat men,
Tab 'Sagar' thoda sa nam kamaya hai.


142. Ghazal:

Ham sa duniya mein na tha, na aayega,
Apna qissa har koi dohrayega.

Hamne tere raz ko dil mein rakha hai,
Ghar koi bhedi Lanka dhayega.

Sabko chhod ke tujhko dil de baithe hain,
Ab aage jo hoga dekha jayega.

Tune jiski khatir sabko chhoda hai,
Ik din woh bhi apni zat dikhayega.

Jhoot ke dariya mein hai sach ki kashti par?
Tu bhi maut ke ghat utara jayega

Ghalib wale daur ka masla' ab bhi hai,
Rahega Dilli mein likin kya khayega.

'Sagar' apna sar katwa sakta hai par,
Sar ko apne hargiz nahi jhukayega.


141. Ghazal:

Mein patthar hi sahi, sajde mein kham hun,
Tumhare bin mein sar-ta-pa alam hun.

Kahin hun maut sa aasan rasta,
Kahin mein zindagi ka pech-o-kham hun.

Kabhi mein qehqaha hun hadison mein,
Kabhi shadi mein bhi mein chash-e nam hun.

Tumhein ab tak kiya na door dil se,
Baray-khud mein ik tooti qasam hun.

Na dekho mere ander raz-e hasti,
Lagao honth se mein jam-e Jam hun.

Mukammal aagahi ke bad bhi mein,
Liye ab tak jigar mein ranj-o-gham hun.

Jise dekha nahin 'Sagar' kisi ne,
Mein jeeta-jagta Uska karam hun.


140. Ghazal:

Kya kya kaha na usko maine kal itab men,
Kyun chup raha wo, kuch na kyun bola jawab mein.

Ik bar jisko chhod diya, chhod hi diya,
Bas ye kami hai mere dil-e khana kharab mein.

Mehshar mein aik daman to aaya tha mere hath,
Socha kahin koi aur na nikle naqab mein.

Viraniyon se uns hai, sehra hai ghar mera,
Apni kati hai umr hi dasht-o-sarab mein.

Manzil se keh do aane hi wala hai diwana,
Sauda hai sar mein, aur mere pa hain raqab mein.

Ik rind-e pakbaz ko diwana kar gai,
Saqi ne aaj mila diya kuchh to sharab mein.

Taskin-e dil ke badle liya hai ye dard-e dil,
'Sagar' tu kyun pada hai riyaz-o-hisab mein.


139. Ghazal:

Chehra udas dil ka daricha khula raha,
Afsos tere jane ka mujhe barmala raha.

Chhaya tha har taraf chaman mein khizan ka rang,
Bas teri yad ka yahan ghuncha khila raha.

Rahein alag, manzil alag, aur hamsafar alag,
Tafriq is qadar thi magar dil mila raha.

Maine to iska zikr kisi se kiya nahin,
Khud apni bewafai ka usko gila raha.

Rauzan se raushni ki kiran ghar mein aa gayi,
Phir uske ba'd 'noor' ka ik silsila raha.

Ham-pesha-o-ham-mashrab-o-ham-raz tha mera,
In qurbaton ke ba'd bhi ik fasla raha.

'Sagar' mein kaise kaat ta, is umr-qaid ko,
Pursish ko aate rehne se mujhe hausla raha.


138. Ghazal:

Tere samne mera hal hai, karun khud se mein izhar kya,
Mein hun hissa teri zat ka, nahin hai khizan to bahar kya.

Jo hai fasla wo taweel hai, mera ishq meri sabeel hai,
Teri rah mein jab utha qadam, to aik kya hai hazar kya.

Wo jo rabt tha ik darmiyan, hai nishan tak baqi kahan,
Na hi tu wo tu, na hi main wo mein, to shanidan-o-guftar kya.

Aaya tha khud phir daam mein, paya tujhe ina'm mein,
Aabad ho phir aashiyan, ab tu bhi hai taiyyar kya.

Wa'don se behlana tera, qimat meri aana tera,
Boli lagane wala meri, hai koi kharidar kya.

Ye ishq hai kaisi bala, jise dekho wo hai mubtila,
Ab kaun de kisko shifa, hain tabib sab beemar kya.

Jo bhi sach tha maine sab kaha, kehne ko kya baqi raha,
Aaye yaqin kyunkar tumhein, karun jan apni nisar kya.

Na fasad koi na hadisa, na hi shor, matam-o-marsiya,
Hai amn sare shehr mein, hai purana ye akhbar kya.

Kamzarf, kamtar, kam-nazar, kehlate hain ahl-e hunar,
'Sagar' sukhan kar bar-taraf, khoyega apna waqar kya.


137. Ghazal:

Kamal hi kamal hai,
Ufaq pe bhi gulal hai.

Teri ghazal pe tabsara?
Kahan meri majal hai.

Hain iste'are khoobtar,
Hasin ist'mal hai.

Ye kaun mah-ru chala,
Qamar si chal-dhal hai.

Misal dun mein kis tarah,
Tu khud mein be-misal hai.

Jigar ke khoon se mere,
Hina ka rang lal hai.

Jawab phir wahi mera,
Wahi tera sawal hai.

Sabhi ka mauj ki tarha,
Urooj hai, zawal hai.

Tere kam na aa saka,
Mujhe yehi malal hai.

Zara sa but ko chhu liya,
Haram mein ab wabal hai.

Wo sar liye hain god mein,
Kya waqt-e inteqal hai?

Liye chale hain kandhon pe,
Ghazab ki dekh-bhal hai.

Kahan talak likhe koi,
Ye 'Sagar-e khayal' hai.


136. Ghazal:

Tamanna hai bahut lekin, irada kham hai ab bhi,
Pas-e deewar baitha, aashiq-e nakam hai ab bhi.

Jahan bhar ke mazalim mujh pe aayad kar diye usne,
Meri barbadiyon ka mujh pe hi ilzam hai ab bhi.

Purane aa'ine ko tod kar gham to hua lekin,
Khushi hai aa'inadari, hamare nam hai ab bhi.

Ye rah-e Haq hai ham-asro, shahadat iski manzil hai,
Agar hamrah chalna ho, sala-e aam hai ab bhi.

Talab hai uski jo roohon mein khinchti ho, mere saqi,
Tere meykhane mein tanha ye tashnakam hai ab bhi.

Hai majburi tumhare sath abhi mein aa nahi sakta,
Jise takmil karna hai, zaroori kam hai ab bhi.

Zaban par meri uska nam tak aaya nahin 'Sagar',
Magar shayar to shayar hai, wo hi badnam hai ab bhi.


135. Ghazal:

Hamsafar hath liye hath mein chalte rehna,
Thokarein kha ke bhi har bar sambhalte rehna.

Aap se shikwa nahi, koi shikayat bhi nahin,
Hamne seekha hai harek hal mein dhalte rehna.

Hath thama hai nibhayenge harek hal mein ham,
Apni aadat mein nahin dost badalte rehna.

Zindagi sham'a ki manind hui jati hai,
Raushani bantna logon mein, pighalte rehna.

Khud fana ho ke bhi rahon mein ujala kar do,
Hai charaghon ka faqat kam hi jalte rehna.

Janta hun mein tujhe, teri ab ye aadat hai,
Khud-farebi ke sabab, khud ko hi chhalte rehna.

Ja raha hun mein teri duniya se ab door kahin,
Mein chala jaun to phir, hathon ko malte rehna.

Jab bhi 'Sagar' se koi pyasi nadi aa ke mili,
Usko dekha hai liye mauj, uchhalte rehna.


134. Ghazal:

Khuli fazaon ka wo aadi, shehzadi.
Tune ik bedi pehna di, shehzadi.

Khata kisi ki ho par us par guzri hai,
Hardam tune usko saza di, shehzadi.

Diwana aaya hai sab mohtat raho,
Poore shehr mein phiri munadi, shehzadi.

Teri shadi ke din ek diwane ne,
Basti-basti aag laga di, shehzadi.

Bhatak raha tha diwana ik aas liye,
Parbat-parbat, wadi-wadi, shehzadi.

Jism tha qaidi, rooh agar aazad rahi,
Usne ye deewar gira di, shehzadi.

Tere lab par aik tabassum ki khatir,
Usne apni umr gawan di, shehzadi.

Bat zara si thi lekin 'Sagar ji' ne,
Us pe poori ghazal suna di, shehzadi.


133. Ghazal:

Aate hi uske bazm ki rangat badal gayi,
Ik aah-e sard honthon se sab ke nikal gayi.

Barson se jo jami thi yahan par ana ki barf,
Adna se uske lams se pal mein pighal gayi.

Roke meri sada ko hai ye kis ke bas ki bat,
Aansu bahe to aahani deewar gal gayi.

Tanha andheri raat mein, tufan ke samne,
Lau tharthara rahi thi magar ab sambhal gayi.

Ik musht-e khak ki tarah le kar chala tha mein,
Dekha to umr hath se mere phisal gayi.

Bazm-e sukhan mein, main to nahin ja saka, magar,
Is bar uski bazm mein meri ghazal gayi.

Sheeshe mein hamne dhali jab do-aatishi sharab,
'Sagar' si zindagi mere she'ron mein dhal gayi.


132. Ghazal:

Jo mil ke door jate ho, mujhe achchha nahin lagta,
Sitam ye mujh pe dhate ho, mujhe achchha nahin lagta.

Hazaron imtihanon se guzar kar mein yahan pahuncha,
Tum ab bhi aazmate ho, mujhe achchha nahin lagta.

Hamare sath kal tak tum chaman mein phool bote the,
Tumhin kaante bichhate ho, mujhe achchha nahin lagta.

Mein waqif hum tumhare doston ke asli chehron se,
Agarche tum nibhate ho, mujhe achchha nahin lagta.

Nishana ban raha hun mein jahan ke tanz-o-ta'anon ka,
Aur tum daman chhudate ho, mujhe achchha nahin lagta.

Bura lagta hai apni bat jab samjha nahin pata,
Samajh jab tum na pate ho, mujhe achchha nahin lagta.

Ye behis log hain 'Sagar', taranon ke hain shaidai,
Ghazal tum kyun sunate ho, mujhe achchha nahin lagta.


131. Ghazal:

Chaha magar jata na saka, aur bat hai,
Tu mere sath aa na saka, aur bat hai.

Mujhko tu bazm-e ghair mein pehchan to gaya,
Badh ke gale laga na saka, aur bat hai.

Sakit rahi zaban mujhe dekh kar wahan,
Aansu magar chhupa na saka, aur bat hai.

Nazrein bayan kar gayin majbooriyan teri,
Lafzon mein tu bata na saka, aur bat hai.

Yun hi likha tha nam mera ijtirab men,
Phir usko wo mita na saka, aur bat hai.

Khairat kar raha tha jahan ko wo, aur mein,
Dast-e talab badha na saka, aur bat hai.

Shamil hai meri rooh ki gehraiyon mein tu,
Mein tera lams pa na saka, aur bat hai.

Koshish to har tarah se bahut ki raqib ne,
Wo mera sar jhuka na saka, aur bat hai.

'Sagar' suna raha hai kisi aur ki ghazal,
Apna likha suna na saka, aur bat hai.


130. Ghazal:

Usne apna bana liya shayad,
Aik dhokha sa kha liya shayad.

Chand sharma raha hai, usne phir,
Rukh se parda hata liya shayad.

Uske kooche mein chhod aaya tha,
Dil kisi ne utha liya shayad.

Mandiron mein wo ab nahin jata,
Jo tamanna thi pa liya shayad.

Mujhko na pa ke un lakeeron mein,
Hath usne jala liya shayad.

Harek misra ghazal ka rangin hai,
Khoon-e dil bhi mila liya shayad.

Ab hua shayari ka khabt use,
Nam kafi kama liya shayad.

Rah kyun dekhte ho 'Sagar' ki,
Phir kisi ne bitha liya shayad.


129. Ghazal:

Uski aankhon ka fusun na kam hua,
Tha ba'is-e zakhm, ab marham hua.

Sun ke meri dastan, pehle pehal,
Chashm-e hairat tha, wo chashm-e nam hua.

Nargisi aankhon se qatra jo gira,
Shab ko moti, subh ko shabnam hua.

Uski aankhein dekh kar yun ashk-bar,
Khoon se labrez jam-e Jam hua.

Tham gaye aansun jo uski aankh mein,
Gham na hone ka phir usko gham hua.

Tak rahi hai chashm-e hairan se hayat,
Mar gaya hun, par nahin be-dam hua.

Hai nigahon mein ab uski be-rukhi,
Wo na jane kisliye barham hua.

Jo nahin masjud, sajda kyun karun?
Ye kaha, aur qissa-e Aadam hua.

Uth gaya 'Sagar' jahan se al-gharaz,
Aankh bheegi, na koi matam hua.


128. Ghazal:

Ye manzil hai ajab hairat ke ja ki,
Hua ruhani ab ye jism khaki.

Bhatakta phir raha hun dar-ba-dar mein,
Hai jab se tod di zanjeer pa ki.

Rafiqon ne nibhai dosti yun,
Ke dushman ne mere haq mein dua ki.

Yaqinan ye qatlnama hai mera,
Muhr is pe hai mere aashna ki.

Meri khilwat mein aksar chupke-chupke,
Chali aati hai yad us be-wafa ki.

Nahin hashmat-o-jah ki aarzu hai,
Woh daulat ishq ki mujhko ata ki.

Chale aao yahan tum be-hichak ab,
Gira deein maine diwarein ana ki.

Tere maikhane mein hain rind sare,
Mujhe mohtat rehne de ai saqi.

Qalam hargiz nahin 'Sagar' thamegi,
Rahegi jab talak ik sans baqi.


127. Ghazal (Khitab ba-adu):

Aik mein aur aik tu,
Bahami hai justaju.

Dil mein tere ja karun,
Thi ye pehle aarzu,

Par zalalat dekh ke,
Aankh se tapka lahu.

Kahan nahi talash ki,
Hamne teri, ai adu,

Chhup ke aata tha yahan,
Aaj tu hai ru-ba-ru.

Daanv par lagi hai ab,
Mulk bhar ki aabru,

Sarhadon pe aag hai,
Hai qalam bhi jang-ju.

Mein hun 'Sagar' be-muhit,
Tu zara si aab-ju.


126. Ghazal:

Hamara dil jo toota hai, tumhari hi inayat hai,
Aur is pe hamse kehte ho, "Hamein tumse shikayat hai".

Teri maujudgi ka har ghadi ehsas rehta hai,
Gulon ke rang mein bhi to, tumhari hi shabahat hai.

Khataon par teri hun mein bhi sharminda bahut, lekin,
Jo badh kar hath na thaamun, to phir kaisi rifaqat hai.

Mujhe logon ki han mein han milana hi nahin aata,
Ab is pe wo samajhte hain, ki ye meri himakat hai.

Buri sheh hai ki sachchi bat ko mein muhn pe kehta hun,
Karun mein jhoothi ta'arifein, nahin ye meri aadat hai.

Zaroori hai ki ham mandir-o-masjid mein Use poojein?
Kisi ke ashk ham paunchhein, ye bhi Uski ibadat hai.

Kahan tak tum nibhaoge, hamara sath ai 'Sagar',
Ki hamse to zamane bhar ko, khwah-ma-khwah adawat hai.


125. Ghazal:

Ab kahan,
Sayban.

Fa'ash hai,
Aasman.

Sun zara,
Mehrban.

Dukh bhari,
Dastan.

Ek tha,
Aashiyan.

Tha chaman,
Khushnuman.

Zeest thi,
Shadman.

Aa gaye,
Ham kahan.

Bin tere
Jan-e Jan.

Na koi,
Ham-zuban.

Na koi,
Razdan.

Raz-e dil,
Hai nihan.

Mera gham,
Bekaran.

Jism hai,
Na-tawan.

Rooh hai,
Bezuban.

Ghaur kar,
Badguman.

Lazzatein,
Ab kahan.

Tu wahan,
Mein yahan.

Jalwatein,
Hain wahan.

Khilwatein,
Hain yahan.

Zindagi,
Raygan.

Ye ghazal,
Qadradan

Hai tera,
Hi bayan.

Aa bhi ja,
Nagahan.

Aik 'Sagar'
Darmiyan.


124. Ghazal:

Hoga tera ehsan ziyada,
Rah na kar aasan ziyada.

Oonche sur mein bol raha hai,
Hakim se darban ziyada.

Hun pehle se ranj-o-alam mein,
Kar na mujhe pareshan ziyada.

Khirad hi koi rah nikaale,
Dil to hai nadan ziyada.

Wo hi door raha karta hai,
Jiska hai arman ziyada.

Ghuncha-ghnucha chatak raha hai,
Labon ko de muskan ziyada.

Pheeke hain pakwan sabhi ke,
Oonchi hai dukan ziyada.

Sare hukm bajane par bhi.
Ham hain na-farman ziyada.

Aao chalein sehra mein 'Sagar',
Ghar to hai veeran ziyada.


123. Ghazal:

Meri zindagi ka jo khwab hai,
Wo haqiqaton ka sarab hai.

Kahan jayenge tujhe chhod kar,
Kahin tujh sa koi manab hai.

Tujhe naz hai teri jah par,
Teri zeest misl-e hubab hai.

Mujhe subah hi se hai bekali,
Wohi dard-e khana-kharab hai.

Jo bhi hon sawal tu kar guzar,
Mere pas sabka jawab hai.

Tujhe kehna hans ke al-vida,
Mujhe sabse badh ke azaab hai.

Tune mujh pe jitna karam kiya,
Wo hai be-baha, be-hisab hai.

Tujhe chahta hun mein be-panah,
Ye ghazal ka lubb-e lubab hai.

Teri madah 'Sagar' kya likhe,
Mere maula tu la-jawab hai.


122. Ghazal:

Kehna tha so keh diya, ab ji mein jo aaye wo kar,
Sar hatheli par liya, ab tegh-e qatil be-asar.

Ye kaha tha mohtaram, ai muntazim, aali mizaj,
Ret pe pani baha ke, hamne dekha hai asar.

Apka kehna baja hai, par guzarish hai meri,
Jo kiya hai arz maine, daliye us par nazar.

Hamne mana aap hi bas, aalim-o-mukhtar hain,
Hamne dekhein hain shajar bhi, sarv-qamat, be-samar.

Sochte hain aap shayad, hai hukumat ta-ajal,
Par kabhi socha ke hasti, khak hai-o-mukhtasar.

Khamoshi se gar suni hain, lantarani aapki,
Pas tha mujhko adab ka, warna leta mein khabar.

Aapne samjha ye hoga, hai ye banda be-amaan,
Jabr se isko daba ke, launga zer-e asar.

Kya nahin ma’lum tha ye, bekas-o-mazlum ki,
Aah jab niklegi dil se, hoga phir nazil qahar.

Ye zaban-bandi ke fatwe, ye mazalim, ye sitam,
Sha’iran-e dehr ko pahuncha sakenge kya zarar.

Kam logon ka hai bas tanqid ahl-e kar ki,
Tujhko jo karna hai ‘Sagar’, than le aur kar guzar.


121. Ghazal:

Jitne the she'r wo sabhi tamam ho gaye,
Ham hal-e dil sunane mein nakam ho gaye.

Achchha hua ke mujhse tum kai din khafa rahe,
Jo multawi the mere kai kam ho gaye.

Aa ke jo tumne dast-e shifa dil pe rakh diya,
Jitne the zakhm ba'is-e aaram ho gaye.

Ik aah bhi na nikli kabhi lab se hamnashin,
Kis sadgi se ham yahan badnam ho gaye.

Paanv mein usne ik hasin zanjeer dal di,
Ham dil ke badshah the, par ghulam ho gaye.

Tere baghair nala-o-zari-o-ashk-o-gham,
Hamrah apne da'im-o-mudam ho gaye.

'Sagar' miyan ko izzat-o-ejaz mil gaya,
Aur apni jila-watani ke ahkam ho gaye.


120. Ghazal:

Phir ye toota hua sahara hai,
Dil mera aaj bhi tumhara hai.

Meri daulat, mata'-o-sarmaya,
Sath mein waqt jo guzara hai.

Zakhm koi nahin jo dekh sake,
Teer aisa jigar pe mara hai.

Aap jis had talak nazar aayein,
Mujhko majhdhar bhi kinara hai.

Mere pehlu mein raha karta tha,
Aasman pe jo ye sitara hai.

Aap ne ghaur nahin kiya shayad,
Jo kaha, arz wo dobara hai.

Aa ke 'Sagar' wo kash ye keh dein,
"Ye jo diwana hai, hamara hai."


119. Ghazal:

Dil ko tere jamal ne be-iman kar diya,
Paida tere wisal ka arman kar diya.

Jata tha le ke phir mujhe maqtal ko dil mera,
Achchha hua khirad ko nigehban kar diya.

Qatra-qatra chand ko hamne nichod kar,
Us mah-ru ke ghusl ka saman kar diya.

Wo maalik ul-malayak-o-abd-e Ilah tha,
Iblis ko ana ne hi Shaitan kar diya.

Pehle to be-zubanon mein dali gayi zuban,
'Sakit raho' ye ba'd mein farman kar diya.

Ik zakhm de ke tumne mujhe sari umra ko,
Ik dard ko jigar mein hai mehman kar diya.

'Sagar' hisar-e yas mein tha munjamid, magar,
Chhu kar ye kisne phir mujhe insan kar diya.


118. Ghazal:

Uska jaise udhaar baqi hai,
Jan karna nisar baqi hai.

Barson pehle jo pi thi nazron se,
Uska ab tak khumar baqi hai.

Ik ghazal zindagi mein utri hai,
Jisko dena nikhar baqi hai.

Sadiyon pehle jahan se guzre the,
Raushni ki qatar baqi hai.

Dil mera Karbala hai muddat se,
Ab bhi cheekh-o-pukar baqi hai.

Sha'iri zeest ban gayi lekin,
Sha'iron mein shumar baqi hai.

Go hararat nahin hai ab 'Sagar',
Ishq ka par bukhar baqi hai.


117. Ghazal:

Lauta watan ko jab mein, barson ki hijraton se,
Khud apne ghar ko paya, ma'mur zulmato se.

Jis hal mein jiya hun, tujhse bichhad ke janan,
Hai khauf mehfilon se, aur uns khilwaton se.

Tum apne gham se bojhil, masruf, kar-farma,
Mein door hi se tumko, takta hun ulfaton se.

Tere baghair mujhko, kuchh soojhta nahin hai,
Ab tang aa gaya hun, mein apni fursaton se.

Har roz tera kamra, ham khud sanwarte hain,
Majboor hain kuchh aise, ham apni aadaton se.

Sairab hamko kar do, tum apni khak-e pa se,
Ushshaq ki sada ye, aati hai turbaton se.

Tere dar ka mein gada hun, teri deed ka hu talib,
Mujhko garaz nahin hai, duniya ki hashmaton se.

Kal tak janab-e aan the, mere harif-e a'azam,
'Sagar' nawazte hain, ab mujhko izzaton se.


116. Ghazal:

Ta-umra tera muntazir, ik mein hi tha,
Nazrein bichhaye rah par, ik mein hi tha.

Bazm-e aasaish mein sab masrur the,
Jo gaya tha daar par, ik mein hi tha.

Aap hi duniya mein the bas sarfaraz,
Be-asar, na-motabar, ik mein hi tha.

Yun ayadat ko to aaye dost sab,
Tha agar koi charagar, ik mein hi tha.

Kar diya mismar logon ne use,
Aik hi tha mera ghar, ik mein hi tha.

Mein khud apne aap mein tha karvan,
Rehnuma ya raahbar, ik mein hi tha.

Har kas-o-nakis tha 'Sagar' ka murid,
Na hua jispe asar, ik mein hi tha.


115. Ghazal:

Ajab si hai kashish, mujhko jo teri or kheenche hai,
Tu mere samne hai, aur duniya mere peechhe hai.

Hun musht-e khak, na jane hawa mein kab bikhar jaun,
Wo bachche ki tarah is waqt to muththi ko bheenche hai.

Koi sapna, haqiqat ka use ehsas deta hai,
Wo bedari mein bhi apni hasin aankhon ko meenche hai.

Bahut chaha, mein teri zindagi se dur ho jaun,
Mein khud ko rokta hun, phir bhi koi dor kheenche hai.

Ye insan zindagi apni, jehannum khud banata hai,
Jise kehte hain jannat, Ma ke wo qadmon ke neeche hai.

Khila karte hain boote isliye 'Sagar' ki ghazlon mein,
Wo apni har ghazal ko rat-din, ashkon se seenche hai.


114. Ghazal:

Ham ko un mein kya nazar aata hai na pooche koi,
Is jahan-e soz mein, hai saz kya pooche koi.

“Aur mil jayenge tum jaise bahut”, usne kaha,
Phir unhein ham jaisa hi kyun chahiye, pooche koi.

Tumne poocha hi nahin meri udasi ka sabab,
Ab to ye ji chahta hai, kuchh bhi na pooche koi.

Ham rahe had-e adab mein, khul ke na poocha kabhi,
Kya unhein bhi ishq hai, kaise bhala pooche koi.

De rahe hain jo duhai, haqq-e insani ki aaj,
Kal kahan the nawhagar, ye bhi zara pooche koi.

Aapke rehne hi se ye dil ki basti shad thi,
Kaise-kaise log phir aaye yahan, pooche koi.

A’itraf-e ishq par bole wo mujhse hashr mein,
“Aise bhi kya sabke aage, ai Khuda pooche koi?”

Yun to hai pursish sabhi ko, raz hai kya ‘noor’ ka,
Ho magar jab wo muqabil, tab zara pooche koi.

Sha’yari mein kar diye hain raz apne aashkar,
Padh ke samjhein mohtaram, mujhse na kuchh pooche koi.

Kam zaari se na nikla, tab uthai thi qalam,
Aap ko ‘Sagar’ miyan, phir bhi nahin pooche koi


113. Ghazal:

Adna si bat badh ke jo takrar ho gayi,
Koshish use manane ki bekar ho gayi.

Ik pyar ki imarat, banayi thi pyar se,
Nafrat ki thokaron se jo mismar ho gayi.

Tere baghair koi kami si to hai magar,
Aisa nahi hai zindagi dushwar ho gayi.

Bhule se na karenge bharosa razil par,
Ghalti ye hamne mana ke ik bar ho gayi.

Nazon se tujhko pala tha hamne ai zindagi,
Ishq-e qaza mein tu bhi giriftar ho gayi.

Girdab mein jab aa gayi kashti, ai nakhuda,
Himmat hamari toot ke patwar ho gayi.

'Sagar' jo hamne aaj uthai hai phir qalam,
Surat tumhari zehn mein gulzar ho gayi.


112. Ghazal:

Sab kuchh mujhe mila hai tere sath ki siwa,
Jo chahe mujhse bat karo is bat ke siwa.

Aaya naya nizam nai raushni ke sath,
Sab kuchh badal gaya mere halat ke siwa.

Patjhad ke ba'd aai hai, gulshan mein phir bahar,
Aankhon mein koi mausam nahi barsat ke siwa.

Wo rat jiski subh mein pinha thi hijratein,
Kuchh bhi nahi hai yad mujhe us rat ke siwa.

Tanha hain ham bisat pe, kiska karein gila,
Kya koi rasta nahi hai mat ke siwa?

Aadat nahi hai jhooth ki, sakit hun isliye,
Kuchh aur bat kijiye sawalat ke siwa.

'Sagar' ki khwahish aakhirash poori nahi hui,
Chaha hi kya tha usne mulaqat ke siwa.


111. Ghazal:

Aashiqi mein nam apna kar liya,
Aur har ilzam apne sar liya.

Rehzani ka ab koi khatra nahin,
Khoob chunkar aapne rehbar liya.

Mere saqi! phir tera israr tha,
Ehtaraman ghoont hamne bhar liya.

Jo mila hai ghaib se behtar mila,
Jo liya khud se wahi kamtar liya.

Kar diya hamne ta'alluq jab qata'
Nam uska phir nahin lab par liya.

Ab to hai mujhko bhi jarrahi talab,
zabt jitna kar saka tha, kar liya.

Aa rahi thi neend rote-rote jab,
Hamne teri yad ka bistar liya.

Qatl se kab tak darein 'Sagar' miyan,
Qatilon ke shehr mein ab ghar liya.


110. Ghazal:

Mile hain ahl-e kiram mujhko,
Ata kiya gham mudam mujhko.

Bichhad ke rehna hi zindagi hai,
To zindagi hai haram mujhko.

Teri muhabbat ne umra bhar ka,
Bana diya hai ghulam mujhko.

Agar mein lauta dun dil tumhara,
Milega phir kya in'am mujhko.

Ab aisi bhi kya khata hai meri,
Kabhi na bheja payam mujhko.

Jo kal talak bak rahe the gali,
Wo kar rahe hain salam mujhko.

Milunga fursat mein tumse 'Sagar',
Sunana phir tum kalam mujhko.


109. Ghazal:

Ye rang aur ye jamal tera,
Mein chahta hun wisal tera.

Nahin rihai ki justju hai,
Bhala hai zulfon ka jal tera.

Rakha hai ab tak sanjo ke hamne,
Kabhi mila tha rumal tera.

Kahan hai quwat dil-e hazin mein,
Jo dekh paye jalal tera.

Tere raqibon ka tazkira hai,
Hai unko bhi ab malal tera.

Wahi jawaban khamoshi meri,
Wahi hai phir bhi sawal tera.

Mein muntazir hun 'Saba' ka kab se,
Sunaye mujhko jo hal tera.

Jo keh na paya, kaha ghazal mein,
Hai ye bhi 'Sagar' kamal tera.


108. Ghazal:

Sang mere khwab dekhiye,
Zeest lajawab dekhiye.

Ho teri nigah-e mast to,
Kyun bhala sharab dekhiye.

Na kabhi gahan jise lage,
Ghar ka mahtab dekhiye.

Har koi hai dekhta use,
Mera intekhab dekhiye.

Ba'd-e ghusl ro diye sabhi,
Phoot kar hubab dekhiye.

Do ghadi hamari simt bhi,
Dekhiye janab dekhiye.

Chuk gaye sawal aapke?
Ab mera jawab dekhiye.

Husn-e bemisal dekh kar,
Ishq behisab dekhiye.

Kar raha hun aaj aap par,
Jan intesab dekhiye.

Harf-harf bargh-e gul mera,
Lafz mein gulab dekhiye.

Aap hi ke nam se 'Sagar',
Ab hai qamiyab dekhiye.


107. Ghazal:

Mujhe tu kab ye kamaal dega,
Mere junun ko jamal dega.

Jawab jitne mein chahe de dun.
Naya wo phir ik sawal dega.

Alam mein bhi munfahil tabassum,
Wo meri janib uchhal dega.

Wo sadgi hai tere bayan mein,
Zamana teri misal dega.

Chahe musibat ki ye ghadi hai,
Yaqin hai mujhko nikal dega.

Karun mein israr chahe jitna,
Mein janta hun wo taal dega.

Mujhe aqida hai mere Rab pe,
Wo rizq dega, halal dega.

Jo gham ya khusiyan milengi 'Sagar',
Ghazal ke paikar mein dhal dega.


106. Ghazal:

Tumhare chand se rukh se koi chehra nahin milta,
Koi 'Sagar' tumhari aankh se gehra nahin milta.

Liye parcham baghawat ka 'alambardar nikle hain,
Aman ka koi bhi parcham kahin phehra nahin milta.

Wo nale sunte to hain par zuban se kuchh nahi kehte,
Yahan goonge hain sab ke sab, koi behra nahin milta.

Mujhe zindan mein bhi rakh kar, na harghiz rok paoge,
Meri takhliq ki parwaz par pehra nahin milta.

Zamane ki kharashon ne meri surat badal di hai,
Kisi tasveer se meri, mera chehra nahin milta.

Jo tashna-lab hai, pyasa hai, use dariya ki chahat hai,
Jo dariya ban ke behta hai, use sehra nahi milta.

Sabhi ko khwahishein hain, kuchh na kuchh pane ki ai 'Sagar',
Sabhi ik daud mein hain, koi bhi thehra nahin milta.


105. Ghazal:

Mein Apni zindagi ke pal, tumhare nam karta hun,
Hai mujhko jo bhi kuchh hasil, tumhare nam karta hun.

Tumhien ko chahta hun, bas yehi aa'mal hai mera,
Adhoora hai ya hai kamil, tumhare nam karta hun.

Kahin ilzam aa jaye na tujh par qatl karne ka,
Khud apne sar ko ai qatil, tumhare nam karta hun.

Ye jab tak pas tha mere, tumhari hi amanat thi,
Bade nazon se pala dil, tumhare nam karta hun.

Chala jaunga mein be-khauf ho ke dasht-e wehshat mein,
Safar mein tum na ho shamil, tumhare nam karta hun.

Tumhare hi takhayyul mein, hasin lafzon ko chunta hun,
Rozana phir mein nayi ghazal, tumhare nam karta hun.

Mera paigham 'Sagar' us talak, pahunche ya na pahunche,
Hai chyunki door ab sahil, tumhare nam karta hun.


104. Ghazal:

Ab to wo pas hain,
Zer-e ehsas hain.

Ik naya daur hai,
Naye aasas hain.

Har koi a'am hai,
Sirf wo khas hain.

Bai's-e shayari,
Chand ashkhas hain.

Kal talak shah the,
Aaj raqqas hain.

Sab ke sb maiqade,
Ja-e ijlas hain.

Chand misre mujhe,
Misl-e almas hain.

She'r-o-naghme mere,
Gham ke akkas hain.

Dost 'Sagar' mere,
Ahl-e ikhlas hain.


103. Ghazal:

Chhupa rakhe hain kya-kya raz hamne is zamane mein,
Labon ko si liya hamne, kaha na kuchh zamane mein.

Shab-e hijran-o-tanhai, hujum-e yas-o-sham-e gham,
Tumhare bin saha karte hain, kya-kya kuchh zamane mein.

Mujhe to tum mere khwabon ki ik ta'bir lagti ho,
Tumhare jaisa hoga kya koi sachmuch zamane mein.

Mujhe dekho, mein sar-ta-pa, muhabbat hi muhabbat hun,
Muhabbat ka suna hoga faqat charcha zamane mein.

Irada ho agar pukhta to rahein khud nikalti hain,
Zamane ko badal de jo, ruka hai kab zamane mein.

Ye tujh par hai, tu kya chunta hai apni zeest ka maqsad,
Bahut umda, bahut ghatiya, sabhi kuchh hai zamane mein.

Khuda bakhshe! magar ye to tabahi ki alamat hai,
Zamane ki nahin sunta hai koi ab zamane mein.

Zamana khud-ba-khud choome tere qadmon ko ai 'Sagar',
Kuchh aisa bhi tumhein kar ke dikhana hai zamane mein.


102. Ghazal:

Ajab ye mojiza hai, kya tumhein ehsas hota hai?
Jahan bhi jaun dil mera tumhare pas hota hai.

Bahut se log milte hain, safar mein, zindagani mein,
Magar bas ek hota hai, jo khas-m-khas hota hai.

Agarche bat bhi na ho, magar jab tak nahin dekhun,
Nazar bechain hoti hai, ye dil udas hota hai.

Mein jab chalta hun tumse door, keh kar 'Alvida Janan',
To phir har gam pe hamrah, hujum-e yas hota hai.

Zamane par ayan karte nahin majbooriyan apni,
Wo khud mohtat rehte hain, mujhe bhi pas hota hai.

Jo kehna chahta tha mein, suna usko nahi hargiz,
To ab mein wo hi kehta hun, jo tumko ras hota hai.

Hai fitrat uski ai 'Sagar', jigar ko cheer dene ki,
Magar ham sath rakhte hain, ke jo almas hota hai.


101. Ghazal:

Hamare laut aane se nafa kisko, zarar kisko,
Mera matam manane ki saza kisko, asar kisko.

Ye sach hai ke harek zarre mein Wo hazir-o-nazir hai,
Magar jo dekh sakti hai Wo deta hai nazar kisko.

Bharam ye hai yahan par mein bahut khurram-o-shadan hun,
Mere barbad rehne ki wahan par hai khabar kisko.

Tumhare rukh ki tabani, hai mere ishq se qayam,
Mujhe khursheed kehte ho, to kehte ho qamar kisko.

Baha dariya mein har neki, yahi dastur-e duniya hai,
Ke kaun ashjar bota hai, milte hain samar kisko.

Tere maikhane mein saqi, jo tashna-kam baithe hain,
Kise tum doge jam-e mey, aur doge zehar kisko.

Tere ash'aar ke 'Sagar', ajab asarat hote hain,
Ke sozish kaun pata hai, milte hain sharar kisko.


100. Ghazal:

Jeena muhal, marna bhi dushwar ho gaya,
Jab se ye jana maine, mujhe pyar ho gaya.

Kuchh tu ne apna wasta de kar mana liya,
Kuchh dil se apne mein bhi khud lachar ho gaya.

Tere khyalon mein liye baitha tha qalam ko,
Ghazlon ka ek zehan mein gulzar ho gaya.

Jab tak raha wo dil mein tere iqrar tha magar,
Kaise wo lab pe aate hi inkar ho gaya.

Jana pada tha kal mujhe dushman ki gali mein,
Kuchh doston se bhi wahan do-char ho gaya.

Jab bhi liya hai dil se maine, mushkil-kusha ka nam,
Mushkil se mushkil rasta hamwar ho gaya.

Kal maine 'Sagar' bazm mein chhedi nai ghazal,
Dekha jab unki janib se israr ho gaya.


99. Ghazal:

[Allama Shibli Nomani (1857-1914) ki mashoor ghazal - Yar ko raghbat-e aghiyar na hone paye - se muttasir ho ke kahi hai]

Ye nahi kehta tujhe pyar na hone paye,
Han magar ku-ba-ku, akhbar na hone paye.

Naz se hamne sajaya hai gharonda dil ka,
Teri thokar se ye, mismar na hone paye.

Ba'd muddat ke mere dil ne shifa payi hai,
Ab kahin phir se ye, bimar na hone paye.

Dar pe sar ko jo rakha to yahi socha tha,
Ba'd mere koi, sar-e dar na hone paye.

Manzil-e ishq ko jate to ho mehboob mere,
Par ana raah mein deewar na hone paye.

Apni tanhai ke sho'lon mein jale ham tanha,
Dost hamdard bane, ghamkhwar na hone paye.

Unki aankhon se ayan hoti hai ulfat meri,
Phir bhi ye zidd hai ke iqrar na hone paye.

Mere ghar aane ka wada to kiya hai tumne,
Aate-aate kahin, inkar na hone paye.

Dost sab poochte hain 'Sagar' sabab ghazlon ka,
Itna mohtat hun, izhar na hone paye.


98. Ghazal:

[Ghalib ki zamin pe]

Wo ik sawal ki surat tumhare ru-ba-ru kya hai,
Kalam jab nahin karte tumhin, to guftgu kya hai.

Tere visal ki hasrat mere dil mein rahi pinha,
Agarche tune to poocha tha meri aarazu kya hai.

Teri qurbat se badhkar kuchh nahin mere liye janan,
Bahisht cheez kya hai, aur jahan-e rang-o-bu kya hai.

Harik manzil ko pa ke main, safar par phir nikalta hun,
Mujhe khud hi nahin ma'lum mujhko justaju kya hai.

Ye mana aapne rasman mujhe ghar pe bulaya tha,
Hamare ishq ka charcha, magar ye ku-ba-ku kya hai.

Mujhe aankhon mein hardam ik nami mehsus hoti hai,
Nahin ma'lum padta wo hai aansu ya lahu, kya hai.

Suluk uska zara dekho tum apne sath ai 'Sagar',
Use tum dost kehte ho, to bolo phir adu kya hai.


97. Ghazal:

Ye kahan ki ulfat hai door-door rehte ho,
Mere to na ban paye, mujhko apna kehte ho.

Mil ke baant lenge ham, ranj aur khushi apni,
Dard phir jo hota hai, kyun akele sehte ho.

Mera kuchh kaha tere, dil ko lag gaya shayad,
Bat bhi nahi karte, khoye-khoye rehte ho.

Mujhse jo shikayat hai, mujhse hi kaho mil ke,
Ghair se hi milte ho, ghair se hi kehte ho.

Thes jab bhi lagti hai, mera dil dhadakta hai,
Tum juda na ho jao, chasm-e tar mein rehte ho.

Kis tarah milun tumse, ek ja nahi rukte,
Aandhiyon se chalte ho, misl-e dariya behte ho.

Usne ye kaha 'Sagar' sun ke meri ghazlon ko,
"Kar diya hai dil-dadah, she'r aise kehte ho."


96. Ghazal:

Wa'az karne mein hi maharat hai,
Amal karne mein uski shamat hai.

Ban-sanwar ke wo ghar se nikle hain,
Aaj beemar ki ayadat hai.

Taj ke sath sar bhi udta hai,
Aapka khair se, salamat hai.

Aapki sun raha hun muddat se,
Kuchh kahun apni bhi, ijazat hai?

Aapse lun sila wafaon ka?
Phir to ye ishq bhi tijarat hai.

Sab ko bose milen, hamein gaali,
Ye kahan ki bhala sharafat hai.

Aiteraf kar le apni ghalti ka,
Dil mein sachmuch agar nidamat hai.

Dil mera ho gaya hai zaar sanam,
Sha'yari ab meri riyasat hai.

Aa rahe hain wo tere ghar 'Sagar',
Waqt se pehle hi qayamat hai.


95. Ghazal:

Tanz karna to unki aadat hai,
Aaj kuchh aur hi shararat hai.

Ghair se hans ke aap milte hain,
Aisi bhi hamse kya adawat hai.

Mujhse khwabon mein milte rehte hain,
Mujhpe unki badi inayat hai.

Jab bhi fursat ho aa ke le lena,
Mera dil aapki amanat hai.

Unke ghar ka tawaf karta hun,
Ye mere waste ziyarat hai.

Kya kahun apna hal-e dil janan,
Hal mera khud hi wazahat hai.

Mere lehje mein inkisari hai,
Mere purkhon ki ye virasat hai.

Sang-e marmar mein dil dhadakta hai,
Taj kehne ko ik imarat hai.

Rote bachhe ko gar hansao tum,
Ye bhi ik tarha ki ibadat hai.

Kal talak the jo rahzan mashoor,
Aajkal unki hi wazarat hai.

Tujhko 'Sagar' pata nahin shayad,
Sha'yari ishq ki alamat hai


94. Ghazal:

Tujhse wabasta zindagani hai,
Mukhtasar si meri kahani hai.

Had se zyada mein pyar karta hun,
Aapko bat ye batani hai.

Jab bhi fursat mile to suniyega,
Mujhko jo kehna hai, zabani hai.

Aaye jo dil mein, keh guzarta hun,
Meri aadat bahut purani hai.

Mein harek imtihan se guzra,
Aapko ab bhi badgumani hai

Wo hi dar-parda dastan mein hain,
Unko hi dastan sunani hai.

Aapse iltimas karta hun,
Mujhko ye rasm bhi nibhani hai.

Ik ghazal aur pesh-e khidmat hai,
Ismein bhi aapki kahani hai.

Mere she'ron ki 'rooh' mein 'Sagar',
Aapki be-baha nishani hai.


93. Ghazal:

Dard hai dawa nahin,
Koi hadisa nahin.

Mere waste yahan,
Tumne kya saha nahin.

Chot dil pe hai magar,
Lab pe bad-dua nahin.

Muskura rahein hain wo,
Jaise kuchh hua nahin.

Janta hun usko mein,
Aadmi bura nahin.

Qissa mukhtasar sa tha,
Tumne par suna nahin.

Apne aap ka to ban,
Mera gar hua nahin.

Rah paimai hai bas,
Koi irtiqa' nahin.

Aaj 'Sagar' keh bhi do,
Jo kabhi kaha nahin.


92. Ghazal:

Ab ye yaqin hota jata hai,
Tumse janmon ka nata hai.

Noor se koi aankhein bhar le,
Tera ismein kya jata hai.

Peeta hun mein khoon-e dil jab,
Tab wo lakht-e jigar khata hai.

Aaj ya kal ki bat nahin hai,
Jane wala kab aata hai.

Suraj sar par aa pahunche jab,
Nazrein kaun mila pata hai.

Ruth ke bhi wo ghair ki ghazlein,
Meri hi dhun mein gata hai.

Koi wafa ki bat kare to,
Dil ka dagh ubhar aata hai.

Sadiyon se dastur yahi hai,
Jo khota hai, wo pata hai.

Insan ki auqat nahin hai,
Dene wala to data hai.

Aam sa ik shayar hai vo bhi,
'Sagar' tujhko kyun bhata hai.


91. Ghazal:

Tu mere sath chal nahi sakta,
Mein bhi rasta badal nahi sakta.

Mein to gir kar sambhal bhi jaunga,
Tu gira to sambhal nahi sakta.

Mein to doobunga hi, magar tu bhi,
Is bhanwar se nikal nahi nahi sakta.

Is tarha munjamid hun mazi mein,
Aansuon se pighal nahi sakta.

Lo mera imtihan, jo lazim hai,
Mein kisi taur tal nahi sakta.

Hai jo jazba teri muhabbat mein,
Mere she'ron mein dhal nahi sakta.

Mulk talib hai pukhta-kari ka,
Sirf wa'don pe pal nahi sakta.

Tum jala sakte ho mujhe 'Sagar',
Mera diwan jal nahi sakta.


90. Ghazal:

Aap kehte hain ke mein she'r bahut kehta hun,
Pehle to jitna bhi ho sakta hai mein sehta hun.

Dard-e dil, soz-e jigar, ya koi pareshani,
Ya to she'ron mein ya phir, aapse hi kehta hun.

Hai ye rishta ke jise log samajhte hi nahin,
Hai jahan 'rooh' meri, mein bhi wahin rehta hun.

Na-mukammal hun abhi aik imarat ki tarah,
Roz banta hun mein, aur roz hi mein dhehta hun.

Ik tawaqqo si koi darmiyan rehti hai,
Na to wo kehta hai aur na hi mein kehta hun.

Meri fitrat hi mein hai naqd ka sauda karna,
Aapse ishq hai, bas isliye mein sehta hun.

Hun wahin par ki jahan, chhod gaye the mujhko,
Mein to 'Sagar' hun bhala, mein bhi kahin behta hun.


89. Ghazal:

Dil nahin chahta kuchh karne ko,
Rang jeevan mein apne bharne ko.

Har manazir ke jyun adhoora hai,
Tu nahin hai jo poora karne ko,

Ghar se bahar nikal nahin pata,
Ab yahi ghar hai jeene-marne ko.

Mere atraaf ana ka pehra hai,
Sakht pabandiyan kuchh karne ko.

Ab ke jab tu bhi ja chuka hai door,
Reh gaya kuchh nahin hai darne ko.

Zindagi ke udaas naqshe mein,
Waqt hi reh gaya hai bharne ko.

Tujhko 'Sagar' kyun yad karta hai,
Sirf panne siyah karne ko?


88. Ghazal:

Dil mein mere na koi bat rahi,
Apni ghazlon mein sari bat kahi.

Sabt hai dil pe vo tera milna,
Yun wo adna si wardat sahi.

Aapko dekh lun mein ji bhar ke,
Yad reh jayegi phir rat yahi.

Daanv pe khud ko ab lagaya hai,
Jeet ho achha, wagarna mat sahi.

Qais-o-Farhad se to waqif hain?
Ishq mein hain mere jazbat wahi.

Mein to shayar hun, tool deta hun,
Tum hi keh do jo bhi hai bat sahi.

Ye faqat tum ho jo mein sakit hun,
Warna kis ki hai meine bat sahi.

Aur 'Sagar' bhala kya dega tumhein,
Pesh karta hun mein naghmat yahi.


87. Ghazal:

Ghar se maqtal talak, rahon mein ujale kar dun,
Aur phir khud ko mein, qatil ke hawale kar dun.

Dard duniya ka liye dil mein yehi sochta hun,
Apna tan kat ke, bhookon ke niwale kar dun.

Jan-supari ki tamanna ho dilon mein paida,
Apne jazbat ko kuch aur jiyale kar dun.

Lafz meezanon pe bikte hain shikam ki khatir,
Mein jo chahun inhein, sangine-o-bhale kar dun.

Hai teri tegh se azmat mein giran meri qalam,
Nazm ko seena-sipar, she'ron ko risale kar dun.

Yun sukhanwar to bahut hain, magar ye zidd hai mujhe,
Apne ash'ar ko mein sabse nirale kar dun.

Ashk aankhon se baha karte hain hardam 'Sagar',
Bhar ke ghazlon mein inhein, rindon ke pyale kar dun.


86. Ghazal:

Bin tumhare nahi hai mera nibah,
Aa bhi jao ke muntazir hai nigah.

Sirf tumko jahan mein chaha hai,
Na koi jurm kiya hai na gunah.

Jo bhi mushkil ho, lekin sach bolo,
Bas ye hi adna si hai meri salah.

Aasi mujh sa nahin zamane mein,
Tu na dega to kaun dega panah.

Tujh se wabasta hai hayat meri,
Teri behbudi mein hai meri falah.

Ishq mein ham ko jina-marna hai,
Aap kije na zindagi ko tabah.

Jab tak 'Sagar' se teri duri hai,
Karta rahega yun hi kaghaz siyah.


85. Ghazal:

Jab tak nazar mein tum rahe nazzargi rahi,
Noor-e nazar ye aankh tumhein taakti rahi.

Ik zulm hai ke jeena pada hai tere baghair,
Zinda-dili nahi, to kya phir zindagi rahi.

Masrur kar gaya mujhe, apna bana ke wo,
Mujhko tamam umra ajab bekhudi rahi.

Us mah-ru ka apni zaban se liya tha nam,
Mere siyah ghar mein badi raushni rahi.

Mamnun mein raha tere akraam ka bahut,
Sar bhi jhuka raha o nigah bhi jhuki rahi.

Tere bina tha kaun meri manzil-e maqsood,
Ik bar mein jo bhatka to aawargi rahi.

Ye marz hi tha aisa koi karta kya shifa,
Sab charagar the sath par bechargi rahi.

Jab tak chala gaya na wo hadd-e nazar se door,
Tab tak meri nigah use dekhti rahi.

Mein bhi ajeeb justju mein mubtila raha,
Mil kar bhi us se mujh ko na aasudgi rahi.

'Sagar' tere kalam mein kuchh bat thi zaroor,
Jane ke bad duniya tujhe dhoondhti rahi.


84. Ghazal:

Dil tujh ko pa ke ba sad-aaram reh gaya,
Karna tha jo jahan mein wohi kam reh gaya.

Yaron ki mehfilon mein sab ghazlein huin tamam,
Dad-o-sana' to mil gaye, inam reh gaya.

Tum so gaye the sunte hi sunte wo dastan,
Aaghaz to hua magar anjam reh gaya.

Saf mein tha sabse peeche, saqi ka kya qusur,
Hathon mein tere khali agar jam reh gaya.

Khusbu, saba, bahar aur ghuncha-o-bargh-o-gul,
Rukhsat hue chaman se sab, gulfam reh gaya.

Ghazlein zaban-zad huin, maqbul ho gayien,
Shayar bechara muflis-o-gumnam reh gaya.

Sab apne-apne kam mein masruf hain bahut,
Karne ko ab faqat mujhe aaram reh gaya.

Hamne shikam ke waste becha nahin zamir,
Saiyyad liye khada hua ik dam reh gaya.

Sabki rihai ho chuki, laute sab apne ghar,
'Sagar' yahan faqat tu hi badnam reh gaya.


83. Ghazal:

Bahut din se tumhein mein ye batana chahta hun,
Kisi surat tumhein apna banana chahta hun.

Judai ki siyah raaton mein tum jagi ho ab tak,
Tumhein pehlu mein apne ab sulana chahta hun.

Wo jis ko sun ke ho jaye harek dil ko masarrat,
Mein koi geet aisa gungunana chahta hun.

Agar tu chand hai to sun le mein bhi tere sang-sang,
Sitaron ki tarah se jagmagana chahta hun.

Hawa mein teer jitne bhi chalane hon chalao,
Mein zad mein ho koi aisa nishana chahta hun.

Sadaqat ho to phir bejan patthar bolta hai,
Aqide ka asar tumko dikhana chahta hun.

Bahut mumkin hai ke ho jaye meri aa'inadari,
Mein apne aap ko 'rooh' se milana chahta hun.

Zamana har tarah se mujhko gar aazma chuka hai,
Mein 'Sagar' aap khud ko aazmana chahta hun.


82. Ghazal:

Bas ik qadam agar us din badha liya hota,
To dar haqiqat tujhe apna bana liya hota.

Sunaun hal-e dil tumko ye ab kahan mumkin,
Ai kash hal-e dil us din suna liya hota.

Usi din se mein teri rehguzar mein baitha hun,
Kabhi mehmil ka tune parda utha liya hota.

Jo hota hota, magar dil ki mutma'ini ko,
Use ik baar seene se laga liya hota.

Na khulta raz kabhi tum pe hamare ashkon ka,
Hasi ki aad mein jo hamne chhupa liya hota.

Wo badguman tha, sachchaiyan batate use,
Agar wo rootha tha, usko mana liya hota.

Koi ghazal, koi bhi she'r na ho pata mukammil,
Jo dil ka dard, dil hi mein chhupa liya hota.

Wo jood-bakhsh hai 'Sagar', ummeedwaron mein,
Nam tu ne bhi apna likha liya hota.


81. Ghazal:

Mana ke tujh se badh ke yahan koi bhi nahin,
Duniya hai tere pyar mein pagal, ham hi nahin.

Ghuncha-dahn-o-gulbadan kehte hain sab tujhe,
Khushbu tere badan ki hai, gulshan mein bhi nahin.

Ye sach hai tum hasin ho lakhon mein lajawab,
Par ham bhi pyar karte hain, koi dillagi nahin.

Kis bat pe ye phool sa chehra hai muzmahil,
Aankhon mein jagmagahat, labon par hasi nahin.

Rehte hain door aksar, o rehte hain beqarar,
Lekin hamare pyar mein koi kami nahin.

Jeene se murad ye nahi, sansein chala karein,
Tujhse na ho wabasta to, wo zindagi nahin.

'Sagar' sila wafa ka jo tujhko nahi mila,
Wajib thi bandagi tujhe, aashiqi nahin.


80. Ghazal:

Us mah-ru ke hum bhi talabgar hain to hain,
Muddat se uske ishq mein giraftar hain to hain.

Chaha nahin kisi ko bas ik tumko chah ke,
Is par bhi agar tere gunahgar hain to hain.

Rakhte hain ana apni jo apnon se bhi aziz,
Kuchh doston mein aise bhi kirdar hain to hain.

Rahzan ko rahbari ke liye khud hi chun liya,
Apni tabahiyon ke ab aasar hain to hain.

Kaise use bura kahun, hai jo aap ke qarib,
Dushman bhi agar aapke ghamkhwar hain to hain.

Purkhon ki virasat ko to rakkhe hain sanjo ke,
Ghurbat mein aajkal ham fankar hain to hain.

Us din unhein samjhunga jab bandhenge nishana,
Hathon mein liye ghoomte hathiyar hain to hain.

Masruf raha karte hain tere ishq mein janan,
Duniya agar samjhe ke ham bekar hain to hain.

Hai kis ke bas ki bat jo kare uska samna,
'Sagar' bas ik aap hi dildar hain to hain.


79. Ghazal:

Wo kya gaya ke sath mein qarar bhi chala gaya,
Wo roz milne-julne ka, hansi ka, silsila gaya.

Waqt-e rukhsat de gaya, wo ek rangin yadgar,
Jate-jate bagh mein, qaus-e qaza khila gaya.

Le gaya wo sath mein wajud mera chhin kar,
Phir aayega wo laut kar, yaqin bhi dila gaya.

Ke jaise har niwale se namak koi nikal le,
Guzar rahi hai zindagi, par zaiqa chala gaya.

Kya uske dil mein bat thi, pata nain ye kyun kiya,
Jala diya bujha gaya, bujha diya jala gaya.

Wo zindagi mein yak-ba-yak chha gaya hawas par,
Ke jaise koi zalzala ho bam-o-dar hila gaya.

Wo chahe ab karam kare ya de khataon ki saza,
Kuchh bhi kehne sunne ka ab hausla chala gaya.

Dabdabati aankhon se kaha jab usne al-wida,
Na phir rahin shikayatein, jo tha bhi wo gila gaya.

Phir uske bad shehr mein, wo raunaqein nahin rahin,
Raha wo jab talak yahan sabhi ka gham bhula gaya.

Bas waqt hi jahan mein, munsif-o-mukhtar hai,
Bade-badon ka ye ghurur, khak mein mila gaya.

Soch mein pada hai kyun 'Sagar' tu ab mustaqil,
Bura jo waqt aaya tha, kab ka wo chala gaya.


78. Ghazal:

Teri khu mein jitna ghurur hai,
Tu Khuda se utna hi door hai.

Mujhe jam-e mey ki talab nahin,
Mujhe zindagi ka surur hai.

Jahan zulmatein thien, hain zulmatein,
Jahan noor tha wahan noor hai.

Tumhein chahta hun mein aaj tak,
Mera sirf itna qusoor hai.

Hai nai nasl ka ye waswasa,
Na lihaz hai na sha'ur hai.

Wo bakhshta hai khataon ko,
Ek nam uska Ghafoor hai.

Hai kuchh bhi mujhko pata nahi,
Pata itna mujhko zaroor hai.

Jo 'Sagar' nam ka shakhs hai,
Tere dam se hi wo mashoor hai.


77. Ghazal:

Baithe hain tere dar pe, mulaqat ho na ho,
Daman bichha diya hai ab, khairat ho na ho.

Mujhko jalaya itna ke kundan bana diya,
Unke karam ki ye bhi ik saughat ho na ho.

Har sham aa hi jata tha, din bhar rahe jahan,
Aaya nahin wo aaj, hai koi bat, ho na ho.

Belaus dhar rahe hain wo ilzam mere sar,
Chahe nazar milane ki auqat ho na ho.

Tum aaogi is ghar mein bas itna yaqin tha,
Doli tumhari uthe na uthe, barat ho na ho.

Har simt uth rahin hain jo nafrat ki aandhiyan,
Is sab ke peechhe hai wohi badzat, ho na ho.

Badal ki tarha aankh mein jazbat chha gaye,
Abke baras bhi dekhiye, barsat ho na ho.

Thehra hua hai waqt aur 'Sagar' hai munjamid,
Ab din koi uge na uge, rat ho na ho.


76. Ghazal:

Karwan ke bad gard-e karwan reh jayegi,
Ham guzar jayenge phir bhi dastan reh jayegi.

Apne gham ki aag se kal mein sharar ban jaunga,
Aur teri aashiqi ban ke dhuan reh jayegi.

Beech mein ha'il rahi gar yun waz'adari teri,
Mere dil ki aarzu dil mein nihan reh jayegi.

Gul-fishani is qadar karte ho to phir dekhna,
Hasrat-e gul hi chaman mein baghban reh jayegi.

Bekason par hansne walo aaj itna jan lo,
Kal tumhari sari hasti be-nishan reh jayegi.

Had se zyada tune gar kheenchi tanabein, ai miyan,
Hath mein tere faqat tuti kaman reh jayegi.

Khoob awazein uthengi gaon se sansad talak,
Khalq phir bhi be-zuban ki be-zuban reh jayegi.

Shayari se kam lena chaha hamne ishq mein,
Kya khabar thi shayari bhi raygan reh jayegi.

Tujh pe 'Sagar' kab khula hai mere dil ka rasta,
Dil ki dhadkan, dil mein mere razdan reh jayegi.


75. Ghazal:

Manus tha wo shakhs kahin kho gaya na ho,
Mujhko paraye des mein wo dhoondhta na ho.

Jiski talab mein aaj tak kati hai zindagi,
Mumkin hai mere nam se bhi aashna na ho.

Manzil ke bad manzilein, har aan justju,
Jiski talash hai mujhe, mujh mein chhupa na ho.

Ab mat fareb kha ai dil, aane se wo raha,
Dar jisne khatkhataya hai, bad-e saba na ho.

Meri nazar mein aisa koi shakhs hi nahin,
Jisne kiya ho ishq aur gham saha na ho.

Kehte hain ki ummid pe qayam hai kainat,
Kya kijiyega jab koi wada wafa na ho.

Ta'bir to hai mumkin, magar dekhna ye hai,
Ashkon ke sath khwab bhi kahin beh gaya na ho.

Ab ke ugi hai mulk mein kaaton ki ek fasl,
Nafrat ke beej zehnon mein koi bo gaya na ho.

Le chal mujhe wahan ab, ai mashq-e rozgar,
Munis na ho, jahan pe koi aashna na ho.

'Sagar' ko khud kalam se aasudgi nahin,
Kehna hai aisa kuchh jo kisi ne kaha na ho.


74. Ghazal:

Ab bhi jhuka hua hai tere aastan pe sar,
Ye aur bat hai abhi tujhko nahin khabar.

Bandanawaz aapko pehchante hain log,
Bas ye khayal rakhiyega, jab aayein mere ghar.

Kya tum kahoge sirf hai is bat ka khayal,
Duniya kahegi kya mujhe qat'an nahi hai dar.

Chahe rahun yahan pe, ya jaun palat ke mein,
Yan par hai aashiyan to wahan par hai apna ghar.

Inke bina guzara nahin hai jahan mein,
Yun to hain jad fasad ki zan-o-zamin-o-zar.

Kal keh rahi thi aasman se hans ke ye zamin,
Fursat mile to aa ke bahon mein mujhko bhar.

Teri sada ko sun ke main yak-lakht aa gaya,
Hairat se tak raha hun mein, ab apne bal-o-par.

Ta'at, adab, sukhanwari se wasta hamein,
Duniya kare mukhalifat, pahunchega kya zarar.

Gesu ki badliyon se bas nikla tha mahtab,
Dekhi bas ik jhalak ke tabhi ho gai saher.

Mar-mar ke ji raha hai jahan mein harek shakhs,
Chahe jo maghfirat to phir ik bar ji ke mar.

Achchhi guzar gai hai shab-e gham ki wardat,
Wa as-salam dosto, chalte hain apne ghar.

'Sagar' ka kuchh pata nahin, rehta hai wo kahan,
Tumko agar kabhi mile, karna mujhe khabar.


73. Ghazal:

Zindagi ko ik aisa mod diya,
Usko apna bana ke chhod diya.

Ab to bas aap se ta'alluq hai,
Rishta sabse hai maine tod diya.

Mulk ke nam-chin logon mein,
Nam mera ye kisne jod diya.

Pehle kati zaban hakim ne,
Aur gardan ko phir marod diya.

Kam aayi na aabla-pai jab,
Khud hi chhlaon ko meine phod diya.

Pai-pai ko mohtaj tune rakhha par,
Jab bhi bakhsha to phir karod diya.

Ek manus sada ne pichhle pahar,
Yak-ba-yak neend se jhanjhod diya.

Shayari ko lahu se seencha hai,
Apne jazbat ka nichod diya.

Ab wo marasim na sahi, ai 'Sagar',
Milna-julna kyun tune chhod diya.


72. Ghazal:

Koi ghuncha bagh mein hans pada, koi phul kanta chubha gaya,
Jo hikaratein had se badhin, to mujhe bhi taav aa gaya.

Kabhi tu ne poocha na hal-e dil, mein bhi apna gham na jata saka,
Rahi masnu'i si hansi teri, mein wafa mein dhoka sa kha gaya.

Tujhe dekha pehlu-e ghair mein, sar-e bazm aur sar-e rah jab,
Meri aankh sharm se jhuk gayi, tu nigah phir bhi mila gaya.

Jab waledain hayat the, rakha thokaron mein jahan ko,
Wo hain jab se mulk-e adam gaye, mera hausla bhi chala gaya.

Kabhi muddaton mein mile bhi jab, to samaj aa gaya darmiyan,
Mein samajh gaya teri bekasi, tu bhi hasraton ko chupa gaya.

Rahi zindagi mein khalish yehi, yehi gham mujhe hardam raha,
Tujhe chahiye thi jab madad, mein ziyaraton pe chala gaya.

Teri wus'atein be-hisab hai, teri justju mein sarab hai,
Ik bar 'Sagar' se mil ke woh, use aa'ina sa dikha gaya.


71. Ghazal:

Charch apna mushtahar,
Gali-gali, nagar-nagar.

Kaha kisi ne loot lo,
Jhuka hua hai ye shajar.

Darogh-goi chhod di,
Ab mujhe nahin hai dar.

Har jagah jhukta nahin,
Mera sar hai mera sar.

Milna tha jab khwab mein,
Neend na aayi rat bhar.

Mere hal-i zar se,
Rahiye na yun be-khabar.

Sama'aton ko doondhte,
Bhatak rahe hain naghmagar.

Sha'iri bahut hui,
Dhang ka koi kam kar.

Tera ho ke reh gaya,
'Sagar', qissa mukhtasar.


70. Ghazal:

Dard dil mein jawan hota hai,
Phir koi mehrban hota hai.

Dekhta hun koi hasin chehra,
Aapka hi guman hota hai.

Ban sanwar ke wo jab nikalte hain,
Dil thoda be-iman hota hai.

Khud-ba-khud panv udhar uthte hain,
Jahan tera makan hota hai.

Roz ik kash-ma-kash si rehti hai,
Roz ik imtihan hota hai.

Apni qismat jo khud banata hai,
Sikandar-uz zaman hota hai.

Jitne ehsan wo dil pe karte hain,
Utna ye be-zuban hota hai.

Bazm mein ghair ban ke baithe ho,
Yun koi badguman hota hai.

Mein ghazal usko hi sunata hun,
Jo mera qadrdan hota hai.

Rahun chahe jahan mein, ai 'Sagar',
Dil mein Hindostan hota hai.


69. Ghazal:

Go ke hamse bayan nahin hota,
Dard dil mein nihan nahin hota.

Jo kabhi badguman ho jaye,
Yar phir mehrban nahin hota.

Ashk rag-rag mein daudta hai magar,
Chasm-e tar se rawan nahin hota.

Wo agarche hai aas-pas mere,
Mein jahan hun wahan nahin hota.

Yun to likhta hun hal-e zar bahut,
Hal jo hai ayan nahin hota.

Waise duniya pe jahangiri hai,
Tere dil mein makan nahin hota.

Wo na karta karam to ai 'Sagar',
Kahin tera nishan nahin hota.


68. Ghazal:

Bin tere kuchh kami si rehti hai,
Aankh mein ik nami si rehti hai.

Ma ke bin jo guzarti hain ghadiyan,
Ranj kya hai? Ghami si rehti hai.

Jis ghadi Ma ki yad aati hai,
Wo ghadi matami si rehti hai.

Lakh dho lun mein apne chehre ko,
Gard-e maazi jami si rehti hai.

Mana hum hein juda-juda, tanha,
Par kashish bahami si rehti hai.

Tumko rukhsat jo kar ke aata hun,
Sans meri thami si rehti hai.

Kuchh tabi'at hi aisi payi hai,
Jo sada 'aalami si rehti hai.

Ranj mein bhi kyun tere hothon par,
Ik hansi da'imi si rehti hai.

Mein bhi kuchh fitrati sa rehta hun,
Tu bhi kuchh mausami si rehti hai.

Ho farishta-sifat magar 'Sagar',
Khu teri aadmi si rehti hai.


67. Ghazal:

Tumse wada wafa nahin hota,
Dil hai phir bhi khafa nahin hota.

Ishq apna jata ke pachhtaye,
Kash tumse kaha nahin hota.

Dost hun, gham-gusar hun tera,
Dard tanha saha nahin hota.

Tere dar se murad gar milti,
Dar-ba-dar ka gada nahin hota.

Tune itne karam kiye Aaqa,
Hamse haq bhi ada nahin hota.

'Nur' ka gar na hota shaidai,
Mein nisar-e shama' nahin hota.

Jab bhi 'Sagar' se milne jata hun,
Koi tere siva nahin hota.


66. Ghazal: To add


65. Ghazal:

Jab bhi tumhein kuchh sakht kaha hai, der talak pachhtaya hun,
Aankhe nam hain, khushk zaban pe, lafz-e nidamat laya hum.

Khudi gawan kar shohrat pao, izzat kho, maqbool bano,
Maujuda halaat ke rang mein ab tak rang na paya hun.

Aaj tumhein jab dekha maine, ek purani album mein,
Apne zamane ke qisson ko, soch ke mein muskaya hun.

Han wo mein tha chhod ke tumko jo pardes sidhara tha.
Par ab sab kuchh chhod ke mein phir paas tumhare aaya hun.

Aaj chalo ye ho hi jaye qissah aar ya par sanam,
Aaj hatheli par rakh kar mein khud apna sar laya hun.

Dushman ki to baat alag hai, us se ye ummid bhi thi,
Par tumko bhi zeher ugalte dekha to ghabraya hun.

Wo mera lagta hi kya hai, aksar ye socha hai magar,
'Sagar' ka jab nam hua hai, phoola nahin samaya hun.


64. Ghazal:

Muddat mein hamne paye the, ye din wisal ke,
Ab tum kaho to rakh dun, kaleja nikal ke.

Sabse hamein talab nahin, ik tumse aas hai,
Go ham gada hain phir bhi gada hain kamal ke.

Wo kaun tha kidhar gaya, mujhe kar ke beqarar,
Dondha kiye jawab ham aise sawal ke.

Ya tum ruko ya mein chalun, rahein sath hamsafar,
Karte hain chalo faisla sikka uchhal ke.

Ab tak tumhare pas raha hai to shad hai,
Kuch roz aur rakh lo mera dil sambhal ke.

Lakhon tamannayein hain yahan par bichhi hui,
Dil ki gali mein rakhna qadam dekh-bhal ke.

Chahun to mein isi ghadi aa jaun tere paas,
Tumko pata hein mojize meri majal ke.

'Sagar' ka tumse ishq to tarikhi amr hai,
Barson rahenge charche hamari misal ke.


63. Ghazal:

Hamare ishq ke afsane kal kahan honge,
Karenge yad tumhein chahe ham jahan honge.

Zamana guzra hai unko, qareeb dekhe hue,
Kaha tha jisne ki do jism ek jan honge.

Chale ho jin pe liye hath hath mein mera,
Wo raaste bhi kabhi rashq-e kehkashan honge.

Karoge bat to hir-phir ke hoga zikr mera,
Jo chup rahoge to aankhon se ham ayaan honge.

Rahenge sath khushi se tumhari qurbat mein,
Qafas mein reh ke bhi ham ahl-e aashiyan honge.

Kise khabar thi muhabbat mein sath rehte hue,
Taweel fasle bhi apne darmiyan honge.

Badhega jab bhi kisi ka qadam su-e maqtal,
Zamana dekhega ham meer-e karvan honge.

Tumhare dar se hai nisbat janam-janam ki hamein,
Fana ke ba'd bhi ham khak-e aastan honge.

Wafa ki rah mein 'Sagar' khayal itna rahe,
Abhi to aage bahut ismein imtihan honge.


62. Ghazal:

Tum ghair ke ho baithe, ham ab bhi tumhare hain,
Ab sath nahin tera, yadon ke sahare hain.

Ik mubham tabassum hi, tum ham ko ata kar do,
Un lamhon ki khatir hi, jo mil ke guzare hain.

Ho jayegi pa-bosi, gar sair ko tum niklo,
Baghon mein nahin shabnam, aansu ye hamare hain.

Jis kam ko karta hun, takmil nahin hota,
Aflak mein gardish hai, gardish mein sitare hain.

Ik turfa tamasha hai, sab dekh ke hairan hain,
Majhdhar mein khamoshi, tufan mein kinare hain.

Hai kaun wahan tera, us par jo takte ho,
Ye kiski sadayein hain, ye kiske ishare hain.

Dil-sokht sahi 'Sagar', par aisa bhi kya hardam,
Guftar mein aatish hai, she'ron mein sharare hain.

Har nazm meri 'Sagar', ik dard ka paikar hai,
Hathon ko qalam kar ke, ye naqsh ubhare hain.


61. Ghazal:

Sunte rahe wo baith ke rudad hamari,
Aur chal diye aai jab fariyad ki bari.

Tum sahib-e iqbal zamane ke liye the,
Tumse na kabhi ho saki imdad hamari.

Umr-e taveel hijr mein guzri hai so guzri,
Ham jante hain shad ya nashad guzaari.

Ik bewafa ke ishq mein ham jab se pade hain,
Ik ham hi nehin, duniya bhi hai, barbad hamari.

Aaye hain khud hi jaal mein, jayenge kahan ab,
Hamko pata hai bekasi saiyaad tumhari.

Ye bekas-o-mazloom ki aahon ka asar hai,
Jannat na basegi kabhi Shaddad tumhari.

Hamse to jo bhi ban pada, ham kar hi chuke hain,
Ab aa ke karo door tum uftaad hamari.

Pehle teri qurbat mein raha karte the dilshad,
Ab gham se tere zeest hai aabaad hamari.

Payange yahin se, jo na payein to kahan jayein,
Dyodhi se nahi uthte hain sajjaad tumhari.

Takhleeq ki takleef se waqif hi nahi tum,
Tanqeed sar-aankhon pe hai naqqaad tumhari.

Ham shayaran-e dehr hain, bani hain ana ke,
Go hai shumar mein nahi tadaad hamari.

Ik tanz hai, tambih hai, shikwa hai, gila hai,
Ghazlein kahan hain 'Sagar-e ustad' tumhari?


60. Ghazal:

[Janab Kalim Aajiz ko ba-taur-e Khiraj-e aqidat, unhin ki ek mashoor-o-ma'aruf ghazal - Din ek sitam ek sitam raat karo ho - ki zamin par]

Seene mein dafn kyun nahin jazbat karo ho,
Mua'afiq nahin halaat to kyun bat karo ho.

Aaye jo nibhane pe to kuchh kar nahin pate,
Baton mein magar khoob karamaat karo ho.

Dil ki jagah ho sang-e be-his hi jiske pas,
Us se bhala kya ummid-e inayaat karo ho.

Girdab mein gardish ke hun, hain dost nadarad,
Tum bhi to sahil se isharaat karo ho.

Dar se tumhare koi bhi lauta nahi maayus,
Tum ishq karo ho ke ya khairaat karo ho.

Ham roz shab-e hijr ko karte hain subh-e nau,
Har subh-e nau ko hijr ki tum raat karo ho.

Kisne kaha tha tumse ki 'Sagar' se karo ishq,
Paida tum apne waste aafaat karo ho.


59. Ghazal:

Jabse ye suna hai logon ko, nazron se wo mara karte hain,
Ye qasd hai ham bhi dekhenge, kya hal hamara karte hain.

Aa’ine ke lab to sakit hain, tum apne hosh sambhalo miyan,
Ai hazrat-e dil ab mehfil ko, wo jalwa-ara karte hain.

Us naz-o-ada ke qurban hain, us husn ke ham to shaida hain,
Us mah-pari par dil hi nahin, ham jan bhi wara karte hain.

Wo honge koi kamzarf ke jo, mahboob se shikwa kar baithe,
Ham log to sachhe aashiq hain, har zulm gawara karte hain.

Tera chehra dhoonda karte hain, ham subh se le ke sham talak,
Raton ko ham uth kar neendon se, tera nam pukara karte hain.

Ham pas rahein ya door kahin, mehfil mein rahein ya khalwat mein,
Dildar tumhin ko jana hai, tumko hi nihara karte hain.

Is aas pe jite aaye the, ik roz milenge tumse magar,
Ab tumse milna jurm hai to, ye jurm dobara karte hain.

Shayar ke bayan ko kya samjhein, wo be-dil aur khud-ara jo,
Nazron ki zaban se kehte hain, ghamzon se ishara karte hain.

Parde se wo bahar aaye hain, tere nale sunkar ai ‘Sagar’,
Ab aage badh kar batla do, kyun sog tumhara karte hain.


58. Ghazal:

Khud mein hum muqayyad the, inqilab kya karte,
Jang ye hamari thi, aan-janab kya karte.

Sabko chhod kar pehle, mujhko jam deta hai,
Maiqade mein saqi se, ham hisab kya karte.

Sabne kis qadar roka, phir bhi dil laga baithe,
Apni hi khataon par, wo itaab kya karte.

Aap ki jafaon ka anjuman mein charcha tha,
Ghair se mukhatib the, ham khitab kya karte.

Aap ne ziya bakhshi, zeest ke andheron ko,
Zindagi se badh kar ham, intisaab kya karte.

Aaina sanwarta hai, jiske samne har din,
Aise jalva-ara ko be-hijab kya karte.

Aap se muhabbat hai, sare zulm sehta hun,
Koi sakht-jan hota, to janab kya karte.

Hashr mein muqabil the, phir bhi ham rahe sakit,
Ab sawal kar ke unhein, la-jawab kya karte.

Na kahin wafa aisi, aur na aisi ulfat hai,
jab nahin koi tum sa, intikhab kya karte.

Jiska nam lene se 'nur' jagmagata hai,
Uske samne 'Sagar' aaftab kya karte.


57. Ghazal:

Na-ummeedi se dil gar bujha chahiye,
Tere honthon pe harf-e dua chahiye.

Ibn-e Maiyam ki tarha jilaye koi,
Mojiza chahiye, mojiza chahiye.

Ham rahe sochte, kuchh bhi keh na sake,
Darasal usne poocha tha "kya chahiye".

Dil to bachcha hai meri ye sunta nahi,
Jo ise chahiye, barmala chahiye.

Doston ki inayat bahut dekh li,
Ab kahin door ja ke raha chahiye.

Wapsi meri ab bhi hai mumkin magar,
Ek mubham si dil se sada chahiye.

Tum hi tum shayari mein numayan rahe,
Apni halat pe kuchh ab kaha chahiye.

Ai meherban tera qaul wajib, magar,
Jo mein kehta hun wo bhi suna chahiye.

Lakh aasi hai 'Sagar' Khudaya ise,
Tera rahm-o-karam be-baha chahiye.


56. Ghazal:

Agar pooche to mere ghar ka usko tum pata dena,
Jo na pooche to bhi, waqif ho mujhe, ye jata dena.

Mere mehram ko auron ki padi hai, mein tadapta hun.
Tera bismil tha, jan-ba-Haq hua, usko bata dena.

Tumhein khush rakhna hi maqsad hai meri zindagani ka,
Agar itna na kar paun, to chahe jo saza dena.

Zamane ko na dena tum koi mauqa mazammat ka,
Meri tasveer ko tum apane kamre se hata dena.

Hansi hai, khel hai, ik dillagi hai, ya tamasha hai,
Kisi ke dil mein reh jana, kisi ka dil dukha dena.

Chala hai umra bhar rah-e talab mein, paon chhalni hai,
Tera deewana aata hai, ai manzil raasta dena.

Nahin mumkin hai meri wapasi, tumko ijazat hai,
Yahan se jab chala jaun, to mera ghar jala dena.

Tumhein ghar chhodna hai, ye tahaiyya kar liye tumne,
Samandar par ja ke phir, na tum mujhko sada dena.

Mariz-e ishq hun aur apne mehram se ye kehta hun,
“Khud hi beemar kar dena, au’ phir khud hi shifa dena.”

Kyun ‘Sagar’ tum nahin ho mutama’in apne muqaddar se,
Nahin achha hai ab in bujhte sholon ko hawa dena.


55. Ghazal:

Mein darta hun ke tumse saamna ab phir na ho jaye,
Jo dil mein hai mere pinha kahin zahir na ho jaye.

Zara si bat par gar yun kaleja moohn ko aata hai,
Mera dil gham uthane se kahin qasir na ho jaye.

Ye hijrat aur ye doori, shab ki ye khamosh tanhai,
Agar yun hi rahin aashiq tera shayar na ho jaye.

Mein khud bhi ehtiyatan us pari-ru se nahi milta,
Wohi jo dushman-e jani hai wo dilbar na ho jaye.

Mein ghar ki bekasi ko chhod kar sehra mein aaya hun,
Magar lagta hai ye sehra hi mera ghar na ho jaye.

Ye jambhoori siyasat hai, yahan andaza mushkil hai,
Jo kal tak raahzan tha, wo hi kal rahbar na ho jaye.

Hai jazb-e jan-supari aajkal aur sar mein sauda hai,
Shahidon mein kahin shamil tera 'Sagar' na ho jaye.


54. Ghazal:

Kaho to yun bhi mein khud ko saza dun,
Teri tasveer kamre se hata dun.

Karun khud se mein arz-e hal kyunkar,
Agar poochein to mein sab kuchh bata dun,

Ye bhi dil mein mere aata hai aksar,
Kabhi mein khud ko bhi apna pata dun.

Zamin ki maang bhi sooni bahut hai,
Falak se tod ke tara saja dun.

Kahan mumkin hai jan-e ba-wafa, ab,
Wafaon ka tumhari mein sila dun.

Mera qaatil ye kehta hai mujhi se,
Qatal se pehle mein apni raza dun.

Judai ke jo din baqi bache hain,
Agar mumkin ho ashkon mein baha dun.

Haram aur dair to veeran pade hain,
Kahan ab ja ke mein usko sada dun.

Kabhi ek bar tum keh ke to dekho,
Tumhein le chal ke 'Sagar' se mila dun.


53. Ghazal:

Do jism mil gaye hain, qalbon mein fasla hai,
Jis se ki dil mila ho, aisa kahan mila hai.

Na lo kam berukhi se, ta'ano se tum yun hargiz,
Bas saf-saf keh do, tumhein mujhse jo gila hai.

Is mod se guzar kar, shayad na mil sakein ham,
Afsos kya karein ye, apna hi faisla hai.

Tumne na sath rakha, chaha hai door hi se,
Meri rifaqaton ka, shayad ye hi sila hai.

Yun to wo hai ba-zahir, mera hi aks logo,
Dekho jo ghaur se to, sadiyon ka fasla hai.

Tu bhi to ho raha hai, meri shohraton mein shamil,
Mujh ko bhi nam itna, tere nam se mila hai.

Pichhli bahar mein jo, poora ujad gaya tha,
Ab ke usi chaman mein, ghuncha naya khila hai.

Kyun chup hun in dinon mein, jane do khair, chhodo,
Tumse na mein khafa hun, shikwa hai na gila hai.

Teri berukhi ko samjhe, tere pyar ka tariqa,
'Sagar' tujhe wo chahe, uska hi hausla hai.


52. Ghazal:

[Mirza Ghalib ki zamin pe taba'-aazmai ki hai: ba-tarz-e "Ye na thi hamari qismat ke wisal-e yar hota]

Zara bhi jo apne dil pe, mujhe ikhtiyar hota,
To ai sangdil na mujhko, kabhi tujhse pyar hota.

Achcha hua ki ab ke, tu mila na mujhse aa ke,
Tu bhi hota khud pasheman, mein bhi sharmsar hota.

Ye thi aarzu musalsal, mile ham-nashin ki jispe,
Ham jan nisar karte, wo bhi jan-nisar hota.

Tumse na jab mile the, koi aarzu nahin thi,
Ab to harek lehza, hai tera intezar hota.

Kabhi aao fursaton mein, to phir hal-e dil sunayein,
Sar-e rah milne wala, nahin gham-gusar hota.

Hai ye zo'f ki alamat, jo ye teer neem-kash hai,
Zara kheenchte tanabein, to jigar ke paar hota.

Mujhe qatl karne wale, teri sadagi pe qurban,
Na fareb yun mein khata, jo mein hoshiyar hota.

Jo likha hai kar raha hun, ai Katib-e Muqaddar,
Warna Khudaya kyunkar, mein kharab-o-khwar hota.

Likhta na she'r gar tu, logon ko phir ai 'Sagar',
Na tu beqarar karta, na tu beqarar hota.


51. Ghazal:

Rasta mehfooz hai ya pur-khatar, jaisa bhi hai,
Mustehkam hai ab mera azm-e safar, jaisa bhi hai.

Hon mubarak aap ko qasr-o-mahal,
Mera ghar hai mera ghar, jaisa bhi hai.

Tujhse wabasta hai mera har kalaam,
Go nahi maqbul par, jaisa bhi hai.

Ishq mein shayar hai tera qamyaab,
Shae'ri mein kargar, jaisa bhi hai.

Go nazar aata nahin, par hai zarur,
Koi mera hamsafar, jaisa bhi hai.

Koi to hamrah hai tufan mein,
Rahzan ya rahbar, jaisa bhi hai.

Teri galiyon se ta'alluq hi nahin,
Ab nahin mera guzar, jaisa bhi hai.

Mujh se aasi par karam ki bheekh ho,
Tere qadmon pe hai sar, jaisa bhi hai.

'Sagar' hai mera hi logo urf-e aam,
Pur-asar ya be-asar, jaisa bhi hai.


50. Ghazal:

Har roz tujhko socha, har roz tujhko chaha,
Har roz aarzu ki, har lamha yun nibaha.

Tere haseen rukh se, jab bhi palat ke lauti,
Apni nazar ko hamne, sau bar phir saraha.

Main badhun, ke laut jaun, kuchh soojhta nahin hai,
Har lehja kash-ma-kash hai, har gam pe doraha.

Mera jism-o-rooh hai ghayal, dast-e shifa se apne,
Kabhi aa ke tu hi rakh de, zakhmon pe mere faha.

Yun to bazm mein sabhi hain, deewane tere bismil,
Magar kaun be-adab hai, sar-e aam jo karaha.

Manzil sabhi ki tu hai, raste agar juda hain,
Zahid hi "hu-o-haq" hai, maston ki "hu-o-ha ha".

'Sagar' se hun mein waqif, mein yaqin se keh raha hun,
Tujhe chah kar phir usne, kisi aur ko na chaha.


49. Ghazal:

Jo dilwale hain duniya ki kahan parwah karte hain,
Muhabbat tab bhi karte the, muhabbat ab bhi karte hain.

Hamein a'aine se unke bahut ranjish si hoti hai,
Hamari jan jati hai wo jab sajte-sanwarte hain.

Faza mein sandali khushbu sama jati hai har janib,
Hawa mein jab kabhi unke khule gesu bikharte hain.

Unhein dekha hai pazmurda akele jab wo rehte hain,
Hamare sath hote hain to har din wo nikharte hain.

Hamein raaton ko neend aksar kabhi jaldi nahin aati,
Tumhari yad ke saye andhere mein ubharte hain.

Chalo yun hi sahi mumkin nahin hai aaj bhi sohbat,
Maine bas arz ki thi, aap to nahak bifarte hain.

Bichha de dil tu apna aaj in rahon pe ai 'Sagar',
Suna hai hamne in rahon se wo aksar guzarte hain.


4 8.Ghazal:

Chehra raz chhupa sakta hai,
Dil bhi dhoka kha sakta hai.

Roz na jane kyun lagta hai,
Aaj bhi koi aa sakta hai.

Kabhi kabhi unse milna bhi,
Dil ka dard badha sakta hai.

Hawa ke dam se ghubbara bhi,
Unchai tak ja sakta hai.

Ghar mein chhup kar baitha bhedi,
Lanka ko bhi dha sakta hai.

Chand to hai uska chehra, par,
Gehan-e zulf mein aa sakta hai.

Apna hath badhao pehle,
Dushman hath mila sakta hai.

Waqt agar bhar bhi de ghav,
Kaise dagh mita sakta hai.

Aaj hai kuchh dil mein bechaini,
'Sagar' naghma ga sakta hai.


47. Ghazal:

Mana ke halaat darane wale hain,
Phir bhi ham ye bat batane wale hain.

Unko tumse kab sachhi hamdardi hai?
Hathi ke ye dant dikhane wale hain.

Jhoot-o-makar ki is shatranji duniya mein,
Apne pyade maat dilane wale hain.

Aur shahadat thodi si mil jaye to,
Ham unki auqat batane wale hain.

Mazi ke zakhmon pe ham faha rakha kar,
Dushman se ab hath milane wale hain.

Gardish mein hai haal hamara, hazrat-e man,
Dekhein kab tak sath nibhane wale hain.

Tere shahr se ab ham kya nata jodein?
Ham to bas ek rat bitane wale hain.

Sulah ki surat kya nikle hamsaye se?
Bat karo to bat badhane wale hain.

Tujhse kya 'Sagar' mein dil ki baat kahun,
Tere bhi andaz zamane wale hain.


46.Ghazal:

Ye majra bhi ajeeb hai,
Jo raqeeb tha, wo habeeb hai.

Mile humko tum, aur hum tumhein,
Ye bhi apna-apna naseeb hai.

Sach bolne ki hai ibtida,
Anjam apna saleeb hai.

Kiya us se humne to fasla,
Magar aj tak wo qareeb hai.

Mere dil pe qabza hai shauq ka,
Aur dimagh hai, ke adeeb hai.

Mere sath rehta hai rat-din,
Ye kaun mera aqeeb hai. [aqeeb=follower]

Hein ye ghazal-pare nagin to kya,
Tera shaye'r phir bhi ghareeb hai.

Tujhe marz ‘Sagar’ ka hai pata,
Tu hi uska khasa tabib hai.


45. Ghazal:

Tere baghair har ghadi chehra udas hai,
Mein ji raha hun, ji to magar tere pas hai.

Duniya to uske haq mein hardam thi kam-nigah,
Meri nazar se dekhiye woh kitna khas hai.

Logon ne mere pyar ko ruswa kiya to kya,
Unse shikayatein nahi, bas tumse aas hai.

Tujhse meri hayat ka sehra hai lalazar,
Tu hai ek aab-zu, meri hasti pyaas hai.

Kaisi khushi jo pehlu mein tu jalwagar nahin?
Jab tu nahin to har khushi muztar hai, yas hai.

Meri tamam shakhsiyat tere sath ghul gayi,
Ab jo tujhe pasand wohi mujhko ras hai.

'Sagar' ki ye dua hai ab, parwar-digar se
Aise hi rahein jab talak sanson mein sans hai.


44.Ghazal:

Tumse mil kar, humko apni, zindagi achchhi lagi,
Aankh tumne pher li to, teergi achchhi lagi.

Hijr ki taarikiyon men, mein bhatakta hi raha,
Bad iske jugnu ki bhi roshni achchhi lagi.

Aapka aana karam hai, aapka jana sitam,
Darmiyan inke jo guzri, zindagi achchhi lagi.

Nafraton ki unke hathon, mein khuli shamsheer hai,
Humko phir bhi dushmani se, dosti achchhi lagi.

Zinadagi bhar jan-supari, be-nawa karte rahe,
Maut jab aayi to unko zindagi achchhi lagi.

Mein ghazal kehta hi kab tha, ye tujhe maloom hai,
Dil ke hathon lut gaye tab, shai'ri achchhi lagi.

Sar ko patthar par patak kar, kisliye zillat sahun?
Aaj 'Sagar' humko apni, khamoshi achchhi lagi.


43. Ghazal:

Hazar tarha se, har bar aazmaya hai,
Mere raqibon ko ab bhi samajh na aaya hai.

Tumhari yad ne phir se mujhe sataya hai,
Nai ghazal ke liye phir qalam uthaya hai.

Hai unhein is qadar arman sarfarazi ka,
Ke begunah ka daman, kafan banaya hai.

Jo poocha tumko bhi mujhse muhabbat to nahin,
Ada se apna sar taslim mein jhukaya hai.

Chura ke nazrein sar-e bazm jab bhi dekha hai,
Kahin ziyada mujhe un pe pyar aaya hai.

Hawaas-o-hosh-o-khirad, sab baja, magar maine,
Qarar kho ke dil-e beqarar paaya hai.

Palat ke mein bhi karara jawab de deta,
Tere lihaj ne goonga mujhe banaya hai.

Baha ke sare khat, dariya mein yun woh lauta hai,
janam-janam ka jyun, karza utaar aaya hai.

Mili hai zeest mujassam sawal ban ke mujhe,
Baarha isko magar lajawab paaya hai.

Tum is janam mein to 'Sagar ko pa nahi sakte,
Tumhara tha wo magar, aaj wo paraya hai.


42. Ghazal:

Hal-e dil unko sunate the, sunate hi rahe,
Woh hamesha dil jalate the, jalate hi rahe.

Humne unse roz milne ka irada kar liya,
Log to batein banate the, banate hi rahe.

Woh nahi badla, na hum badle, na apna ashiyan,
Inqalab aate the pehle bhi, aur aate hi rahe.

Apni nadani se akhir aap ruswa ho gaya,
Raz uska hum chhupate the, chhupate hi rahe.

Ek qadam unse meri janib kabhi na uth saka,
Zindagi bhar gham uthate the, uthate hi rahe.

Ishq ne humko, zamane mein yagana kar diya,
Yun to hum mehfil sajate the, sajate hi rahe.

Aik kamsin ki tarah rakha tujhe ai zindagi,
Aabru teri bachate the, bachate hi rahe.

Barq ne phoonka, magar phir bhi, na ham 'Sagar' ruke,
Aashiyana ham banate the, banate hi rahe.


Ghazal:

Tumhare pyar ki khatir, ye kar jana hi behtar hai
Kaho tum jan dene ki, to mar jana hi behtar hai.

Meri nazron se kab koi tujhe ai chand dekhega,
Mere aaina-e dil mein, utar jana hi behtar hai.

Liye ek jazba-e sajda bhatakta hun mein aawara,
Jhuka kar teri chaukhat par, ye sar jana hi behtar hai.

Lisan ul-Asr ka ye qaul ab mujhko samajh aaya, (Lisan ul-Asr = Akbar Allahabadi)
"Darayen khel mein bachche, to dar jana hi behtar hai."

Tumhari rast-goyi se kisi ki jan jati ho,
To phir aise kisi sach se, mukar jana hi behtar hai.

Kaha walid ne "barkhurdar, gar hon khar raste mein,
Bacha kar apne daman ko, guzar jana hi behtar hai."

Agar hai shauq-e pa-bosi, to in manus rahon mein,
Tera reza-reza hokar, bikhar jana hi behtar hai.

Ba nam-e dosti gar dushman-e jan ghar bulate hain,
Khilaf-e maslahat ye hai, magar jana hi behtar hai.

Raqibon ne unhein bhi nam se mere bulaya hai,
Agarche jan ka khatra hai, par jana hi behtar hai.

Hua phir yun shahidan-e wafa mein ho gaya shamil,
Nahin hai sath qismat mein, to mar jana hi behtar hai.

Bahut tum kar chuke sehra-nawardi, 'Hazrat-e Sagar',
Agar ab bhi wo apna le, to ghar jana hi behtar hai.


40. Ghazal:

[Khwaja Haider Ali 'Aatish' (1778–1848) ki zamin mein]:

Jahan pe khatm hui phir se, ham shuru karte,
Jo dastan-e muhabbat ki guftgu karte.

Hamare jitna kahan koi, tumko chahega?
Abas ye umr guzaroge, justju karte.

Bayan-e ghair pe usne yaqin kar to liya,
Vo kash mere raqibon ko, ru-ba-ru karte.

Bahut aziz hai hamko ye apni nakami,
Khudi ko bech ke kya khud ko surkh-ru karte.

Wo aa ke samne baithe the aj mehfil mein,
Ham unse aur karam ki kya, aarzu karte.

Junun mein mere gareban ko tar-tar kiya,
Wo chasm-e nam liye baithe hain, ab rafu karte.

Saba ka shukr hazaran, jo layi ye nikhat,
Zamana guzra hai us gul ki, aarzu karte.

Ajab hai taur-o-tariqa ye bazm-e rindan ka,
Sharab peene se pehle hain sab wazu karte.

Ragon mein khoon ka qatra bhi ab nahin 'Sagar'
Kahan se ghazlon ki syahi ko ham lahu karte.


39. Ghazal:

Apne wajud ka koi manzar dikhaiye,
Zinda hun main abhi, mujhe aakar bataiye.

Nafrat jo hai to cheeriye khanjar se dil mera,
Gar pyaar hai to usko bhi khulkar jataiye.

Ab tak bhatak raha hun use dil mein le ke mein,
Usko to ye kaha tha, mujhe bhool jaiye.

Dast-e junun se apne hi paaon ko todkar,
Baithe hain tere dar pe ab, kyunkar uthaiye.

Nadim hun apne fail pe, dil se hun sharmsaar,
Ghusse ko thookiye, aji ab maan jaiye.

Us se siwaye pyaar ke, rishta hi kuch nahin,
Pooche agar koi to use, kya bataiye.

Kehna na maaniye mera, aaina dekhiye,
Khud sa koi mile to, mujhe bhi milaiye.

In mehfilon mein mil ke na janoge kya hun mein,
Gar mujhko jaan na hai, mere ghar pe aaiye.

'Sagar' ab apna kaam yahan se samet kar,
Jitna bhi jald ho sake, ghar laut jaiye.


38. Ghazal:

Kahan ab mein qalb-o-jigar dekhta hun,
Bashar ki nazar se bashar dekhta hun.

Kiya qatl mujhko bina khun bahaye,
Mein qatil ka dast-e hunar dekhta hun.

Tera aks har sheh mein raushan hua hai,
Harek sheh mein tera asar dekhta hun.

Nahin tujhse milti kisi ki bhi surat,
Mein aksar ye mehr-o-qamar dekhta hun.

Ye mana wahan koi tujh sa nahin hai,
Ye kya hai ke phir bhi udhar dekhta hun.

Mein itna bhi tanha na tha is se pehle,
Bahut door tujhko ai ghar dekhta hun.

Teri bazm-e ishrat se ukta ke ab mein,
Biyaban, sehra-o-ghar dekhta hun.

Hawadis harek su, woh tanha, akela,
Bahut khauf se har khabar dekhta hun.

Mua'rrikh koi mujh mein baitha hua hai,
Samar ki jagah mein shajar dekhta hun.

(Click here to see comments on this Ghazal)


37. Ghazal:

Tere tufail se har roz ik kamal bhi hai,
Tere baghair magar zeest paimal bhi hai.

Haya ke noor se raushan tera jamal bhi hai,
Wafa ke rang ka chehre pe ik gulal bhi hai.

Tu sochta hai tera husn be-misal bhi hai,
Mein janta hun mera ishq la-zaqwal bhi hai.

Khushi ye hai ke hamko mile ho tum aakhir,
Mile ho der se is bat ka malal bhi hai.

Tum unse milne to jate ho is shitabi se,
Kahoge kya? kuchh is bat ka khayal bhi hai.

Tu mere sath rahi ek ajnabi ki tarah,
Zindagi tera sitam bhi hai aur kamal bhi hai.

Mein apna jism hun aur jism hai mera saya,
Jawab ye hai to phir ik bada sawal bhi hai.

Meri hayat mein tanhaiyan-o-doori hain,
Tere nasib mein qurbat hai aur wisal bhi hai.

Rakha hai dil hi saja kar ghazal ke paikar mein,
Magar kahin-kahin lafzon ka istema'al bhi hai.

Wo janta hai ke 'Sagar' kalam tera hai,
Yaqin ke sath mein thoda sa ehtimal bhi hai.


36. Ghazal:

Aajkal kuch aise hain, ham udas halon mein,
Noor ik chhupaye hain, reshmi dushalon mein.

Usne bas yehi poocha, "Dil to lag gaya hoga?"
Ham jawab kya dete, kho gaye sawalon mein.

Kal jo shah-e alam the, mulk-o-jahangiri thi,
zikr tak nahin milta, unka ab hawalon mein,

Ek hi masarrat hai, tumse dil lagaya hai,
Ishq hai misal apna, jawidan misalon mein.

Hamko ab nahin fursat, tumko yad karne ki,
Ham to doobe rehte hain, aapke khayalon mein.

Har hasin chehre pe , jan-nisar hota hai,
Band kar ke rakhunga, ab mein dil ko talon mein.

Jate ho to jao par, itna to kaho 'Sagar',
Laut ke kab aaoge, roz-o-mah, ya salon mein.


35. Ghazal:

[Sufi Ghulam Mustafa 'Tabassum' ko ba-taur-e khiraj-e aqidat]:

Sawan ki ghata barsi, ik barq se lehrai,
Phir tees uthi dil mein, phir yad teri aai.

Ik bazm-e tamasha hai, ye hasti-e fani bhi,
Ik aan mein tauqeerein, ik aan mein ruswai.

Kar ke wo tujhe ruswa, pardes mein ja baitha,
Pehle se hi kehte the, harjai hai harjai.

Ik behr-e gham-e hasti, hai beech mein yun hayal,
Is paar bhi tanhai, us paar bhi tanhai.

Ik hijr ki sadme se, pazmurda se baithe ho,
Dekhe hi nahin mere, andaz-e shikebai.

Pani se harek aatish, bujhne nahin paegi,
Dil mein go lagi mere, ashkon ne hai bhadkai.

Ham ishq-o-muhabbat ki, taasir ke shaida hain,
Har dard liye aaye, ik lazzat-e pinahi.

Wus'at hai mere dil ki, duniya jise kehte hain,
Duniya jise kehte hain, mere dil mein simat aai.

Sahil se samandar ka, andaaza nahin hota,
Ham doob ke samjhe hain, 'Sagar' teri gehrai.


34. Ghazal:

[Allama Iqbal ki mashoor-o-ma'ruf ghazal ki zamin pe qalam rasai ki hai]:

Hadd-e adab hai ai junun, badh ke na isko par kar,
Daman tera shaffaf hai, usko na daghdar kar.

Tujh tak pahunch gaya hun mein, go fasla taweel tha,
Sun ai muhit-e bekaran, ab mujh ko be-kinar kar.

Ye hai sukun akhiri, aur jada-e irfan-e jan,
Ab ishq gar gunah hai, phir isko bar-bar kar.

Ghussa, e'tab, nafratein, bughz-o-hikaratein, jafa,
Jo chahe is jahan se kar, mujhse to sirf pyar kar.

Socha nahin tha yun kabhi, ab jo hua so ho gaya,
Mujh ko to tujh se ishq hai, ab uzr tu hazar kar.

Teri nigah ka fusun, aur bhi badh gaya hai ab,
Abru ke kham tarash kar, nok-e palak sanwar kar.

Shayad paraye desh mein, ja kar ke bas gaya hai wo,
Kisne kaha tha tujh se ye, uska tu intezar kar.

Mujh ko na yad kar ke yun, aansu baha tu rat-din,
Khud bhi na beqarar ho, mujh ko na beqarar kar.

Ek shakhs tha yahan pe jo, tere vaste tha muntazir,
'Sagar' kahan pe aaye ho, shab-e wasl tum guzar kar.


33. Ghazal:

Ho raha hai chehre se bhi, mera gham hi aashkara,
Mujhe bhool jane wale, mein na kar saka kinara.

Tera shehr-o-mulk chhoda, yahan door aa base hain,
Rusawai teri ham ko, qata'an nahin gawara.

Nahin tujhse koi badh kar, wo aziz hai to kya hai,
Jo kaho to aaj se ham, na lein nam bhi dobara.

Uski talash mein ab, dar-dar bhatak raha hun,
Lab-e bam bhi sada di, sar-e dar bhi pukara.

Mera dil to thokaron mein, kab se pada hai tere,
Hai nisar tujh pe jan bhi, zara kar to tu ishara.

Har zakhm phool ban kar, she'ron mein aa gaya hai,
Teri bakhshi ne'maton ko, bade naz se sanwara.

Mein hun jism tu hai rooh to, kaise juda rahenge,
Tere baghair ek pal, mera nahin guzara.

Meri Eid ho mukammal, mere maah-ru, ai dilbar,
Gar mein kabhi sajaun, jabin pe teri sitara.

Duniya ne mujhko phir se, duboya tha bahr-e gham mein,
Tera bhala ho 'Sagar', is baar phir ubhara.


32. Ghazal:

Lakh mazalim hamne sahe hain, aur sahenge, kya hoga,
Phir bhi rah-e haq pe chale hain, aur chalenge, kya hoga.

Faqe, ghurbat, be-watani, zillat, ilzam-o-dar-o-rasan,
Ahl-e qalam bebak rahe hain, aur rahenge, kya hoga.

Hakim tanashahi chhode, khidmat aur insaf kare,
Aise jahan ke khwab pale hain, aur palenge, kya hoga.

Hardam be-parwah rehte hain, dilwale is duniya mein,
Ishq-muhabbat karte rahe hain, aur karenge, kya hoga.

Tere karam se, tere bharose, jivan ke tufanon mein,
Armanon ke deep jale hain, aur jalenge, kya hoga.

Ham ko ye manzoor nahi hai, hamsaya be-saya ho,
Uske gham mein ham bhi ghule hain, aur ghulenge, kya hoga.

'Sagar' hijr ki aag mein tanha, ek tum hi dil-sokht nahin,
Tum jaise kitne hi jale hain, aur jalenge, kya hoga.


31. Ghazal:

Tamanna koi gar pali bhi hoti,
Na tum milte to wo khali bhi hoti.

Agar aa jate tum ek din palat kar,
Usi din meri Diwali bhi hoti.

Ye suraj aur bhi ho jata taban,
Tere honthon ki jo lali bhi hoti.

Agar hain milne ki ghadiyan mua'yyan,
Judai ki ghadi tali bhi hoti.

Mere haq mein dua ka kam karti,
Tere lab par agar gali bhi hoti.

Jo tum aa jate mere sath rehne,
Khushi hoti aur khush-hali bhi hoti.

Yehi hasrat mujhe rehti hai har pal,
Ki ghar ke sath gharwali bhi hoti.

Mein aksar der tak ye sochta hun,
Zaban mazlum mein dali bhi hoti.

Qaside ghair ke likhta to 'Sagar',
Teri ghazlon ki pamali bhi hoti.


30. Ghazal:

Kabhi jazba-e dil bataya to hota,
Muhabbat ko apni jataya to hota.

Koi muddaton se tera muntazir hai,
Kabhi kar ke wada nibhaya to hota.

Samandar bhi deta tujhe rasta, par,
Qadam meri janib badhaya to hota.

Sataya bahut aap ne door rah kar,
Mere sath rah kar sataya to hota.

Mein ho jata paiwast teri ungliyon mein,
Mera nam likh kar mitaya to hota.

Karam mehrban, al-garaz ab karam ho,
Rulaya bahut hai, hansaya to hota.

Kahan tu hai 'Sagar', kahan wo pari-ru?
Kabhi tere dil mein ye aaya to hota.


29. Ghazal:

Mil jate ho khwab mein aksar,
Aankhon ko hai deed bhi dubhar.

Khud to jo ji chahe kar lo,
Sari shartein aayad ham par.

Sare faraiz ham par lazim,
Kuchh bhi nahi wajib hai tum par.

Manzil par pahunchenge kaise,
Rahzan bane hue hain rahbar.

Hawa zamane ki kya badli,
Gard udi aur baithi sar par.

Tum ko apne ghar le jaun,
Soch raha hun kab aur kyunkar.

Apne dil ki bat kari to,
Log hamein kehte hain shayar.

Dil par aik hi nam likha hai,
chahe dekh lo tum bhi padh kar.

Qaid se kaise bahar niklun,
Yadon ka ghere hai lashkar.

Pal bhar chain nahin aata hai,
Dekh liya hai tanha reh kar.

Wasl ki shab zaya kar dali,
Zalim ne mujh se lad-lad kar.

Pas nahin hai rooh jab uski,
Phir kaise zinda hai 'Sagar'.


28. Ghazal:

Ab to unse hoti hai mulaqat nahin,
Din to guzar jata hai par raat nahin.

Raat-din aankhon se ashk behte hain,
Aur agar poocho to koi baat nahin.

Jism to hai mom sa sayyal bahut,
Dil hai wo sang jo gudakht nahin.

Ab to ham phoolon se zakhm khate hain,
Khair hai, ab pehle se halaat nahin.

Har kas-o-nakas se hans ke milte ho,
Kya mere hisse mein ye khairaat nahin.

Roz kahan milta hai yahan kisi shayer ko aizaz,
Muddaton mein bhi ye milti hai saughaat nahin.

Tere zehan-o-dil pe shayad koi qabiz hai,
'Sagar' hargiz ye tere khayalaat nahin.


27. Ghazal:

Mujhe khabar na thi ke wo majboor kar dega,
Meri ana ko wo yak-lakht choor kar dega.

Ajeeb turfa tabiyat hai, guman se hai pare,
Banayega mujhe apna, phir door kar dega.

Ilaaj ishq ka kar lo abhi to behtar hai,
Badhega zakhm yahi to nasoor kar dega.

Mein isliye bhi teri aankhon mein dekhta hi nahi,
Nazar ki mey se mujhe tu makhmoor kar dega.

Kar aiteraf sadaqat se apne jurmon ka,
Rahamdil hai wo, teri arzi manzoor kar dega.

Ghazal mein dhal ke rakha hai tere paikar ko,
Tujhe jahan mein tera shayar mashoor kar dega.

Ajab masihai hai 'Sagar' se uske milne mein,
Bas ek pal mein aziyat kafoor kar dega.


26. Ghazal:

Aur karam ab rehne do,
Dard sahun to sehne do.

Honth hatao honthon se,
Jo hai dil mein kehne do.

Boson ki gar bat karun,
Lena ek na dene do.

Tum to madad kar sakte the,
Khair miyan, ab rehne do.

Jab koi yahan rehta hi nahin,
Dil ki basti ko dhehne do.

Mat roko tum ashkon ko,
Ganga-Jamuna behne do.

'Sagar' ki mat fikr karo,
Hai jis hal mein rehne do.


25. Ghazal:

Chalo itni bhi aasani bahut hai,
Mere ashkon mein tughyani bahut hai.

Nikala chahte hein mujhko dil se,
Unhein mujh se pareshani bahut hai.

Qatal-name pe hain muhrein sabhi ki,
Magar dil mein pashemani bahut hai.

Chalo ab dasht ki janib chalein ham,
Mere ghar mein to viraani bahut hai.

Tamanna hai ham-aghoshi ki us se,
Ke fitrat jiski tufani bahut hai.

Barahna aur poshida nazar hai,
Qaba hai phir bhi uryaani bahut hai.

Alaav jism ka apne jalayein,
Hawa bahar ki barfani bahut hai.

Haqiqat hai, meri tarik duniya,
Tere hone se nurani bahut hai.

Qalam tu phir utha 'Sagar', ke duniya,
Teri ghazalon ki diwani bahut hai.


24. Ghazal:

Kabhi jazba-e dil bataya to hota,
Muhabbat ko apni jataya to hota.

Koi muddaton se tera muntazir hai,
Kabhi kar ke wada nibhaya to hota.

Samandar bhi deta tujhe rasta par,
Qadam meri janib badhaya to hota.

Sataya bahut aapne door reh kar,
Mere sath reh kar sataya to hota.

Main ho jata paiwast teri ungliyon mein,
Mera nam likh kar mitaya to hota.

Karam mehrban, al-garaz ab karam ho,
Rulaya bahut hai, hansaya to hota.

Kahan tu hai 'Sagar' kahan wo pari-ru,
Kabhi tere dil mein ye aaya to hota.


23. Ghazal:

Dil ke darwaze ko wa kar,
dekh zara tu ander aa kar.

Hasil hai ya hai mehrumi,
Tujhko khoya duniya pa kar.

Duniyadari seekh na paaye,
Aql na aayi dhoke kha kar.

Logon se daryaft kiya hai,
Hal na poocha usne aa kar.

Arz-e muhabbat hamne kar di,
Ab tu chahe han kar, na kar.

Dil ki taskin kar lete hain,
Tumko apna hal suna kar.

Dost aziyat pahunchate ahin,
Aksar zikr tumhara la kar.

Nazron se jo utar gaya phir,
Kabhi na dekha usko ja kar.

Tum kya jano reh kar tanha,
Kitna badal gaya hai 'Sagar'.


22. Ghazal:

Teri jab tak nigahdari rahegi,
Baghawat sar-ba-sar jari rahegi.

Badan gar khak mein bhi tum mila do,
Meri fitrat mein khuddari rahegi.

Jo zalim ki jafa par chup rahi to,
Khamoshi qaum par bhari rahegi.

Jo sar ko daar pe ab rakh diya hai,
Yahan ab meri sardari rahegi.

Tumhein had se ziyada chahta hun,
Yahi thi, aur ye bimari rahegi.

Agar tum mere ho jao to meri,
Do alam mein jahandari rahegi.

Bujha dena diya jane se pehle,
Jo dekhoge to dushwari rahegi.

Bula lena mujhe jis din bhi chaho,
Harek din meri taiyyari rahegi.r

Ye kab tak tu ghazal likhega 'Sagar',
Bata kab tak siyahkari rahegi.


21. Ghazal:

Teri yadon mein khota ja raha hun,
Mein kuchh madhosh hota ja raha hun.

Rihai ho chuki lekin mein ab bhi,
Gunah ka bojh dhota ja raha hun.

Kabhi hans kar use ruswa kiya tha,
Musalsal ab mein rota ja raha hun.

Guzaari hai wisali rat-jagon mein,
Ab neend aati hai, sota ja raha hun.

Khilaaein gul hamesha meri ghazlein,
Zehan mein beej bota ja raha hun.

Judai ke jo din baqi bache hain,
Unhein ashkon se dhota ja raha hun.

Hun lauh-e waqt pe harf-e khata kya?
Jo phir-phir se mein pota ja raha hun.


20. Ghazal:

Jisne diwana banaya tha, ek chehra tha,
Jisko phir tut ke chaha tha, ek chehra tha.

Zindagi mein to mile sainkadon, magar jisko,
Dil ki basti mein basaya tha, ek chehra tha.

Ba-sad ehtimam maine dil ke is virane mein,
Jiski yadon ko sajaya tha, ek chehra tha.

Aik vehshat, ek tammana, ek aarzu, ek sarab,
Umr bhar jisne chalaya tha, ek chehra tha.

Zaban khamosh thi, par door tak mere peechhe,
Sawal karne jo aaya tha, ek chehra tha.

Rafta-rafta mere mazi ke sare naqsh mite,
Jisko mein bhool na paya tha, ek chehra tha.

Kya kare koi tere jane ka gham, tu ai 'Sagar',
Bas yun hi duniya mein aaya tha, ek chehra tha.


19. Ghazal:

Aasman par ek hilal tha, kya tha,
Tera hi aks-e jamal tha, kya tha.

Qatl se pehle qatil ko ghaur se dekha,
Us ke chehre par malal tha, kya tha.

Jin ko ham apna samajh ke baithe the,
Ek farebinda khayal tha, kya tha.

Waqt-e rukhsat us ke udas chehre par,
Ek musalsal sawal tha, kya tha.

Chah kar bhi bulandi se tum nahin laute,
Jaise ye khud mein ek zawal tha, kya tha.

Aakhiri sham tere kurb ki wo saughatein,
Wo bichhadna tha, wisal tha, kya tha.

Apne jazbat ko ghazlon mein ayan kar dena,
'Sagar' ye tera kamaal tha, kya tha.


18. Ghazal:

Meri hasti hai nazrana kisi ka,
Tera ho ke na kehlana kisi ka.

Jhuka ke sar ye saghar sochta hai,
Karun labrez paimana kisi ka.

Kisi ka dil mera paiham dukhana,
Mere zakhmon ko sehlana kisi ka.

Mujhe jab dekhta pana to hans kar,
Adaon se vo sharmana kisi ka.

Bulandi par pahunch kar dekh lena,
Akelepan se ghabrana kisi ka.

Mujhe jab muztarib pana, to sau-sau,
Dilase de ke behlana kisi ka.

Sawalon mein mujhe uljha ke rakhna,
Jawabon se vo katrana kisi ka.

Jo mumkin ho to apne aansuon se,
Ada kar dun mein harjana kisi ka.

Nahin ye dastan meri nahi hai,
Ho shayad ye bhi afsana kisi ka.


17. Ghazal:

Hun ab bhi zinda bichhad ke tumse, abhi bhi ye sans chal rahi hai,
Sabab yahi hai tumhare milne ki aas aankhon mein pal rahi hai.

Tumhari majburiyon ki khatir, ham honth ab tak siye hue the,
Magar muhibbi jo sach kahun ab, ye khamoshi ham ko khal rahi hai.

Harek din ka harek lamha, tumhare bin yun guzar raha hai,
Hayat meri shamma ki tarha, jyun qatra-qatra pighal rahi hai.

Nae gulon ki nirali rangat, nai basirat ki muntazir hai,
Chale bhi aao jahan bhi ho tum, faza wagarna badal rahi hai.

Judai ke wo taveel qisse, bichhad ke rehne ki dastanein,
Jo aansuon se likhi thi tumne, hamare she'ron mein dhal rahi hai.

Ghubar kaisa ye gardishon ne, hamare chehron pe mal diya hai,
Na tum wo tum ho, na ham wo ham hain, zamin bhi karwat badal rahi hai.

Garaz ke hamne guzar hi dien, judai ki jo likheen thien ghadiyan,
Jo ham pe guzri, wo kaise guzri, gawah uski ghazal rahi hai.

Yun kaghazon mein hi uljhe rehna, ye tum ko kya ho gaya hai 'Sagar',
Ye aaj kitni hasin fiza hai, ke sari hasti machal rahi hai.


16. Ghazal:

Ghair mashrut maine tujhse muhabbat ki hai,
Jo bhi guzri hai kahan uski shikayat ki hai.

Ishq mein zaati tajurbon se sabaq seekha hai,
Maine har chahne-wale ki himayat ki hai.

Hadison ne bhi hai paya mere munis sa mizaj,
Na khabardar kiya hai, na riayat ki hai.

Mere ander bhi mujahid sa koi rehta hai,
Mujhse bhi usne kai bar adawat ki hai.

Dard-gham, zauq-e sukhan, aur tamanna gustakh,
Zindagi tune badi ham pe inayat ki hai.

Tum jo kehte ho to chalta hun, magar sach ye hai,
Ujr milne mein nahin, baat tabi'at ki hai.

Thi rawan mauj-e sukhan, yak-ba-yak kyun tune,
Lafz ghazlon mein pirone mein kifayat ki hai.

Jo hai ahwal tera, keh na sakega 'Sagar',
Zabt kar lena sif'at, ahl-e sharafat ki hai.


15. Ghazal:

Mera khulus ko wo pehchanta nahin hai,
Milta hai roz lekin wo janta nahin hai.

Duniya se hai shanasha, zi-ilm bhi hai lekin,
Mere baghair rehna wo janta nahin hai.

Tera urooj hi hai teri hijraton ka ba'is,
Phir kaise tujhko rokun, dil manta nahin hai.

Tujhse hai aas dil ko, tere dar se hi ata ho,
Duniya mein khak dar-dar, ye chhanta nahin hai.

Karni hai jo marammat, tute muqaddaron ki,
Phir dar ki tere mitti, kyun saanta nahin hai.

Jhulsa rahi hai dhoop ab duniya ke mazalim ki,
Tu rehmaton kimchadar kyun taanta nahin hai.

Gar keh raha hai 'Sagar', har hal mein karega,
Aise hi dil mein kuchh bhi, ye thaanta nahin hai.


14. Ghazal:

Agar wo hamko dil se nikale baithe hain,
Ham hi kyun is rog ko pale baithe hain.

Shehr mein machhli sehmi-sehmi phirti hain,
Hawasi dor-o-kanta dale baithe hain.

Andar-ander kina-o-makkari hai,
Aur upar se bhole bhale baithe hain.

Gaon ki wo haveli ab viraan hui,
Ham ab tak dastaar sambhale baithe hain.

Ab to uska chehra tak bhi yad nahin,
Yadon pe makdi ke jale baithe hain.

Aap ke aate rehne se kuchh himmat hai,
Warna yan ham kiske hawale baithe hain.

Tariki mein jisne umr guzari thi,
Rah mein uski aaj ujale baithe hain.

Us se milne ka kaise rasta nikle,
Rah mein masjid aur shivale baithe hain.

'Sagar ji' kya aap ko fikr-e ma'ash nahin,
Duniya mein kya aap nirale baithe hain.


13. Ghazal:

Deta hai dil ab ye sadaein,
Wo bhule hain, ham bhi bhulaein.

Aaj phir hai dil mein bechaini,
Aaj chalo phir qalam uthaein.

Kaisi hai ye bazm ki raunaq,
Ashkon se raushan hain shama'aein.

Chand-sitare chhune se pehle,
Zamin pe apne pair jamaein.

Maa ka rukhsat karna mujhko,
Aahein dil mein, lab pe dua'aein.

Suna hai wo sunte hain sabki,
Ham bhi chal kar ghazal sunaein.

Kab se hasrat hai ye dil mein,
Aa ke ham ko, phir wo sataein.

Masla’on mein uljha hai ‘Sagar’,
Ham bhi kab tak sath nibhaein.


12. Ghazal:

Tumko hi ham na hal sunayein to kya karein,
Ashkon se gar na aag bujhaein to kya karein.

Rakh kar ke dekha darmiyan meelon ka fasla,
Phir bhi unhein jo bhool na paayein to kya karein.

Unki gali-o-shar-o-watan tark kar chuke,
Ranjish wo ab bhi hamse nibhaein to kya karein.

Tumne diye hain zakhm musalsal hamein magar,
Ham dagh bhi na dil ke dikhaein to kya karein.

Hamne zaban se koi shikayat kabhi na ki,
Ye ashk dil ka hal bataein to kya karein.

Sau-sau khayal aate hain unhein bhej kar hamein,
Dil soch mein hai abke wo aayein to kya karein.

Lawa hi dhal gaya hai tapish ho kahan se kam,
Ghazlein meri na aag lagaein to kya karein.

'Sagar' se milne aaye hain khud aaj chal ke wo,
Jaldi se ye khabar na sunaein to kya karein.


11. Ghazal:

Hijr ki aag mein manzoor hai jalte rehna,
Qatra-qatra yun hi, har roz pighalte rehna.

Is se ziyada hai kahan, mera takaza tum se,
Roz bas aa ke yun hi khwab mein milte rehna.

Teri fitrat hai zamane-si, mein samjhun kaise,
Aur phir us pe tera shaql badalte rehna.

Aansuo tumse, itni si guzarish hai meri,
Us ke jane tak, aanknon mein hi palte rehna.

Lawa-e dard mera, itna kaha tum karna,
Poori shiddat se mere she'ron mein dhalte rehna.

Ai lahu, tum bhi kabhi, aankhon mein mat aa jana,
Daudte-phirte yun hi, rag-rag mein ubalte rehna.

Ja raha hai wo uttho, ab bhi use rok lo tum,
Warna mayusi se, phir hathon ko malte rehna.

Har tajurba tujhe, jayega tawana kar ke,
Thokarein kha ke harek bar sambhalte rehna.

Mil hi jayegi, muradon ki wo manzil 'Sagar',
Shart bas ye hai, rah-e raast pe chalte rehna.


10. Ghazal:

Soch be-ikhtiyar rehti hai,
Ik khumari sawar rehti hai.

Aap se mil ke ji nahin bharta,
Ik tammana udhar rehti hai.

Aap ne zeest ko ziya bakhshi,
Ab khushi khush-gawar rehti hai.

Mere ghar aap ke yun aane se,
Raushani ki qatar rehti hai.

Jitne din aap yahan rehte hain,
Utne din hi bahar rehti hai.

Kya kahun aap ki khataon par,
Kyun nazar sharm-sar rehti hai.

Aap ke zikr se ghazal merei,
Shohraton se do-char rehti hai.

Aapse door jab se aaye hain,
Zindagi be-qarar rehti hai.

Aap ke munfa'il tabassum pe,
Jan meri nisar rehti hai.

Khwab mein roz aap jaisi koi,
Rat bhar gham-gusar rehti hai.

Aapki ek jhalak pane ko,
Deed minnat-guzar rehti hai.

Aapke sath kyun na laut gaye,
Ye kasak bar-bar rehti hai.

Ab to 'Sagar' hai zakhm-aaluda,
Ab wo kyun khar-khar rehti hai.


9. Ghazal:

Jaise naqal ka hona hai naqsh-e asal ke ba'd,
Aamal mera likha hai usne amal ke ba'd.

Wade tamam karte hain, milte nahin kabhi,
Shayad wo milne aayenge, roz-e ajal ke ba'd.

Manzur hai jo aana to mushkil hai kuchh nahin,
Mera gharib-khana hai, qasr-o-mahal ke ba'd.

Tanhai bakhshte ho to khone ka dar hai kyun?
Mujhse na poochhiyega phir radd-e amal ke ba'd.

Lail-o-nihar tere tasavvur mein gum rahun,
kuchh bhi nahi pasand mujhe is shaghal ke ba'd.

Aadhi sadi guzar gayi, samjha na mein use,
Ab ja ke hosh aaya hai mujhko ghafal ke ba'd.

Seene ka sara dard in lafzon mein bhar diya,
Ab kya ghazal sunaun tumhein is ghazal ke ba'd.

'Sagar' se usne poocha hai, "Achhe to ho miyan?"
Naame mein ye hi likha hai, radd-o-badal ke ba'd.


8. Ghazal:

Bahane se mehfil mein laya gaya hun,
Mein aaya nahi hun, bulaya gaya hun.

Fana ho ke ubhra jo mein gul ki surat,
To dar pe tumhare sajaya gaya hun.

Nisab-e muhabbat mein, bhulunga kaise,
Azal se sabaq ye padhaya gaya hun.

Ye sach hai ke jab se tera sath chhuta,
Zamane ki thokar mein paya gaya hun.

Tumhare hi hathon, sar-e aam aksar,
Rulaya gaya hun, hansaya gaya hun.

Mujhe dekh lo tum, ai ishqzado,
Ba-taur-e hikayat dikhaya gaya hun.

Meri tarbiyat ne quwat woh di hai,
Ghamon mein bhi hansna sikhaya gaya hun.

Tumhare bina hai, kahan 'noor' mujh mein,
Main raushan nahi hun, jalaya gaya hun.


7. Ghazal:

Chaha magar na usne jataya, kamaal hai,
Chehre se dil ka hal chhupaya, kamaal hai.

Ghairon se to ummid thi, lekin rafiq-e jan,
Tumne bhi mera dil hi dukhaya, kamaal hai.

Kal tak amir-e shahr hamein poochhta na tha,
Abke mila to paas bithaya, kamaal hai.

Lakhon hasin chehre ab tak nazar mein the,
Dekha tujhe to sab ko bhulaya, kamaal hai.

Rishta jo poochhiye to hai kehne ko kuchh nahin,
Qurbat jo poochiye to hai saya, kamaal hai.

Duniya mein sarfaraz usi waqt ho gaya,
Jab tu ne mujhko apna banaya, kamaal hai.

Aasaan nahin tha aise jafa-ju ke karna ishq,
Ta-umr hamne isko nibhaya, kamaal hai.

Har su tamam umr jise dhoondhte rahe,
Aakhir ko apne dil hi mein paya, kamaal hai.

Ghazlon mein dil ki bat ko kehne ka aisa fan,
‘Sagar’ ye tujhko kisne sikhaya, kamaal hai.


6. Ghazal:

Tu kaun hai ye to tere amal se zahir hai,
Mere bhi jism mein baitha koi muhajir hai.

Hujum-e yas hi tumse mila, pa' dil mera,
Tumhari bakhshi hui ne'maton pe fakhir hai.

Jo shakhsh aaj yun khana-ba-dosh phirta hai,
Wafa ki rah mein sab kuchh luta ke sabir hai.

Kaha tha maine ki, "hamsaya doost mi daram",
Isi pe fatwa diya hai ke ye to kafir hai.

Tu uske qurb ki lazzat mein gham-ghazida hai,
Wo teri di hui tanhaiyon ka shakir hai.

Mein janta hun ke sangin mushkilein hongi,
Mera raqib riyakariyon mein shatir hai.

Ke lab sile rahein aur iltija zabani ho,
Amir-e shahr ke kal se ye hukm sadir hai.

Hawas-o-hosh to pehle se tum pe qurban hain,
Kaho jo sar ki to ai jan sar bhi hazir hai.

Usi pe mujhko bharosha hai mera taqwa hai,
Wo Muntaqim hai, Aadil hai aur Qadir hai.

Tere hi pyar ka sadqa hai ki 'Sagar' tera,
Sukhanwaron mein, adeebon mein sabse nadir hai.


5. Ghazal:

Tumhari yad mein hamne, zamane ko bhulaya hai,
Tumhein bhule se bhi ik din, hamara dhyan aaya hai.

Zamane bhar ki ruswai hamare ghar chali aayi,
Jise aana tha awwal wo, abhi tak bhi na aaya hai.

Ye kaisi teri hijrat hai, ye kaisi teri manzil hai,
Jo teri zeest ka ba'is hain, unko chhod aaya hai.

Jo tujh par jan dete hain, wohi barbad rehte hain,
Musalsal tu ne bhi unka, faqat dil hi dukhaya hai.

Nahin hai gham ka gham mujh ko, na hi khushiyon ki khushiyan hain,
Jo ye mehsoos karta tha, wo dil mein ne ganwaya hai.

Kahan tu kho gaya 'Sagar', pata tera nahin milta,
Kabhi apna hua karta tha, par ab tu paraya hai.


4. Ghazal:

Naya sal,
Khush-hal?

Khalq hai,
Bad-hal.

Har taraf,
Janjal.

Zindagi,
Paimal.

Leader hain,
Malamal.

Phir bhi,
Tera kamal.

Khush hun,
Har hal.

'Sagar' hai,
Be-misal.


3. Ghazal:

Sooni jabin pe chand sajaya bhi nahin hai,
Muddat hui wo khwab mein aaya bhi nahin hai.

Is bar bichhadte hue, mein hans ke bhi bola,
Is bar maine usko rulaya bhi nahin hai.

Zanu pe rakhe sar ko wo sunta tha kahani,
Rudad thi wo meri, bataya bhi nahin hai.

Kis bat ne us shokh ko, sanjida kiya hai,
Ab ke to mujhe usne chidhaya bhi nahin hai.

Ik tum ho ke she’ron mein hai, khud apni kahani,
Ik wo hai ke chaha bhi, jataya bhi nahin hai.

Dushman ki raghon mein bhi agar lal lahu hai,
Koi jahan mein phir to paraya bhi nahin hai.

Ik aur jahan dhoondh lo, apne liye ‘Sagar’,
Tanha ho yahan bhi, hamsaya bhi nahin hai.


2. Ghazal:

Ye muhabbat ka dekho asar, ham the kya, aur kya ho gaye,
Jis jagah dekhe naqsh-e qadam, hamse sajde ada ho gaye.

Tere jate hi ye bhi hua, aansuon ne kinara kiya,
Jinko palkon pe rakha sada, aaj wo bhi juda ho gaye

Naqsh-e pa ki zaroorat nahin, justju hi hai manzil meri,
Han, magar ek afsos hai, apne raste juda ho gaye.

Khud se bas ik shikayat rahi, hal-e dil un se keh na sake,
Dar-asal us ne poocha bahut, lafz hi na-rasa ho gaye.

Aap hi ki inayat hai ye, zindagi ik ghazal ban gayi,
Kafiyon ko sajaya kiye, shayari mein ada ho gaye.

Apne zakhmon se seekha na kuchh, gul ki khwahish mein kante mile,
Hath ke sath dil bhi chhila, aashiqi mein fana ho gaye.

Aaye milne ko mujhse magar, dekh kar meri maiyyat ko wo,
Naz se itna bole ‘Sagar’, “Aap sach-much khafa ho gaye.”


1. Ghazal:

Ai dil-e betab sambhal,
Kehta hun ik aur ghazal.

Aaj tu bas meri sun le,
Kal ki phir dekhenge kal.

Ghar se nikal pade, ab kya,
Manzil aaye ya maqtal.

Aisi zeest ka kya hasil,
Mein bechain hun tu bekal.

Zehan pe patthar mara hai,
Baitha dekh tu ab halchal.

Duniya se ab door kahin,
Mein chalta hun, tu bhi chal.

Usko ham ne jana kam,
Umra liye aayi thi pal.

Tanha reh kar umra kati,
Kar na saka tumko hasil.

'Sagar' kaise waqt kate,
Raat giran hai, din bojhal.


Back

Unless otherwise stated, the content of this page is licensed under Creative Commons Attribution-ShareAlike 3.0 License